- Monir El-Shazly
- Dec 11, 2024
اسبوع العرفان بالجميل (٦) - مدير بيكرهني !
تجارب مهمه في حياتي
----
علي عكس ما ناس كتير كانت بتنصحني، انا اشتغلت في اكتر من مكان و انتقلت بين اكتر من شغل في وقت صغير جدا ... كنت بعد التخرج عايز اشتغل في مجال الاستشارات، فقررت اني اشتغل في اكتر من مكان و اكتر من صناعه، علشان آخد خبره في اكتر من حته، تفيدني لما ابتدي اشتغل في مجال الاستشارات.
و فعلا عملت كده، اشتغلت في اكتر من حته و اتعاملت مع اكتر من مدير، إنما اكتر شخص أثر فيا من المديرين دول، كان أسوأ مدير اتعاملت معاه في حياتي!
ساعتها كان عندي حوالي ٢٣ او ٢٤، و ال ego بتاعي و شعوري بنفسي كان كبير جدا، و رغم اني كنت شاطر، إلا أن اسلوبي كان فيه كتير من الغرور بقدراتي ... و الراجل ده كان علي العكس تماما. كان عنده شعور كبير بالخوف من الأخرين، و كان بيقولي بصراحه أنه مابيحبنيش بس خايف يمشيني علشان انا بشتغل كويس! بس علشان انا كنت شاطر، فهو ماكانش لاقي سبب معقول يمشيني من الشغل بيه، فكان بيتلككلي. يقولي حاجات و بعدين يقول إنه ماقالهاش، يدوّرلي علي اي أخطاء و يكبّرها.. يديلي شغل زياده علشان افضل سهران فيه و يبعتلي حاجات علشان اعملها و بعدين يقول إني عملت كده من دماغي!
المهم أن المدير ده كان اكتر مدير اتعلمت منه ازاي شغلي يبقي كويس (علشان مالقليش غلطه يتلكك عليها) ، و ازاي يبقي ليا شخصيه في الشغل، و اعرف أرفض اني اشتغل زياده عن ساعات الشغل العاديه، و ازاي ابقي politically-correct و اعرف اقول اللي انا عايزه من غير ما حد يمسك عليا حاجه (و دي صفه مش سهله قوي لشخص برج قوس زيي، للناس اللي عارفه في الابراج 😁).
الاهم من كده كله، التجربه دي خلتني اعرف قد ايه ال ego بتاعي ممكن يعملّي مشاكل و يحسس الناس بتهديد من ناحيتي، و كمان ممكن يخلّي الناس تكرهني.... و اني محتاج اشتغل عليه!
و دي حاجه فادتني بعد كده في حياتي، مش بس العمليه بعد ما سبت مجال الاستشارات و اشتغلت في مجال العلاج النفسي ، إنما في حياتي بصفه عامه و علاقاتي بالناس!
فيه مقوله لابو الحسن الشاذلي بتقول "يُخدَم المرء علي يد عدوه" ، و فعلا ...التجربه اللي عيشتها في الشغل و كان سببها الراجل ده كانت مفيده ليا جدا في حياتي، و علشان كده انا مدين بالجميل للشخص ده.... علي سوء معاملته ليا!
(Repost)
YouTube: Monir El Shazly
Facebook page: @monirelshazlyspiritual
Instagram: monir.elshazly