عن أولويات الحياه !

عن أولويات الحياه!

------

ناس كتير بيشتكوا من غلاء الاسعار و صعوبة الحياه دلوقتي...

و فعلا الحاجات كل شويه بتغلي ، مش بس في مصر ..إنما في العالم كله!

و ناس كتير قالولي انهم عايزين ييجوا علشان يشتغلوا علي نفسهم و بعدين قالوا انهم ناويين يأخروا الموضوع شويه علشان معهمش فلوس كفايه، أو علشان عندهم التزامات محتاجين يخلصوا منها الاول!

الظريف بقي ان فيه جزء كبير من الناس اللي بيشتكوا و بيقولوا كده بيسافروا كل اسبوع الساحل و بيسهروا بشكل يومي!

و جزء اكبر شاغلين نفسهم بآخر اسعار للموبايل و ال smart watches (علشان الاستيراد بقي قليل و الاسعار غليت!)

و ناس تانيه بيشتكوا من ان اسعار الشنط و الجزم ال designers غليت و انهم بعد ما كانوا بيشتروا الشنطه ب ١٠ او ١٥.. بقت ب ٦٠ و ٧٠ (الف جنيه)

انا مش قصدي هنا أن الكلام ده غلط، لأني شايف ان المفروض كل واحد بيعمل اللي شايف انه صح... بس الغريب هنا هو قد ايه فيه ناس حاطّه شغلها علي نفسها و سلامها النفسي في اخر اهتماماتها و بيفضلوا يشتروا شنطه او جزمه او يروحوا يسهروا او حتي يسافروا، علي انهم يشتغلوا علي نفسهم و سعادتهم.

المشكله هي ان السعاده اللي بتجيبها السهره او الجزمه هي سعاده لحظيه (لأنها مرتبطه بال ego) و بتروح اول ما السهره تخلص.. او اول ما الصحاب يشوفوا الشنطه و يقولوا انها حلوه...

و حتي السفر (رغم حبي ليه)، الا انه ناس كتيره بتستغله كهروب من حياتها، و بتكتئب اول ما السفريه تخلص و ترجع لحياتها اللي هي كارهاها من الأساس...

طبعا ده غير اعتماد ناس كتيره دلوقتي علي الشُرب و المخدرات و المهدئات و الحبوب المنومه علشان "الايام تعدي" لغاية ما اسافر تاني او "الويك اند" ييجي... و "اهي ايام و بنعديها!" !

في مقابل ان السعاده الداخليه المبنيه علي تقبٌُل الحياه و التصالح مع الناس (و الاب و الام تحديدا) هي اللي بتفضل!

الخلاصه ان معظم الناس تُعساء و مش مبسوطه من حياتهم علشان المجتمع و التربيه و ال media مخليانا نبص برّانا علي السعاده و ندور علي حاجات لحظيه علشان تدينا شوية سعاده... رغم ان السعاده (اللي بتفضل) هي السعاده اللي بتيجي من السلام مع النفس.... السعاده اللي من جوا...

إنما للاسف الأولويات مش مترتبه بالشكل الصح لناس كتير!

(إعادة نشر)

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

ليه فيه ناس بتدخل في علاقات عاطفيه متتاليه ورا بعض؟

ليه فيه ناس بتدخل في علاقات عاطفيه متتاليه ورا بعض؟

------

كنت كتبت قبل كده عن السبب ورا ان معظم الناس بتدخل في علاقات هي مش دايما راضيه عنها و بتقنع نفسها بيها علشان تستمر... رغم انهم عارفين (و ساعات متأكدين) من ان العلاقه دي مش كويسه ليهم... و علشان كده بيضيعوا جزء كبير من حياتهم في علاقات مش ناجحه، و حياتهم بتضيع و هم في معظم الوقت مش مستمتعين بيها ....

السبب في رأيي ٣ حاجات اساسيه...

اول حاجه طبعا هو علاقتهم بأهلهم.. و ده غالبا (بس مش قاعده ) بيبقي الام (في حالة الرجاله) و الاب (في حالة الستات). لأن معظم الناس بيدوروا ( بعقلهم الواعي) علي حد من الجنس الاخر يديهم حاجات هم حاسين أنهم ماأخدوهاش او نفسهم فيها من الاب (غالبا في حالة الست) او الام (غالبا في حالة الراجل).

طبعا نوعية العلاقات دي بيبقي فيها اضطراب كبير (dysfunctional relationships ) علشان دور الام او الاب بيختلف بشكل تام عن دور الزوج أو الشريك!. و كلام الافلام و المسلسلات بتاع "انتي مراتي و بنتي و امي" ، او "انت اخويا وابويا و ابني" ده كلام ضار جدا، و دائما مشاكله بتظهر بعديها علي طول!

علشان كده مهم جدا قبل ما حد يخش في علاقه انه يحاول يوصل لسلام نفسي مع الام (في حالة الراجل) او الاب (في حالة الست).

السبب التاني في رأيي ان معظم الناس خايفه تكون لوحدها انهم مابيحبوش نفسهم كفايه و مستنيين تقدير (validation ) من حد براهم علشان يحسوا أنهم كويسين.... و ده بردو راجع بشكل كبير لأسلوب التربيه و المفاهيم اللي اتحطت في دماغهم عن نفسهم... و لتخيلهم ابوهم و امهم شافوهم ازاي بردو !.

لو انا مابحّبش نفسي يبقي اكيد مش حبقي عايز اقعد معاها لوحدي :-) . و ححاول دايما ادور علي حاجه (او حد) يشغلني عنّي او حد يكملني او ينقذني من الضياع ! . وعلشان كده واحده من علامات الرقي و التطوّر الروحاني عند الناس هو قدرتهم علي انهم يكونوا لوحدهم من غير ما يدوروا علي حاجه تشغلهم او من غير ما يحتاجوا حد يكون معاهم.

السبب الثالث ساعات هو حاجه بنشوفها في الشغل بتاعنا اسمها "متلازمة التوأم المتلاشي" او "متلازمة التوأم المختفي"

(#Vanishing_twin syndrome )

و دي حاله يقال إن نسبة حدوثها حوالي من ١٠٪ من مجمل حالات الحمل في العالم، و معناها ببساطه إن كان فيه توأم (واحد او اكتر ) للطفل اللي جه، بس التوأم ده اتوفي في بداية الحمل (و حتي ساعات بيتوفي في البدايه خالص لدرجة أنه بيظهر في السونار كتجمع دموي ) و بيخرج من الأم في صورة دم أو نزيف بسيط في بداية الحمل أو ساعات بيتحول لغذاء للطفل التاني! .

المهم أن الطفل التاني (surviving child) اللي بيتولد بعد كده بيبقي غالبا عنده شعور غير مفهوم بالوحده، و ان "ناقصُه حاجه" علي طول... و كتير جدا بيبقي "بيحِب علي نفسه" و عايز يخش في علاقات ورا بعض علشان الشعور بالوحده اللي عنده. كمان الناس دي غالبا بيبقي عندها مشكله في تحديد اتجاهاتها في الحياه و صعوبه في معرفة هم عايزين يشتغلوا ايه او في انهي مجال.. او حتي في بعض الأحيان بتأثر علي هويتهم الجنسيه ( بس ده موضوع تاني ممكن نبقي نتكلم فيه بعدين).

و طبعا واحد من أسباب فكرة العلاقات المتعدده هي الدوافع و الرغبات الجنسيه المكبوته ( sexual needs) .......

اللي في المجتمع الشرقي غالبا بتتخفي تحت مسمي "العلاقات العاطفيه " ...

بس انا هنا بركز علي الاسباب النفسيه اللي بتخلي الناس مش قادره تبقي لوحدها ...

الانسان هو كائن شديد التعقيد ، و الحاجات اللي بنمر بيها في حياتنا بتأثر علينا بشكل كبير و علي مستويات مختلفه

و علشان كده الأسباب اللي انا قولتها هنا مش هي الأسباب الوحيده اللي ممكن تخلي الناس تدخل في علاقات عاطفيه ورا بعض ...فيه اسباب تانيه طبعا (بس دي حتبان مع شغل علاج نفسي أو كوتشينج كويس )...

