- Monir El-Shazly
- Aug 30, 2025
احسن حاجه نقدمها لأولادنا
------
بمناسبة اني اتكلمت كتير في الفتره اللي فاتت علي العلاقه مع الاولاد... ناس كتير سألتني ايه هي احسن حاجه ممكن نقدمها لولادنا ..
احسن ٣ حاجات في وجهة نظري هم :
١- انك تشتغل علي نفسك!. وده لأن لما تشتغل علي نفسك و تحل مشاكلك ده حيخليك ما تحولش مشاكلك عليهم ولا تشيلهالهم! .
علي النقيض من كده ، لما تكون مليان مشاكل ، كل ده حيأثر علي تعاملك معاهم و حيروحلهم بشكل مباشر او غير مباشر
٢- الحاجه التانيه اللي تقدمها هي وقتك...واهتمامك بيهم و وجودك معاهم اهم بكتير من انك تجيبلهم لعب و تدخلهم احسن مدارس و تطلعهم ابطال جمهوريه.
الطفل اللي بيحسّ انه مش متشاف من اهله ( مش واخد اهتمام كفايه) بيطلع عنده مشاكل كتيره من اول قلة الثقه في النفس لصعوبة انه يقول لا في حاجات او ياخد قرارات... ده طبعا غير انه بيعيش طول عمره بيدور علي الاهتمام ده في ناس تانيه (و مابيلاقيهوش)
٣- الحاجه الثالثه أن كل واحد من الأبوين يحترم التاني ... سواء كانوا مع بعض أو منفصلين!...
كل ما الطفل بيحس أن أهله بيحترموا بعض، ده بيديله شعور بالأمان و الحريه أنه مسموحله يحب كل واحد فيهم ... و أنه مش محتاج ياخد صف امه ضد ابوه (علشان امه ماتزعلش)..أو العكس.
الطفل اللي أهله مابيحترموش بعض، بيبقي دائما محتاج ياخد صف حد فيهم ضد التاني ، و ده اسوأ اختيار لأي طفل!
احسن التعليم... احدث iPhone ... اغلي لبس.. كل الكلام ده مش حيخليهم سعدا في الحياه ... لو الحاجات اللي قولتها دي مش موجوده!.
YouTube: Monir El Shazly
Facebook page: @monirelshazlyspiritual
Instagram: Monir.elshazly