توأم الروح ...و صدمة ما بعد العمره !

واحده من الافكار المدمره اللي اتصدرت لينا من و احنا صغيرين، و ناس كتيره اتأثروا بيها ( خصوصا البنات ) ..هي فكرة #TheOne أو #mrperfect #missperfect ...

و معاها مفهوم #توأم_الروح (#soulmate) اللي ربنا كاتبهولك علشان "يعوضك" عن كل اللي قبله ...

الشخص المثالي اللي مفيش فيه غلطه ... الشخص اللي فيه بيني و بينه "اتصال روحي" و بيحس ببيا من غير ما اتكلم و بيعرف انا عايزه ايه من غير ما اعبّر عنه....الشخص اللي بيقطع الخس زيي بالطول مش بالعرض و بيحب يحط كرفس علي السلاطه و مشروبه المفضل هو عصير التوت البري !

الشخص اللي من اول ما شافني قال "هي دي" و عايز يتجوزني بعد شهر من ما عرفنا بعض ... و نزل علي ركبه قدام الناس علشان يقدملي الدبله !

أو البنت اللي عرفت اننا الشخص اللي عايزاه يكمل معاها حياتها من اول دقيقه شافتني فيها، و نفسها أن انا و هي نعيش مع بعض علي جزيره لوحدينا علشان تعوضني عن كل اللي مريت بيه في حياتي و تعرفني "معني الحب" !

و للأسف ناس كتيره (بنات و اولاد) بيفضلوا يحلموا بالحلم ده ..حتي و هم كبار !

و طبعا الحلم ده بيخلي الناس تقع فريسه لشخصيات عندها عقد نفسيه او مشاكل نفسيه (زي الاضطرابات النرجسيه مثلا) ، و مشاكل نصب و احتيال (زي كريم في المسلسل كامل العدد) ...و كل ده علشان انا مقتنعه ( أو مقتنع) "اني اخيرا لقيته/ لقيتها !".

هل ده معناه أن مفيش ناس كويسه ؟ ...لا طبعا فيه ...فيه ناس جميله كتيره، بس مفيش حد مثالي، الفكره كلها في اننا نشوف الحاجات اللي مش كامله في الناس و نقبلهم بيها ...(أو مانقبلهومش لو الحاجات اللي مش موجوده دي اساسيه بالنسبالنا!).

إنما فكرة الشخص المثالي أو #العوض اللي ربنا حيعوضني بيه علشان اتأذيت قبل كده، أو علشان رحت عملت عمره أو دعيت في رمضان (من غير ما اشتغل علي نفسي و مشاكلي النفسيه اللي مأثره عليا ) دي فكره خياليه ... و الاقتناع بيها بيخلي الناس تتعرض لكتير من المشاكل اللي ذكرتها هنا ...

المشكله اننا لما بنكون عايزين نقتنع بحاجه جدا ، مش بنشوف غيرها، و عقلنا بيقفل لكل ال #redflags ( علامات الخطر) اللي بنشوفها...و بنبقي بس مركزين علي الحاجات اللي عايزين نشوفها، و متخيلين أن "ربنا استجاب لدعوتي " لدرجة أن فيه صديقه ليا مسمياها #صدمة_ما_بعد_العمره ...او #صدمة_ما_بعد_رمضان ☺️

قبل ما ندوّر علي الشخص المثالي ، لازم نشتغل علي نفسنا علشان نكون أشخاص متزنين نفسيا ... و ساعتها حنلاقي ناس متزنه نفسيا نعرف نقرب منها ...

و حتي لما نلاقي ناس جميله ...محتاجين ناخد وقتنا في اننا نعرفهم و نشوفهم في حياتهم العاديه و في مواقف كتيره و هم متضايقين و و هم متنرفزين ...و نتفرج عليهم بيعاملوا الناس اللي أقل منهم ( اجتماعيا أو ماديا ازاي ) ... حاجات كتيره ممكن تبين لنا الشخص اللي معانا مناسب و لا لأ ...و متزن و لا لأ

و الوقت هو اكتر حاجه بتبين كده !

#منير_الشاذلي

* شكرا #صدقي_صخر علي التجسيد الجميل لشخصية كريم في مسلسل #كامل_العدد +١

YouTube: Monir El Shazly

Facebook page: @monirelshazlyspiritual

Instagram: monir.elshazly

• 

عن رمضان ...و التعلق.. و التخلي!

عن #رمضان ...و #التعلق.. و #التخلي!

----

ناس كتيره اتكلمت في موضوع #الصيام و ليه ربنا دائما أشار ليه في كل الديانات، ناس قالت علشان التكافل و ناس قالت علشان الشعور بالفقير، و ناس قالت علشان صحة الجسم ...و ناس قالت "علشان ربنا قال كده !" ...

و مع اتفاقي أو اختلافي عن الآراء دي، إلا أن في رأيي أن اهم حاجه في الصيام هو تعلم مفهوم عدم التعلق ( التخلي)

في رأيي أن واحده من اهم دروس الصيام أنه بيعلمنا ازاي نتخلي عن الحاجات ...علشان التعلق ( #attachment ) هو أهم و اكبر أسباب التعاسه في الحياه ... و ان القدره علي التخلي عن الحاجات ( giving things up) بتدينا قوه كبيره و بتأثر بشكل مباشر علي قدرتنا علي الاستمتاع بالحياه ...

في رأيي أن الصيام بيعلمنا القدره دي (حتي لو بشكل مؤقت)، و ان دي واحده من اهم الفوائد بتاعته.

و علشان اهمية الموضوع ده، قررت اكتب عن مجموعه من الحاجات اللي لو قدرنا نتخلي عنها ممكن تدينا قدر أكبر من الحريه في الحياه و تساعدنا علي الاستمتاع بيها اكتر :

1. اتخلي عن حاجتك انك تكون دائما على حق (و تقنع الناس بكده)

2.اتخلي عن حاجتك انك تكون دايما مُسيطر (علي حياتك، علي اولادك... او علي اي حد)

3. اتخلي عن اللوم.

عن لوم الناس التانيه، لوم شريكك في الحياه... لوم الظروف... لوم ولادك علي اختياراتك في الحياه علشان فاكر ان كده في مصلحتهم – حتي لو ماعبرتش ليهم عن اللوم ده ...

4. اتخلي عن النظر لنفسك او لحياتك بشكل انهزامي و تَصور انك ضحيه!

"#العقل هو أداة رائعة إذا استخدمته صح، انما لو استخدمته غلط ،ممكن يبقي اداه مدمرة " - ده مش كلامي، ده كلام إيكهارت تول Eckhart Tolle

5.اتخلي عن قناعاتك القديمه عن ايه اللي ينفع و ايه اللي ماينفعش... ايه اللي ممكن، و ايه اللي مش ممكن. حاجات كتيره ممكن تبان صعبه، و بتبقي اسهل لما نبتدي!

6.اتخلي عن الشكوى.

بدل ما تشتكي...شوف ازاي ممكن تغير حياتك...او تغير نظرتك لحياتك، و ابتدي من دلوقتي!

7.اتخلي عن النقد.

بدل ماتنقد الناس التانيين، و حياتهم و طريقة تفكيرهم... وفر طاقتك لنفسك. الناس السعيده ماعندهاش وقت تنتقد الناس التانيه...لأن وقتها بتقضيه في الاستمتاع بالحياه!

8. اتخلي عن مقاومتك للتغيير (او الخوف منه ).

الحاجه الثابته في الدنيا هي التغيير... و علشان هو حيحصل حيحصل...امشي معاه بدل ما تمشي ضده!

9. اتخلي عن حاجتك انه تسمّي كل حاجه ... و تحطها في اطار معين... علشان تحكم عليها . (مش كل الناس عندها نفس المفهوم عن الحب، أو الصداقه أو الامانه او حتي عن ربنا!... مُسَمَيات الحاجات مش هي حقيقتها !)

10. اتخلي عن أعذارك اللي بتستخدمها علشان تقنع نفسك ان حاجه مش ممكنه او صعبه

11.اتخلي عن الماضي اللي فات ...لأن عمرك ما حتروح هناك تاني . الحظة دي (الحاضر) هي كل اللي عندك.... استمتع بيها ... و اشتغل منها علشان تغير حياتك.

