- Monir El-Shazly
- Jul 5, 2024
#نصيحه لكل واحده عايزه تدخل في علاقه عاطفيه مع راجل...
و كل راجل عايز يدخل في علاقه عاطفيه مع ست!
-------
بحكم طبيعة شغلي ، و بحكم ان معظم الناس اللي بتجيلي علشان تشتغل علي نفسها ستات. فيه ناس كتير بيسألوني عن #العلاقات_العاطفيه و #مشاكل_العلاقات_العاطفيه .... و رغم اني بصفه عامه بأشتغل مع الافراد لوحدهم (individuals ) وما بشتغلش مع couples الا ان فيه نصيحه عامه لكل واحده او واحد قبل ما يخش في علاقه عاطفيه!
لو لقيتي الراجل اللي انتي معجبه بيه *بيتكلم وِحِش عن امه...، او مابيحترمهاش*.... اطلعي اجري علي طول ( لأن ببساطه لو هو مابيحترمش امه او دورها في الحياه يبقي عمره ما حيحترم اي ست!)
و لو لقيتي علاقته بأمه فيها اعتماد كبير عليها *(مابياخدش قرارات من غيرها ، او هيّ اللي بتقولّه يعمل ايه و مايعملش ايه)* يبقي اعرفي انك داخله في علاقه احتمالية نجاحها ضعيفه جدا (و برضو اطلعي اجري 😊 ).
الاحتمال الاكبر لنجاح العلاقه مع اي راجل انه يكون بيحترم امه ، بس علاقته بيها مافيهاش تعلّق زايد ، و ده مش شرط معناه انه حيبقي هو التوأم الروحي بتاعك و ان الحياه حتبقي وردي معاه... معناه بس ان اساس شخصيته مافيهوش عقّد مع الستات ، فالعلاقه حيبقي ليها نسبة نجاح كويسه
الكلام ده ينطبق علي الستات بردو ( و نظرة الست لأبوها و احترامها ليه)..
لو الست نظرتها لأبوها أنه *ماكانش موجود، أو ماداهاش كفايه* ... يبقي غالبا حتحاول تاخد اللي ابوها ماداهولهاش منك انت، و علي الرغم من أن رجاله كتير بتحب تلعب الدور ده في الاول (دور الحامي و المنقذ) إلا أن الدور ده اكبر من ان اي راجل غير الاب يلعبه، و دائما حيحسس الراجل أن طلباتها كتيره و انها *متشعلقه فيه بزياده و خانقاه*
و كمان لو نظرة الست لأبوها فيها *تقديس* زائد عن الحد ، و شعور أن ابوها مفيش ولا حييجي زيه، يبقي فرصة الراجل اللي معاها حتبقي شبه معدومه، لأنه دائما حيسقط في المقارنه مع الاب، و دائما حتحسسه أنه مقصر معاها ! (فبرضو محتاج يطلع يجري ! )
الكلام ده قاعده عامه، و طبعا لكل قاعده استثناءات؟.. ...... بس انا الحقيقه من سنة ٢٠٠٨ ( من ساعة ما ابتديت اشتغل في الكلام ده) ما صادفتش اي اختلاف عن القاعده دي! 😁
ببساطه شديده، احتمالية نجاح أي علاقه عاطفيه بتزيد جدا لما بيكون البنت علاقتها بأبوها كويسه (بدون تعلق بيه) ، و الولد علاقته بأمه كويسه (بدون تعلق)..
و طبعا الافضل لو العلاقه مع الام و الاب كويسه في الحالتين!
طبعا فيه مؤثرات تانيه، بس بشكل مبسط، ده بيمثل اساس قوي ممكن العلاقه العاطفيه تتبني عليه!
و رأيي الشخصي لكل واحده فاكره ان الراجل اللي عارفاه ده حيبقي هو المختلف عن القاعده ، و لكل واحد فاكر أنه حيكون المنقذ و فارس الاحلام اللي حييجي ينقذ البنت الغلبانه و يعوضها عن مشاكلها مع ابوها و يكون لها الاب و الام و الاخ و الصديق و كل الكلام بتاع الافلام ده .... " كل الناس اللي لبسوا في الحيطه كانوا فاكرين زيك كده " 😉
(اعادة نشر)
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
