- Monir El-Shazly
- Dec 8, 2024
اسبوع العرفان بالجميل (٣) - اصدقاء ماطلعوش "اصدقاء" !
تجارب مهمه في حياتي
---
انا طول عمري كان ليا أصدقاء كتير . و بحُكم اني اتنقلت بين اكتر من بلد، و بين اكتر من بيت في القاهره (و اكتر من مدرسه و نادي) ، دايما كنت بأعمل اصدقاء في كل حته بروحها ، و بعدين لما امشي من مكان لمكان، اعمل اصدقاء جداد، و احتفظ بصداقة ناس من القديمه.
و في يوم من الايام، (و كان ليا ساعتها جروب كبير من الأصدقاء)، اكتشفت أن ناس منهم بيتكلموا عليا وحش من ورا ظهري، و بيقولوا عليا كلام وحش، معظمه مش حقيقي...
الغريب بقي (و ده اللي فهمت سببه بعد كده من دراسة الوقوف العائلي ) أن ناس كتيره من الناس دي كانوا عاملين نفسهم اصحابي، و بييجوا يباتوا عندي، بيحكولي أسرارهم و ياخدوا رأيي في حاجات، و دايما كانوا بيقولولي قد ايه صداقتي فارقه معاهم !.
طبعا الموقف ده كان صعب عليا جدا، و كان ممكن يدخلني في دور الضحيه و الصعبانيات تطلع عندي زي ما معظم الناس بتعمل 😊.
و كان ممكن بردو اني أقرر اني ابطل اثق في الناس تاني و اخش في دور "مفيش صاحب يتصاحب" و "ملعون ابو الناس العُزاز" و الجو ده! 😁
المهم الحمد لله اخدت القرار الصح ساعتها (بمساعدة كلام امي و ابويا ) و قررت اني أواجه الناس اللي اتكلمت عليا كده، و اتعامل معاهم مش بالطريقه اللي هم كانوا يستاهلوها و انتقم (لأن كانا ساعتها عندي رغبه في الانتقام و أسرارهم كلها كانت عندي) ، إنما بالطريقه اللي انا اتربيت عليها... الطريقه اللي انا شايف اني بعامل بيها ربنا !
الموقف ده علمني حاجات كتير عن نفسي و عن هل انا بأتكلم كلام و اعمل عكسه لما اتزنق، ولا انا فعلا مقتنع باللي بقوله و بنفذه.
كمان لما سافرت بره و اتعرضت لموقف مشابه من "صديق" ليا (بسبب عنصري علي ما اعتقد ) الموقف ما اثرّش فيا قوي، علشان كنت اتدربت عليه قبل كده 😁.
إنما الدرس الاهم من كل ده، هو أن مافيش حد بيفضل علي طول!. كل الناس ليها وقت في حياتك، و لازم يمشوا بعديه....
فيه ناس حتقعد اكتر من ناس تانيه، و فيه ناس حتمشي بشكل محترم، و ناس حتختار انها تمشي بشكل مش محترم قوي... علشان كده الواحد لازم يستمتع بالناس و همَ في حياته، و يعرف أن ممكن الناس تكون بتحبك، بس غيرتهم منك بتخليهم يتصرفوا بشكل فيه أذيه ليك ...و علشان هم بشر ..فهم مش معصومين من الخطأ!.
و في النهايه لما ييجي وقت انهم يمشوا، افتكرلهم الذكريات الظريفه اللي كانت بينكم و ماتخليش الناس الجديده تدفع فواتير عدم الثقه اللي حصلت بسبب العلاقات القديمه اللي كان فيها مشاكل!
اتعلم الدرس، سيب الناس القديمه تمشي و افتكرلهم الحاجات الحلوه ...
و سيب فرصه للناس الجديده ييجوا، و يعملوا ذكريات جديده معاك!
(إعادة نشر)
YouTube: Monir El Shazly
Facebook page: @monirelshazlyspiritual
Instagram: Monir.elshazly