خلي بالك انت بتفكر في ايه ؟

بمناسبة غلاء الأسعار و صعوبة المعيشه (و كمان التقلبات السياسيه الغريبه )، كم الطاقه السلبيه اللي بقي موجود في كل حته مابقاش طبيعي... كل ما اتكلم مع حد أو اقعد في قعده، الاقي المواضيع دي اتفتحت و الناس ابتدت تشتكي ... لدرجة اني لاحظت أني بقيت بدون ما اخد بالي ادخل في الحوارات دي و "اتكلم عن ايام الرخص و الحياه اللي كانت سهله و السفر اللي كان متاح في أي وقت! " ... و طبعا بدون ما اخد بالي مودي العام اتأثر، و بقيت "مقريف"... علي عكس طبيعتي ! ..

خلوا بالكم انك ماتدخلوش في حوارات كتيره من النوع ده، و ماتتكلموش طول الوقت عن الحاجات اللي مضايقاكم، لأن ده حيأثر عليكم بشكل سلبي و حتلاقوا نفسكم مش طايقين نفسكم ..و لا حياتكم ...النوع ده من الحوارات رغم أنه يبان أنه بيساعد...إنما ضرره اكتر بكتير من نفعه ....

معظم الناس دماغها دايما واخداها للأفكار اللي بتضايقها!.

بتقلق و بتخاف... و بتعمل قصص من الحاجات اللي حصلت في حياتها و بتصدقها ...

او خايفه من الحاجات اللي حتحصل ...

خلّي الافكار تعدّي في دماغك... و امسك بس في الافكار اللي عاجباك علشان تقعد اكتر شويه ...

بس حتي الأفكار دي، ماتاخدهاش علي انها حقيقه!

هل معني كده أني اعيش في الوهم و أتخيل ان الحياه كلها بقت ورديه ؟ ..اكيد لأ ... إنما اختار اركز تفكيري علي ايه ...و نوع الحوارات اللي ادخل فيها، و نوعية الطاقه اللي ابقي حواليها ..

مهم اني اركز علي الحاجات اللي بحبها ...و ما احطش تركيزي علي الحاجات اللي بتضايقني أو بتأثر عليا بشكل سلبي ..

خلوا بالكم .... النوع ده من الفضفضه...مؤذي جدا !

"من الحكمه انك تتجنب تركز في الافكار اللي بتضعفك (أو بتضايقك)!" - #رومي

#منير_الشاذلي

#افكارك_بتأثر_علي_حياتك

#النوع_ده_من_الفضفضه !

YouTube: Monir El Shazly

Facebook page: monirelshazlyspiritual

Instagram: monir.elshazly

اصل انا اهلي كبروا !

فيه جُمل غريبه بأسمعها من ناس كتير، و واخدينها حقيقه مسلّم بيها من نوعية "اصل الاهل لما بيكيروا بيرحعوا اطفال تاني!" و "اصل ابويا و امي كٕبروا و مش عارفين ياخدوا قرارات في حياتهم! " ...و ساعات كمان "اصل انا أمي (او ابويا) ماعندوش خبرة الحياه اللي عندي !"

الكلام ده بأسمعه كتير للاسف، و رغم انه مش بس بيعمل مشاكل كتيره في العلاقه مع الاهل في رأيي، إنما كمان بيفترض افتراض فيه تعالي علي الاهل غير صحيح بالمره و مالوش اي اساس ...

اولا، طول ما الاهل عندهم القدره علي التفكير ( مش فاقدي الاهليه أو عندهم امراض تمنعهم من اتخاذ القرارات الصحيحه ) ، فلازم نعرف انهم الأكبر ...لا الاهل بيرحعوا اطفال تاني زي ما ناس بتقول، و لا هم محتاجينك تعلمهم ازاي ياكلوا بالمعلقه ...الحقيقه ان هم اللي علموك ده!

