كن جميلا !

مع التغيير الكبير اللي بيحصل في العالم في خلال السنين الاخيره، من كورونا لتغيرات اقتصاديه، لتغيرات اجتماعيه و اقتصاديه عنيفه؛ ناس كتيره بتشتكي من تغيّر اخلاق الناس و تغيّر طباعهم! و ان زمان الدنيا كانت سهله و الناس كانت طيبه، انما دلوقتي الدنيا بقت زي الغابه و ان لازم الواحد مايبقاش طيب علشان "الطيبين بيِتّاكلوا في الزمن ده"...

طب لو كلنا ما بقيناش طيبين و طَلَعنا بس الشر اللي فينا لبعضينا...بنشتكي من اللي بيحصل ليه؟؟

لو عايزين الحياه تتغير ...لازم نبدأ بتغيير حياتنا ...

و لو نِفسنا ان الناس تبقي طيبه تاني...محتاجين نحتفظ بالطيبه اللي فينا و نعاملهم كويس...

الناس اللي حلوه من جوه، بتشوف الحاجات الحلوه في الدنيا ...

و الناس اللي جواها خوف و كره و صراع، بتشوف الحاجات دي كلها في كل حته حواليها ...

التغيير عمره ما حييجي من بره... التغيير بيحصل من جوه الأول...من جوانا.

امي الله يرحمها كانت دايما تقوللي جملة ايليا ابو ماضي ....."كن جميلا..تري الوجود جميلا" ...

لمّا ننقي قلبنا من الخوف و الغضب و من الكراهيه ... حنعرف نشوف الجمال في الدنيا ... لأنه علي طول موجود !

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

The spiritual fastfood!

الوجبات السريعه الروحانيه !

The "spiritual" fastfood!

----

واحده من اهم المشاكل الكبيره في العالم دلوقتي في رأيي، هي ثقافة "التيك اواي" ...او "الوجبات السريعه" ...

الناس كلها عايزه تعمل كل حاجه بسرعه ...

توصل للي هي عايزاه بسرعه ، تغتني بسرعه ...تتعالج بسرعه ... حتي تتطور روحانيا بسرعه ...

ناس كتيره بتسألني أسأله من نوعية "انا محتاج كام جلسه علشان اتعالج من مشاكلي النفسيه؟" ، او " انا محتاج كام شهر علشان ابقي انسان متطور روحانيا ؟" أو "انا دلوقتي في انهي مستوي وعي ، و امتي اوصل للمستويات الاعلي ؟ " ...او حتي "هو انا المفروض اقرأ سورة الكهف كام مره علشان الحزن يمشي من عندي!"....

و ناس كتيره هاريه نفسها كورسات تنميه بشريه أو كوتشينح (coaching) أو هيلينج (healing) ...واحد ورا التاني، و كأن فيه سباق و انا محتاج اوصل الأول!

و مع احترامي الكبير لرغبات كل شخص و أن كل واحد *عايز يبقي سعيد بسرعه* الا ان للأسف الدنيا مش كده...كل حاجه محتاجه تاخد وقتها...

زي ما الست الحامل لو خلِفِت بسرعه ، الطفل حينزل ميت، و زي ما الفاكهه لو اتقطفت بسرعه حتطلع ماسخه و ما تتاكلش! ...

طبعا الايجو بتاعنا بيلعب ألعابه كتير و بيصورلنا أننا *محتاجين نوصل هناك دلوقتي* .... بس الحقيقه ان في رحلة التطور بتاعنا سواء كان نفسي او روحاني، اي طريق بنحاول نختصره، مابيوصلناش ....

الفكره مش اني لو اخدت كورسات عمّال علي بطّال ورا بعضها حتخليني اعرف اتطَور اسرع ....

ولا اني لو روحت لأتنين معالجين في نفس الوقت حخف في وقت اقل ...

ولا اني لو قريت سورة معينه عشرين مره بدل عشره الموضوع حيتحل في نص الوقت!

للاسف الفكره دي بيتم ترويجها ساعات من خلال الخطابات الدينيه ساعات ...و من خلال الكورسات ساعات تانيه ... و الناس ابتدت تاخدها اسلوب حياه علشان *مش قادره تستني* !

إنما الحقيقه ان كل حاجه ليها وقتها، لا حتيجي قبلها...ولا حتيجي بعدها ...

و اني لو اكلت ١٠ اطباق مره واحده من غير ما ادي فرصه لمعدتي تهضم كل واحد (حتي لو كان طعمهم حلو)، غالبا حروح المستشفي!.

طريق التطور الروحاني و العلاج النفسي طريق مش سهل ...بس ممكن تستمتع بيه لو انت ماشي بالراحه... و الاهم...انك تكون مستعد انك تتألم شويه ..علشان تنظيف اي جرح في الدنيا بيبقي فيه الم في الأول، و كمان لأن الألم هو واحد من أكبر المعلمين الروحانيين لينا في الحياه!

إنما الوصول السريع ...اللي من غير الم، ده فكره خياليه...عمرها مابتتحقق...و غالبا الطريق اللي بنمشيه علشان مانتألمش... او بنحاول نختصر نُصّه، بيبقي اكتر طريق مؤلم علي المدي البعيد....

الاختيار ليك!

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

دعوه للتعاطف!

دعوه للتعاطف!

----

مع التدهور الكبير في الحاله الاقتصاديه لمعظم الطبقات الاجتماعيه في مصر، اعتقد اننا حنبتدي نشوف ناس كتير بتشتغل في مهن ممكن يكون لينا احكام عليها ...

بداية من السايس اللي في الشارع، للناس اللي بتبيع حاجات علي الرصيف، لعربيات الاكل الغير مرخصة ، للناس اللي حتمسح ازاز العربيه في الإشارات .....و انتهاء ب..الدعا-ره !

البوست ده مش الهدف منه اني اعلن عن اعجابي أو رفضي لأي من المهن دي ( أو أي مهنه تانيه)، إنما الهدف منه اننا نحاول نفتكر اننا مانصدرش احكام عن الناس اللي حتشتغل حاجه من الحاجات دي، أو نحاول نتعاطف مع ظروفهم اللي خليتهم يشتغلوا اي حاجه، ممكن الناس تبصلهم نظره دونيه من خلالها !

و حتي لو ماقدرتش تتعاطف مع الناس اللي بتشتغل الشغلانات دي، علي الاقل ماتعاملهمش بقلة احترام، أو تبصلهم علي أنهم ناس "أقل" !

من السهل قوي اني أصدر احكام علي الناس، و انا قاعد في التكييف و معايا فلوس تكفيني لآخر الشهر، إنما لما الواحد بيتحط في مواقف معينه، كتير قوي من مبادئه و معتقداته بتتعرض للاختبار !

هل انا لو كنت مكان الشخص ده، بنفس ظروف تربيته، و نفس وعيه و تفكيره كنت حعمل اختيارات مختلفه عنه ؟ ...في الغالب لأ.

فقبل ما نصدر احكام علي الناس ( و احنا اصلا شعب بيميل لإصدار الأحكام) ، محتاجين نعرف أننا لو كنا مكان اي حد، بنفس ظروفه و وعيه.... كنا غالبا حنعمل زيه ...

و محتاجين نشكر ربنا، أنه ساترنا، و ماحطناش في اختبارات صعبه كان ممكن نقع فيها و نعمل حاجات عكس مبادئنا ....زي ناس تانيين وقعوا !

و نفتكر كلام سيدنا عيسي عن مريم المجدليه "من كان منكم بلا خطيئه، فليرمها بهذا الحجر " !

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual