خلي عندك ثقه في ربنا

#روحانيات_صوفيه

"و اعلم ان احب ما يطاع الله به... الثقه به" -

#ابن_عطاء_الله السكندري (#الحكم_العطائيه)

خلي عندك ثقه في ترتيب ربنا لحياتك!.

هو اللي خلقك، و خلقها ...و هو اللي ادري بيها و بيك!.

اعمل اللي عليك (و اللي انت شايف انه صح) ..و سيب كل حاجه تانيه علي ربنا!. #منير_الشاذلي

"The best form of obedience to #God ... is to trust Him!" - #Ibn_Ataa_Allah Al Sakandary

Trust in the Divine plan.

He has created life ..and you ..

And He knowns how to handle you both...

Do your job, and let God handle your life . #Monir_El_Shazly

YouTube: Monir El Shazly

Facebook page: @monirelshazlyspiritual

Photo credit: ©Monir El Shazly

اشتغل علي نفسك ...مش اشتغل نفسك !

اشتغل "علي نفسك " ...مش "اشتغل نفسك" !

-----

كنت كتبت من فتره عن الحاجات اللي الشخص محتاجها قبل ما يشتغل في موضوع العلاج النفسي أو الكوتشينج ...و ناس كتيره لقيتها كاتبه عن أهمية أن الواحد يروح لحد يكون مُعتَمَد او معاه شهاده، و ناس كمان قالت إن المفروض يبقي فيه هيئه رقابيه علي المعالجين النفسيين و مدربين الحياه علشان الناس تعرف الكويس من الوِحِش ....

و مع احترامي للكلام ده، إلا أني ماقدرش اقول اني متفق معاه بشكل كبير ...

اولا ، فكرة ان الشخص درس كورسات أو اخد شهادات من منظمه او هيئه دوليه، ماتعنيش خالص أنه معالج نفسي او كوتش كويس ... ده بس معناه أنه "دَرَس" و أخد معلومات، إنما مش معناه أنه حيعرف يستخدمها في الشغل بتاعه...( فيه ڨيديو مهم كنت عملته قبل كده عن "الفرق بين زيادة المعرفه، و تطور الوعي" بيشرح الكلام ده، ححط اللينك بتاعته في اول تعليق !. )

الحاجه التانيه كمان أن كتير من نظام التعليم ، سواء الأكاديمي او الغير اكاديمي بيغلب عليه الطابع التجاري ، و علشان كده فكرة انك تكون "مُعتَمَد" من هيئه أو منظمه حتي لو كانت دوليه، معناها بس أن الشخص درس المناهج بتاعت المنظمه دي، إنما مش بالضروره تعني أنه حيعرف يفيد الناس (او حتي نفسه) بإللي درسه... ناس كتيره بتخش مكتبها (في مختلف المجالات)، و تلاقي الحيطان متغطيه بالشهادات اللي اخدوها، و ماتستفيدش منهم باي حاجه، و في أحيان كتيره بتلاقي كل تعليمهم ده مجرد "شهاده علي الحيطه!"!

الحاجه التالته، فكرة أننا نعمل "هيئه رقابيه" علي المعالجين و مدربين الحياه، هي حاجه شبه فكرة أننا نعمل فحص نفسي للناس المقبلين علي الزواج ...مجرد فلوس رايحه في الهوا ، لأن الموضوع حيقلب في الآخر ل "شهاده حندفع فلوس فيها علشان نطلعها!"

طيب ايه الحل؟

في وجهة نظري أن كده كده، السوق حيغربل نفسه و الناس الكويسه هي اللي حتفضل ... حتي لو ده اخد وقت شويه ...

و من ناحيه تانيه، الشخص اللي عايز يشتغل علي نفسه محتاج يدّي اهميه كبيره لأنه يروح ل حد ناس يعرفهم راحتله قبل كده و شكروا فيه، و جاب معاهم نتيجه"، و مايسترخصش في نفسه ثمن العلاج أو المشوار البعيد!

و مهم قوي أني أكون مستريح للشخص اللي بروحله ..سواء كان بقاله مده أو جديد في المجال ...لأن الشعور بالراحه للشخص بيساعد جدا في العلاج.

كمان مهم قوي أن الشخص مايروحش لأكثر من حد في وقت واحد ... و مايشتغلش علي نفسه بطرق كتيره في نفس الوقت ...

إنما لو قعد شهرين تلاته بيروح لحد من غير ما يبدأ يتحسن، يبقي غالبا ده معناه أن الشخص ده مش مناسب ليه ...

و لازم يعرف أن طريق العلاج النفسي كتير بيبقي فيه شغل علي حاجات صعبه، أنما لو اشتغل عليها و حلها، شكل الحياه كلها و شكل علاقاته و النمط بتاعها كله حيتغير!.

حاجه تانيه مهمه ممكن تساعد علي معرفة الشخص اللي ممكن اروحله، اني اتفرج علي نمط حياته، و الطريقه اللي بيتكلم بيها و بيتعامل بيها مع الناس .

الشخص اللي نمط حياته مش متوافق مع الكلام اللي بيقوله يبقي غالبا شغله حيبقي سطحي (لأنه مانجحش أنه يفيده هو)... و الشخص اللي مش بيحترم الناس، غالبا حيبقي عنده احكام علي الناس اللي بتروحله ...

و الشخص الغضبان (اللي بوستاته دايما غضبانه)، غالبا مش حيقدر يساعدك توصل للسلام النفسي ...لأنه هو نفسه مش عارف يوصلّه !

و اخر حاجه محتاج اقولها...ان زي ما لما التلميذ بيبقي مستعد، المدرس بيظهر ( when the student is ready, the teacher appears) ...

لما الشخص بيكون مستعد، حيلاقي المعالج المناسب ليه أنه يشتغل معاه ...

إنما لما الشخص بيكون مش مستعد( او عنده مقاومه للتغيير) حيلاقي اسباب كتيره تمنعه أنه يشتغل علي نفسه، او حيروح لحد مش حيقدر يساعده !

البدايه دائما بتيجي من الشخص نفسه ...و نيته في أنه يشتغل علي نفسه... مش يشتغل... نفسه !

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly

هل الصدمات بتقوي؟

في واحده من ورش العمل اللي بأعملها ، و بتكلم فيها عن أنماط و مشاكل العلاقات، حد سألني سؤال عن فُرص النجاح في الحياه لشخص كانت علاقته بأهله فيها مشاكل، بالمقارنة بفرص النجاح لشخص علاقته بأهله كانت "مثاليه" (رغم اني مش مقتنع بأن فيه علاقه مثاليه ) ...

و كانت اجابتي أن الشخص اللي مر بتجارب صعبه مع أهله عنده فرص نجاح اكبر من الشخص التاني، بشرط أنه تعافي من التجارب الصعبه دي، و فتح قلبه لأهله! ......

و هنا حابب اتكلم عن #لام_شمسيه .. و المره دي حتكلم علي #علي_قاسم في واحد من أقوي أدواره لغاية دلوقتي ...

كنت دائما بقول أن الطبيب النفسي في الافلام مش واخد حقه، و دائما دوره للاسف مابيبقاش مرسوم كويس ...و ردود أفعاله بيبقي فيها "حاجه مش طبيعيه " ... لغاية ما شوفت دور علي قاسم في المسلسل ...

اداء هايل ، و هدوء و سلام نفسي (اللي المفروض أن اي معالج نفسي يتمتع بيهم) ...و كمان اختيار مناسب جدا للكلام ...

حتي في الفقره لما #احمد_السعدني سأله : "هل الصدمات بتقوي؟"

رد فعله و اختيار كلماته كان هايل ...لأن فعلا زي ما قال : " لأ الصدمات مش بتقوّي، الصدمات ممكن تكسر أو تدمّر البني آدم، التعافي من الصدمات هو إللي بيقوّي..

هو إللي بيدّي الشخص ثقة بإنه يقدر يتعامل مع أي موقف."

تفصيله صغيره ...إنما الفرق كبير جدا ...

علشان كده ناس كتيره لما بتجيلي بتسألني هل ممكن ارجع زي الاول ؟ و دائما بقولهم " لو قررت انك تتعافي، (و ماتلعبش دور الضحيه)، حتبقي شخص احسن من الاول ...شخص عنده وعي اعلي و ثقه اكبر في قدراته علي التعامل مع الحياه ... إنما لو قررت انك تِصعَب عليك نفسك ... حتفضل تعاني ...و الاختيار بتاعك انت "

الجميل كمان أن المسلسل أظهر المعالج النفسي في صورة بني ادم، ممكن يتأثر بالناس اللي بتجيله، بس عنده القدره علي أنه يعرف نوع المشاعر و التعبيرات اللي ممكن يخرجها قدام المريض ...و ايه ماينفعش أنه يخرجها . ( و بالمناسبه، لو المعالج اتأثر بشكل كتير فده في الغالب معناه أنه لسه عنده صدمه ماقدرتش يتغلب عليها ) ...

اداء رائع من علي قاسم الحقيقه

شكرا لكل صناع العمل ..من اول #مريم_نعوم للمخرج #كريم_الشناوي ...مرورا بكل ابطال العمل ..اللي تفوقوا علي نفسهم الحقيقه ...

(إعادة نشر )

#منير_الشاذلي

https://www.instagram.com/reel/DGn8jLQNcG3/?igsh=MWtoZGZ3a3o5ejlyZw==