في رأيي الشخصي، (و الكلام ده لكل واحد خايف يكون لوحده!)، لو انت مش مستحمل تكون لوحدك مع نفسك، تعتقد مين حيقدر يستحمل يكون معاك مده طويله؟

علشان كده ..قبل ماتبقي عايز تحِب حد و تخش في علاقه.. حِب نفسك الاول و اتقبلها و احترمها علشان لما تخش في علاقه الشخص التاني يتعلم يحترمك بردو! !

و لو انت شايف أن أي سبب من السببين الاولانيين مُنطبق عليك، تبقي محتاج تشتغل علي نفسك...

اما لو السبب الثالث هو اللي بيوصِفَك اكتر، تبقي غالبا محتاج تشتغل عليه مع حد بإستخدام طريقة "النظام العائلي" ( #familyconstellation ) علشان علي حد علمي هي دي اكتر طريقه ممكن تساعدك علي تعديل المشكله دي ....

بس في كل الحالات ...و سواء كان سبب واحد لو كلهم، لو انت ما اخدتش المسئوليه بتاعت تطوير نفسك ...مفيش حاجه حتتغير !

#منير_الشاذلي

#Monir_El_Shazly

#familyconstellationtherapy

#family_constellations

#FamilyConstellations

#وقوف_عائلي

#علاقات_عاطفيه

#علم_نفس

YouTube: Monir El Shazly

Facebook page: @monirelshazlyspiritual

Instagram: monir.elshazly

لو عايز تكون محترم

لو عايز تكون محترم!

(اعادة نشر)

--------

ده تخين "قوي". دي رفيعه " زياده "... ده "حمار " مابيفهمش.... ده "عمره ماحيخش جنّه." ... دول "احفاد القرده و الخنازير" .... دول "رايحين النار حدف".. ده "غبي قوي " دي "ش**** ".... ده "ابن ***" واطي........ ده.... دي.... دول....

كلام كتير بقي بيتقال و الناس بقت متقبلاه كجزء من حياتنا اليوميه و بتقوله في حواراتها اليوميه كنوع من انواع الهزار ساعات...او السخريه ساعات تانيه.. . او طبعا كنوع من انواع اصدار الاحكام علي الناس التانيين بناء علي حاجه سمعوها عنهم.... او عن تعامل ليهم معاهم او عن طريق افلام شافوها...... او "للاسف " عن طريق خطب سمعوها من ناس "بتوع ربنا " !

المشكله ان الناس "اللي بتقول الكلام ده "... هي هي الناس "اللي بتشتكي من كلام الناس عليها " و قد ايه المجتمع ده مجتمع وحش و بيحكم علي الناس و مش سايب الناس في حالها!. و هي هي الناس " اللي نفسها الناس تتقبلها زي ما هي " و بتعاني من نظرات الناس ليها او كلام الناس عليها.

المجتمع و البلد هي مجموعه كبيره من الناس عايشين في مكان واحد. ... فلو عايز تغير حاجه انت متضايق منها ابتدي بنفسك.... اعرف ان "كما تدين تُدان " و بطّل تحكم علي الناس و علي اخلاقهم و قُربهم من ربنا.. و بما ان مفيش حد فينا بدون اخطاء ، فبلاش نرمي الناس بالطوب ....

لو عايز الناس تسيبك في حالك.... سيب الناس في حالها

.

و لو عايز تقرّب من ربنا..... بطّل تلعب الدور بتاعه و تحكم علي اخلاق الناس و علي قربهم او بعدهم عنه عن طريق الحجاب او النقاب او المايوه البكيني

و لو عايز يكون دمّك خفيف...مش لازم تكون الطريقه انك تتريق علي اللي انت شايفه تخين او غبي او مش متعلّم ..

بطّل تشوف نفسك احسن من الناس.... و تحكم عليهم و علي تصرفاتهم....

لو عايز تكون محترم..... احترم الناس!

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

* جرّب تقضي النهارده من غير ما تحكم علي حد!