اصل انا بحبه !

اصل انا بحبه!/ اصل انا بحبها!

(إعادة نشر)

-------

كتير بقابل في الشغل بتاعي ناس في علاقات غريبه ، و مضرّه ليهم بشكل كبير... و لما اسألهم " طب ايه اللي مقعّدكوا؟". دايما الاجابه : "اصل انا بحبه/بحبها ، و مش قادر استغني عنها ! "

(و طبعا بتكون الكلمه دي هي نهاية الحوار بالنسبالي معاهم).

لكن الحقيقه ان مفتاح الحل هو في جملة "ماقدرش استغني عنه/عنها ". لان الحب الحقيقي (في مفهومي) ما فيش فيه تعلّق بالشخص... فكرة ان حد مايقدرش يعيش من غير حد فيها تعلّق كبير... و علي الرغم من ان الفكره يبان شكلها رومانسيه و جميله.... الا ان في معظم الاحيان الشخص اللي بيقول كده بيبقي مش قادر يعيش (او يستغني) عن نوع معيّن من الاهتمام او الشعور اللي الشخص التاني بيديهولو... و عايز الشخص يفضل بنفس الشكل. و يدّيله نفس الاهتمام !. اما لو الشخص ده اتغير ، او ابتدي مايعملش نفس الافعال اللي كان بيعملها.. فالشخص (اللّي كنا مش قادرين نعيش من غيره ) بيتحول في نظرنا لشخص اناني و مش شايف اِلا نفسه... و... و... و...

و طبعا ده معناه ان اللي احنا سميناه "حب" و اقنعنا نفسنا بيه ، هو في اكتره نوع من التعلّق بشخص علشان بيديلي حاجات انا محتاجها و مش قادر اديها لنفسي ( زي الشعور بالاهميه ،او غيره).

خلاصة اللي عايز اقوله هو ان عقلنا بيستخدم كلمة "انا بحبه و ماقدرش اعيش من غيره " حجه علشان مايشتغلش علي نفسه و يشوف ايه المشاكل بتاعته و يحلها (او بتاعت العلاقه و ينهيها)، و يستسهل انه يعيش في دور ضحية الحب و شهيد الغرام.

لو انت في علاقه و حاسس ان العلاقه دي فيها كتير من الظلم او قلة الاحترام... ماتخلّيش كلمة " انا بحبك" تضحك عليك....

لأن الحب الحقيقي مافيهوش لا تعلّق ... و لا شروط.... و لا توقعات... و قبل كل ده فيه احترام للنفس و للغير !

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

عامل نفسك كويس !

خليك حنين مع نفسك ... و عاملها كويس!

-----

“إذا أراد المرء أن يغيّر الطريقة التي يعامله بها الناس، فيجب أن يغيٌر أولاً الطريقة التي يُعامِل بها نفسه. وإذا لم يتعلم كيف يحب نفسه، حبًا كاملاً صادقًا، فلا توجد وسيلة يمكنه فيها أن يُحَب حقا" - #شمس_التبريزي

لو مش شايف نفسك تستاهل انك تحب و تتقبل نفسك، ازاي تتخيل حد حيلاقيك تستاهل انك تتحَب؟

انت مخلوق من ربنا، جزء من حكمته في الأرض... عامل نفسك من خلال كده!

#منير_الشاذلي

"If you want to change the way others treat you, you should first change the way you treat yourself. Unless you learn to love yourself, fully and sincerely, there is no way you can be loved!" - #Shams_Tabrizi

If you don't find yourself worthy of your own love, how could anyone find you worthy?

Cherish your Divinity, you were made by God.... for a reason, as part of a Divine plan!. #Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

لو بتحب حد !

بتحبّ حد؟ اه..... متقبّله زي ماهوّ ؟ لأ....

يبقي مابتحبوش كفايه!

---------

احسن هديه ممكن تديّها لأي حد انك تقبله زي ما هوّ...

طبعا لو قدرت ماتحكمش عليه اصلا يبقي احسن... انما لو مش عارف... علي الاقل تقبلّه زي ما هو (حتي بالحاجات اللي مضايقاك فيه)

لأن عمرك ما حتحبّ حد بجد لو انت شايفه لازم يتغير لصوره انت راسمهاله (كده يبقي انت بتحب الصوره، مش الشخص نفسه).

ملاحظه: الاطفال اللي ما حسّوش ان اهلهم متقبلينهم زي ما هم و هم صغيرين ، بيكبروا عندهم مشاكل في محاولة اثبات الذات، مشاكل في الثقه في النفس...و في الآخرين... و حاجات تانيه كتير ...

فقبل ماتقولوا انكوا بتحبوا حد....شوفوا هل انتو متقبلينهم زي ماهمّ ولا لأ. و لو الاجابه لأ...اعرفوا انكو مش بس مابتحبوهومش كفايه.... انما غالبا مش متقبلين نفسكوا اصلا كفايه !

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly