كل اللي بييجي في حياتك لازم يجيلوا يوم و يروح... سواء كان كويس او وِحِش!.
اتفرج عليه... استمتع بيه... اتعامل معاه... بس ما تتعلقش...
و ماتتخيلش انه حيستمر علي طول!
Everything in your life comes and goes...
stay centered!. #Monir_El_Shazly
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
ناس كتير بتسألني مستغربه ازاي انا قادر احط بوستات فيها ايجابيه و نظره مختلفه للحياه مع كل الصعوبات و الازمات الاقتصاديه اللي العالم و مصر بتمر بيها علي مختلف المستويات و الطبقات... ناس منهم معجبين باللي انا بأعمله... و ناس تانيين شايفين اني *منفصل عن الواقع* و عايش في مكان تاني 😊 .
و الحقيقه ان الاجابه علي السؤال ده بسيطه جدا... "انا باختار الحاجات اللي اركّز فيها و الحاجات اللي انا مأضيعش فيها وقتي".
هل الحاله صعبه؟... اه..
هل الوضع حيستمر؟ ... معرفش.
هل انا في ايدي حاجه اعملها علشان اغير في الكساد الاقتصادي و الاسعار اللي ارتفعت ؟ .. لأ ...
يبقي مش حضيّع وقتي في الهريّ او الخوف من اللي حيحصل... و حركّز في اللي ممكن اعمله علشان ماابقاش سبب في ان المشكله تزيد .... و اساعد الناس اللي ممكن تكون الظروف الصعبه اثرت عليهم نفسيا (من خلال شغلي) او ماديا (لو عندي القدره)!
الفكره هنا تتضمن مفهومين مهمّين و مرتبطين ببعض، "الحياه في اللحظه" (living in the now).. مش في "امبارح كان عامل ازاي".. او "بكره حيحصل فيه ايه" ...
و المفهوم التاني هو التخلي (#detachment)... و ده معناه ان الواحد مايتعلقش بحاجه كانت موجوده.. او بتصوّر معين و يتخيل أن الحياه المفروض تكون كده... و مايركزش تفكيره في الحاجات اللي مش في ايديه ( زي الامراض و الوفيات و الاسعار اللي بتزيد ...و الحاجات دي).. و يركّز تفكيره في الحاجات الحلوه اللي في حياته و النِعم اللي ربنا اداهاله و لو في أيده حاجه ممكن يغير بيها وضع مش عاجبه !
هل انا اتولدت بالتفكير ده ؟... لأ.
بس اشتغلت علي نفسي لغاية ما وصلت لطريقه معينه للحياه و التفكير مريحاني :-)
و المهم في الموضوع اني عارف ان الرزق بتاعي حيجيلي في اي حته.. و بأي شكل، و أن حياتي ليها قدر معين... لا التغيرات الاقتصاديه، ولا الكساد و لا اي حد ممكن ياخد الرزق اللي ربنا كاتبهولي منّي.
و ده في حد ذاته فكره مريحه و مخلياني اقدر اركز الي الحاجات الحلوه في حياتي .. و احمد ربنا عليها!
صباحكم جميل !
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
استمتعوا بالحياه...
----
الفيس بوك رجع تاني و اتملي بالدعاء بتاع "الموت فجأه في ساعة الغفله" ، و البوستات بتاعت "لو مت فجأه افتكرولي حاجه حلوه" رجعت تزيد تاني ...
انا بس احب اقول ان #الموت جايّ جايّ!، فبدل ما نقعد نترعب و نخاف منه... ليه مانحاولش نستمتع بالحياه احسن؟
لأن #الحياه الكئيبه اللي كلها خوف و رعب و شعور بالخزيّ، الموت احسن منها!
احنا محتاجين نغيّر مفهومنا الخاطئ الخايف المرعوب عن الدين و عن ربنا..
ونستمتع بالحياه اللي ربنا اداهالنا... و بالناس الجميله اللي حوالينا... و نسيب الموت ييجي وقت ماييجي طالما اننا مستريحين و راضيين و شاكرين ربنا علي حياتنا!.
و زي ما قال جلال الدين الرومي : "كل نفس ذائقة الموت، اما الحياه، فلا تتذوقها كل الأنفس !"
(إعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