ثانيا، لو انت فاكر أن اهلك ما عندهومش خبره في الحياه، امال مين اللي كبرك، و علمك؟ و مين اللي عاش ٦٠ او ٧٠ سنه و شاف ناس بتتولد و ناس بتموت و مر بتجارب اكتر من عمرك انت بكتير ؟

ثالثا، الاهل لما بيكبروا ممكن يبقوا محتاجين لينا نساعدهم في الحاجات اللي محتاجه قوه جسمانية أو معرفه تكنولوچيه مش عندهم، إنما معرفتك بالتكنولوچيا و شهاداتك الدراسيه، مش معناها أن خبرتك الحياتيه اكبر من اهلك ...الخبرات الحياتيه مابتتقاسش بالعلوم و للتكنولوچيا، الخبرات في الحياه بتتقاس بتجارب الميلاد و الموت و المواقف الصعبه و ال traumas اللي الإنسان مر بيها و تعايش معاها... و في ده الاهل دائما سابقيننا بخطوه ...

رابعا، و من ملاحظتي في أحيان كتيره، اي حد فاكر نفسه اكبر من اهله، بيحمًل نفسه هًم و مسئوليه كبيره بتجيبله امراض ضغط، و غالبا بتضعف فقرات العمود الفقري السفليه....

مش بس كده، إنما كمان الاهل اللي بيحسوا أن أولادهم ببعاملوهم كاطفال ، و بيستخفوا برأيهم، بيبقوا معرضين اكتر للمرض، و بيفقدوا الشعور بأهميتهم في الحياه (و ده بيأثر علي مناعتهم و قدرتهم علي الشفا من الأمراض) .

الخلاصه من كلامي ده، ان الواحد لازم يعرف مكانه الصح في التعامل مع أبوه و امه، و يعرف دائما أنه "هو الصغير، و هم الكبار' ...و ان "الكبير دائما عدي بحاجات في حياته ...اكتر !"

#منير_الشاذلي

#Monir_El_Shazly

(إعادة نشر)

YouTube: Monir El Shazly

Facebook page: monirelshazlyspiritual

Instagram: Monir.elshazly

عن العلاقات !

فيه افكار غريبه اتحطت في دماغ البنات من وهم صغيرين عن "فارس الاحلام" اللي حييجي راكب حصان ابيض في ابيض، و حيعوضها عن كل المآسي اللي شافتها في حياتها ...

الأفكار دي اتقالتلهم بدايه من افلام الكرتون ( سندريلا و سنووايت) ، مرورا بالحكايات بتاعت الشاطر حسن اللي حينقذ الاميره ... و انتهاء بالامثال بتاعت "ضل راجل و لا ضل حيطه" ...و الكلام ده !

مشكلة الأفكار دي أنها مش بس غرست في العقل الباطن للست صورة انها كائن ضعيف و محتاج لحمايه (أو حتي خلاص) من الراجل و افقدتها ثقتها بنفسها في أحيان كتيره ، إنما كمان خلت بنات و ستات كتيره لما يكبروا شويه يقعوا ضحايا لشخصيات نرجسيه أو استغلاليه، علشان الشخصيات دي دائما بتعرف ترسم صورة فارس الاحلام في بداية علاقتها بالست، و الكلام ده بيسمّع عند ستات كتيره في احلام الطفوله بتاعتهم عن الشخص اللي ربنا حيعوضهم بيه عن كل اللي شافوه ...

المشكله كمان مش بس فكرة أنها تقابل حد عنده صفات نرجسيه كتيره ،او شخص يعملها استغلال عاطفي، إنما كمان أنها ممكن تقابل رجاله تنصب عليها ماديا ، و ياخدوا فلوسهم أو يورطوهم في التزامات ماديه يفضلوا مزنوقين فيها بعد ما الرجاله دي تهرب!

و للاسف الكلام ده بقيت بشوفه كتير في شغلي و بسمع عنه كتير في قصص لناس بتروح لزمايل ليا ...

طيب الحل ايه ؟

بخلاف الحل اللي علي المدي الطويل بتاع أن قصص الاطفال دي لازم تتغير، أو أن الأهالي يألفوا قصص تانيه تغير من نظرة البنت لنفسها و حلمها بالفارس ( prince charming )، و طبعا الكلام ده محتاج سنين (جيل تاني) لغاية ما يحصل ، فيه شوية نصائح ممكن اقولها للستات علشان تقلل من احتمالية وقوعها في القصص الاستغلاليه دي ..( و الكلام ده ينطبق علي بعض الرجاله طبعا اللي بتقع مع ستات نرجسيه أو استغلاليه )

١- خدي وقتك

اي علاقه بين اتنين ..محتاجه تاخد وقت علشان تتبني صح ...و بصفه عامه، معظم الرجاله ماتبقاش عايزه ترتبط ارتباطا رسمي بسرعه ...فلو لقيتي راجل قالك أنه بيحبك في خلال اسبوع و ابتدي يقول إنه عايز يتجوزك في خلال شهر ... اعرفي أن احتمالية أن يكون فيه حاجه هو مخبيها احتمالية كبيره جدا ...

فخدي وقتك تماما و بلاش تسرع!

٢- اي علاقه ماحصلش فيها اختلاف في وجهات النظر في وقت من الأوقات، تبقي علاقه لسه مش ناضجه !

كل واحد بيبقي ظريف و جميل، و مرن ، طالما الكلام ماشي علي هواه ، فلازم تستني شويه لغايه ما يحصل خلاف في وجهات النظر في حاجه كبيره نسبيا ، و تشوفي هو حيتصرف ازاي، و هل حيعمل حساب لزعلك، و حيبقي عنده رغبه في الوصول لحل مُرضي ليكي و ليه، ولا حينشف رأيه و يلف و يدور لغايه مايخليكي تنفذي اللي هو عايزه !

٣- شوفيه بيتكلم عن أهله ازاي !

اي حد بيتكلم عن أهله وحش، أو عنده مشاكل كبيره مع اهله، غالبا حيبقي عنده غضب مكتوب ( من حاجات هم عملوها أو ماعملوهاش ) في علاقته بيهم .

الغضب ده حيجيله وقت و يطلع ... و غالبا حيطلع عليكي انتي اول واحده بعد كده! ..كمان الحاجات اللي كان مستنيها من أهله غالبا حيبقي مستنيها منك انتي... و ده مش دورك !

هل ده معناه، أن لازم الواحد يبقي علاقته بأهله كويسه قبل ما يدخل في علاقه؟ ...انا رأيي اه ... بس طبعا ده كلام مش دايما بيحصل... إنما علي الاقل مايكونش عنده غضب عنيف منهم ...أو من حد فيهم !

٤- شوفيه ازاي بيتكلم عن ال ex's بتوعه ( صاحباته أو زوجاته اللي قبليكي )

اي حد بيتكلم بقلة احترام عن الست اللي كان معاها، اعرفي أن ممكن الدور ييجي عليكي و يتكلم عنك كده!

و اي حد عنده غضب أو ( unfinished business ) مع ال ex بتاعته، غالبا انتي حتدفعي الفاتوره بدالها !

طبعا الكلام ده مش معناه تدوري علي حد نفسه يرجع لمراته السابقه و بيحلم بيها بالليل ، بس معناه انك تشوفي هل بيتكلم عنها باحترام أو بيفتكرلها حاجات كويسه و لا دائما بيشتم فيها ...

لأن الاحترام ده صفه مهمه و اساسيه في العلاقات ...بغض النظر عن الشخص التاني عامل ازاي!

٥- مفيش حد كامل !

كل حد فينا عنده حاجات مر بيها و حاجات محتاج يشتغل عليها ، فلما حد يظهر في صورة أنه كامل... خلي بالك!

معظم النصابين بيرسموا صوره مختلفه تماما عن الحقيقه، و معظم النرجسيين بيعيّشوا ضحاياهم في "فترة شهر عسل " ( honeymoon phase ) لما بيقابلوهم في الاول ....

و ده يرجعنا للنقطه الاولي ...خدي وقتك ... الناس دائما بتتعرف من المواقف ...و المواقف بتبان مع الوقت ..لأن مفيش حد بيعرف يمثل علي طول !

#منير_الشاذلي

* طبعا تاني، الكلام ده ينطبق علي بعض الرجاله اللي بتقع مع ستات نرجسيه أو استغلاليه ..نفس النموذج ده موجود عند الستات

#علاقات_استغلاليه

#علاقه_استغلاليه

#شخصيات_نرجسيه

YouTube: Monir El Shazly

Facebook page: monirelshazlyspiritual

Instagram: monir.elshazly