انت مش نظرة الناس ليك !
- Monir El-Shazly
- Feb 6
- 2 min read
زمان و انا صغير.. كان بيلفت نظري الكلام اللي من نوعية "الانسان ايه غير سمعته؟".... و "الناس حتقول عليك ايه؟ ".
و الحقيقه انا عشت جزء (الحمد لله مش كبير) من عمري خايف من كلام الناس و بحاول ارضيهم ... لغاية ما اكتشفت انّي مش محتاج اعمل كده.... و ده كان واحد من اكبر نُقَط التحول في حياتي!.
الحقيقه ان الناس اللي بتتكلم عنك كويس انهارده علشان كلامك و افعالك و قناعاتك عاجباهم ..همّ نفس الناس اللي ممكن تتكلم عنك وِحِش بكره، لو ارائك او افعالك خالفت رأيهم و توقعاتهم منك!.
علشان كده أنت لازم تسأل نفسك ، هل انا محتاج أبني سعادتي علي رأيهم.... اللي ممكن يتغيّر بين يوم و ليله ؟
لو سألتوا ناس عليا... ممكن تلاقوا ناس بتتكلم عني كويس جدا... و ممكن بردو تلاقوا ناس مابتحبّنيش و ناس تانيه ممكن تكون شايفاني انسان مختلف (بطريقه مش عاجبهم)...
فيه كلام ممكن أقوله و الناس تعتبره اضافه كبيره لحياتها و بيفتح مجالات ادراك مختلفه، و فيه كلام ممكن يتفهم بشكل غير كده تماما...
ناس ممكن تكون معتبراني شخصيه مُلهِمه ليهم ... و ناس تانيه ممكن تكون معتبراني انسان أفكاره خطيره، و ممكن يخافوا منه!
طب انا مين فيهم ؟... ممكن نقول إن زيي زي كل الناس... فيا حاجات كويسه...و اكيد فيا حاجات لسه محتاج اشتغل عليها... اكيد عملت حاجات كويسه في حياتي... و اكيد عملت حاجات ممكن تكون ضرّت حد في يوم من الايام (حتي لو مش واخد بالي!)
لا انا محتاج اكون كامل... و لا هدفي ده...
و لا انت مش محتاج تكون كامل ... و لا محتاج تنول رضا الناس كلها .. لأن ده عمره ما حيحصل...
ولا محتاج تقنع الناس بأفكارك (حتي لو كنت متأكد انها صح و حتفيدهم)
ولا حتي محتاج انك تظهر بشكل مثالي قدام اهلك...لأنهم غالبا حيفصلوا يحبوك حتي لو انت مش كامل الاوصاف ( و حتي لو انت مش فاكر كده :-) )
بدل ما تسجن نفسك في سجن " الناس حتقول ايه".. اطلع بره السجن و خليك صريح مع نفسك!
إقبل نفسك و حاول تطوّرها لو محتاحه تطوير...
خلي علاقتك بربنّا مبنيه علي اللي انت حاسس بيه... مش اللي اتقالك عليه! ...
اعرف ربنا معرفه شخصيه... بدل ما تسمع عنّه من الناس...
ِحِب نفسك و إتقبلها ... لأنك عمرك ما حتعرف تحب الناس بجد.. لو انت عايش في سجنهم .!.
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly
Comments