12. اتخلي عن رغبتك في التعلق بأي حاجه او حد . التعلق بييجي من #الخوف ..اما #الحب الحقيقي ...فهو حب غير مشروط. - غير مشروط بمده... بشكل... أو بتَوَقُع منك ان الشخص او الحاجه اللي بتحبها تفضل علي طول زي ما هي. الناس اللي بتقدر تحب من غير ما تتعلق هي اكتر ناس عندها سلام نفسي و سعاده في علاقاتها.

13. اتخلي عن تعريفك لنفسك من خلال شغلك، مكانك، ديانتك، عربيتك، مستواك العلمي...نجاحك او حتي فشلك في حاجه! ... الحاجات دي كلها أدوار انت بتلعبها.... بس انت الشخص اللي بيلعب الأدوار دي! و كل ما تعرَّف نفسك من خلال ادوارك دي بس، كل ما حتحس بالخوف و كل ما الايجو بتاعك حيسيطر عليك!

14. اتخلي عن شعورك بالمسئوليه عن الناس التانيه (أو عن اختياراتهم في الحياه!).

الناس الوحيده المسئوله منك مسئوليه تامه هم اولادك و هم صغيرين ... و بعد كده المسئوليه عنهم بتقل مع الوقت لما يكبروا... إنما شريك حياتك انت مش مسئول عنه ( انتوا بس مسئولين مسئوليه مشتركه عن حياتكم مع بعض و عن اولادكم)... غير كده أن مش مسئول عن قرارت حد تاني في الحياه ( حتي لو فاكر انك بتعرف اكتر منه أو فاهم #الحياه اكتر منه)

ده مش معناه انك ماتساعدش حد لو احتاج مساعده او ماتنصحش حد لو طلب منك النصيحه، أو معناه انك ماتساعدش أهلك لما يكبروا ، إنما فيه فرق كبير بين اني اساعد (to help or #support ) و بين اني احس بالمسئولية عنهم أو عن قراراتهم ( #responsibility )....

لأن تحمّل #المسئوليه معناها ان يكون من حقك انك تاخد قرار، إنما لو بقيت مسئول عن حد مش دورك انك تاخد القرار بالنيابه عنه، حتبقي ببساطه بتبوّظ علاقتك بيهم و ...بتجنن نفسك !

15. و اخر حاجه...اتخلي عن التوقعات ( #expectations )! ... توقعاتك من الناس (المفروض يعملوا ايه و مايعملوش ايه) و اتخلي عن انك تعيش حياتك حسب توقعات الناس منك!

انت مش محتاج تثبت حاجه لحد، لا لأهلك و لا لشريك حياتك و لا لأصحابك و لا لأي حد... انت الوحيد اللي ممكن يعرف ايه المناسب ليك دلوقتي، و ايه الطريق اللي انت محتاج تاخده. اسمع للناس التانيين، بس دايما اتأكد ان الصوت اللي جواك عالي و مسموع ... و صَدَّقُه 😇

بيتهيالي تجربة الصيام و الامتناع عن حاجات بنحبها أو متعودين عليها، ممكن تعرفنا ...اننا ممكن نتخلي عن حاجات متعلقين بيها ...علشان حياتنا تبقي احسن

(إعادة نشر)

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

بين الراحه و الخوف ...و المعرفه !

#روحانيات_صوفيه - بين الراحه و الخوف ...و المعرفه ! .

"بغبغان عايش براحته و لوحده في القفص الذهبي.

بيحلم بالحرية بس خايف من الخطر اللي حييجي معاها .

لأنه في النهاية ، لو عايز يهرب، لازم يخاطر بكل حاجه هو متعود عليها ...

وده بالظبط اللي بيعمله معظم الناس ...

نفسهم في حياه تانيه ...

بس خايفين يخسروا الحاجه اللي اتعودوا عليها ..في الحياه اللي مش عاجباهم !

قصه من كتاب " منطق الطير " - للشاعر الصوفي فريد الدين العطار

A parrot lives comfortably in a golden cage.

It dreams of freedom but fears losing its safety.

Eventually it must risk everything to escape.

This represents the human attachment to comfortable prisons.

A short story from the book " The conference of the birds " - by #Attar

YouTube: Monir El Shazly

Facebook page: @monirelshazlyspiritual

Instagram: Monir.elshazly