عن التواضع

عن التواضع

-------

ماتخليش الايجو (الهويه المزيفه للنفس) بتاعتك تخليك تحس انك احسن من التانيين .. او حتي تستاهل احسن منهم.

الانسان اللي من جوه مليان.... مش حتلاقي صوته عالي و عايز يظهر !

الناس اللي فعلا عندها علم....و الناس اللي فعلا متربيه... هم الناس اللي مش محتاجين يثبتوا ده للناس .... و هم الناس الاكثر تواضع.

"الاغصان اللي بيبقي فيها ثمر...بتبقي دايما اقرب للارض من اللي مافيهاش!" -

#مهاريشي

#منير_الشاذلي

"About #humility we speak with an analogy: When the branches are full of fruit, they just bow down." - #Maharishi

Truly evolved people, make lesser noise.

Work on your #ego! - #Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

مش مهم الناس كلهم يحبوك أو يرضوا عنك !

مش مهم الناس كلهم يحبوك أو يرضوا عنك!

------

زمان و انا صغير.. كان بيلفت نظري الكلام اللي من نوعية "الانسان ايه غير سمعته؟".... و "الناس حتقول عليك ايه؟ ".

و الحقيقه انا عشت جزء (الحمد لله مش كبير) من عمري خايف من كلام الناس و بحاول ارضيهم ... لغاية ما اكتشفت انّي مش محتاج اعمل كده.... و ده كان واحد من اكبر نقط التحول في حياتي!.

الحقيقه ان الناس اللي بتتكلم عنك كويس انهارده علشان كلامك و افعالك و قناعاتك عاجباهم ..همّ نفس الناس اللي ممكن تتكلم عنك وِحِش بكره لو ارائك او افعالك خالفت رأيهم و توقعاتهم منك!.

علشان كده لازم الواحد يسأل نفسه ، "هل انا محتاج أبني سعادتي علي رأيهم.... اللي ممكن يتغيّر بين يوم و ليله؟"

لو سألتوا ناس عليا... ممكن تلاقوا ناس بتتكلم عني كويس جدا... و ممكن بردو تلاقوا ناس مابتحبّنيش و ناس تانيه ممكن تكون شايفاني مختلف بشكل مش عاجبهم...

ناس ممكن تكون معتبراني شخصيه مُلهِمه ليهم ... و ناس تانيه ممكن تكون معتبراني انسان أفكاره خطيره، و ممكن يخافوا منه! طب انا مين فيهم ؟... بس الحقيقه اني شخص فيه حاجات كويسه...و اكيد فيه حاجات لسه محتاج يشتغل عليها... اكيد عملت حاجات كويسه في حياتي... و اكيد عملت حاجات ممكن تكون ضرّت حد في يوم من الايام (حتي لو مش واخد بالي!)

احنا مش محتاجين نكون كاملين( perfect )... و لا محتاجين ننول رضا الناس كلها .. لأن ده عمره ما حيحصل...

ولا حتي محتاجين نقنع الناس بأفكارنا (حتي لو كنا متأكدين انها صح و حتفيدهم)

ولا حتي محتاجين نظهر بشكل مثالي قدام اهلنا... لأنهم غالبا حيفضلوا يحبونا (في معظم الأحيان) حتي لو كنا مش كاملين الاوصاف ( و حتي لو كنا مش فاكرين كده :-) )

بدل ما تسجن نفسك في سجن "الناس حتقول ايه؟".. اطلع بره السجن و خليك صريح مع نفسك. اِقبل نفسك و حاول تطوّرها لو محتاحه تطوير...

خلي علاقتك بربنّا مبنيه علي اللي انت حاسس بيه... مش اللي اتقالك عليه! ...

اعرف ربنا معرفه شخصيه.. بدل ما تسمع عنّه من الناس...

ِحب نفسك و اتقبلها ... لأنك عمرك ما حتعرف تحب الناس بجد.. لو انت عايش في سجنهم!

#انت_مش_سمعتك

#منير_الشاذلي

#Monir_El_Shazly

(إعادة نشر)

YouTube: Monir El Shazly

Facebook page: @monirelshazlyspiritual

Instagram: Monir.elshazly

On sufism !

بحُكم اني كتير بكتب بوستات لجلال الدين الرومي، و حافظ شيرازي و الحلاج و غيرهم ، ساعات ناس بتعتقد اني منتمي لطريقه صوفيه معينه، و بيبتدوا يسألوني عن مفهوم التصوف ، و عن #الطرق_الصوفيه... الكلام اللي حقوله هنا كنت كتبته قبل كده من حوالي سنه، و حعيد نشره علشان الناس اللي ماكانتش شافته قبل كده و كان عندها اسئله علي الموضوع ده

١- التصوف كفكره من الصعب شرحها في كلام ملخص لانه عميق جدا و كتير من كتابات المتصوفه فيها مستويات للفهم صعب شرحها بشكل مبسط ....

أنما ممكن نقول إن التصوف هو طريقه لمعرفة ربنا بشكل معتمد اكتر علي حب الله و الرغبه في معرفة الخالق بشكل أعمق من القيام بالشعائر و العبادات بدون معرفة الهدف منها، و بدون ماتكون الجنه هي الهدف من معرفته

٢- مدارس التصوف كتيره جدا، و فيه منها اللي بياخد اتجاه فلسفي ، و فيه اللي بياخد اتجاه شعري، و فيه اتجاهات ممكن نسميها مائله اكتر للقلب من العقل .

كل واحد علي حسب مستوي وعيه و علي حسب استعداده، بينجذب الاتجاه المناسب ليه ...

٣- فيه ناس بتقول أن بداية الصوفيه كمنهج معرفي ممكن تكون عند سيدنا علي بن ابي طالب ...و فيه ناس بتقول انها ابتدت عند سيدنا محمد ...و فيه ناس بتقول انها من قبل كده.

إنما المؤكد هو أن مفهوم معرفة ربنا بشكل معتمد علي الحب و الرغبه في معرفته ده موجود في كل الديانات (مش بس الديانات

الابراهيميه التلاته ) ...

في المسيحيه بيسموه mysticism

في اليهوديه اسمه Kabala

و في البوذيه حتي ييسموه zen Buddhism ...

٤- الطرق الصوفيه بدأ ظهورها بعد قرون من ظهور الصوفيه كفكره... و كتير منها ظهر بعد وفاة الشيخ اللي بتنتمي ليه .

٥- الصوفيه أعمق بكتير من مجرد حفلات او حضرات الناس بتروحها أو حلقات ذكر او رقص مولوي ... إنما للاسف في الوقت الحالي ناس كتيره هو ده اللي عارفاه عن الصوفيه.

ده مش معناه أن الحضرات أو حلقات الذكر حاجه وحشه، إنما معناه أن اختزال الصوفيه في الكلام ده هو تسطيح كبير لمفهوم التصوف ... مشابه لفكرة أن واحد شاف عربيه لأول مره و ابتدي يتكلم عن السواقه و يعلمها للناس !

حضور حفلات الذكر أو الانشاد هو نشاط من انشطه كتيره بتختلف علي حسب الطريقه الصوفيه ، انما الهدف من الصوفيه حاجه أعمق بكتير

٦- مصر فيها طرق صوفيه كتيره منتسبه لشيوخ و فيها اكتر من طريقه ممكن تكون منتسبه لشيخ واحد (زي ما فيه طرق كتيره منتسبه للشيخ ابو الحسن الشاذلي مثلا ) ...

انا كان ليا احتكاك بشويه من الطرق دي،انما ماانتسبتش ( و لا اخدت عهد) من اي منهم . رغم أن جدي الكبير هو ابو الحسن الشاذلي نفسه .

٧- العلاقه بين الشيخ و المريد في الطرق الصوفيه ( و في كتير من الطرق الروحيه ) هي علاقه معقده و صعب شرحها هنا، و للاسف الهويه المزيفه للنفس البشريه ( الايجو ego ) ساعات كتيره بتتدخل فيها ... و كتير من القصص عن شيوخ و مريدين بدايتها كانت كويسه، إنما انتهت بشكل فيه اذي للشيخ و للمريد.

٨- فكرة الكرامات و أن الشخص يبقي عنده قدرات خاصه بتجتذب ال ego بتاع الناس جدا، لأن كل واحد بيحب يحس أنه special و عنده "قدرات خاصه مش عند التانيين" و للاسف فيه طرق انا شوفت (أو سمعت) عن ممارسات فيها في رأيي تفتقر لفكرة الصوفيه، و حسيت انها تحولت لمجرد طائفه الناس فيها بتعمل تأليه للشيخ، و بتضحك علي نفسها و شايفه نفسها "عندها كرامات " و بتشوف حاجات ... و كتير من الناس بتفضل في الطرق دي علشان تحس بالشعور بالانتماء لكيان "روحاني" و أنها عندها " كرامات" حتروح لو هي سابت الطرق دي .

٩- لما الناس بتسألني ازاي تعرف الشيخ أو المعلم الروحاني الحقيقي من المزيف ...بقولهم أن في رأيي أن المعلم الروحاني دائما بيشاورلك علي الحاجه ( أو بياخد ايدك لغاية أول الطريق) ، بس مش بيقولك انت حتشوف ايه ...

و لا طالب منك طاعه مطلقه ...

و لا عايزك تمشي وراه و تعامله معاملة الانبياء و الرسل ...

إنما فكرة الطاعه المطلقه، لو فكرة التأليه اللي شيوخ (أو معلمين روحيين ) بتطلبها في رأيي ساعات بتحط علامات استفهام علي مصداقية ( و ووعي) الشخص اللي بيطلبها ...

للاسف الموضوع عميق و من الصعب شرحه في بوست صغير، إنما اتمني أن الكلام يكون فيه فائده شويه للناس اللي مش عارفه حاجه عن الصوفيه ... او اللي عايزه تعرف عنها اكتر ...

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly