عن نهاية العلاقات

عن نهاية العلاقات!

-----

مفيش شخص كويس علي طول الخط أو وِحش علي طول الخط ...

حتي الإنسان اللي أفعاله غالبا مؤذيه، ساعات بيعمل أفعال مختلفه عن العادي بتاعه ... و حتي الإنسان اللي بيميل أنه يكون "طيب" ممكن يكون مؤذي ساعات ...

كل إنسان ليه دوافعه اللي ساعات بتخلي تصرفاته ممكن تؤذي شخص معين، في وقت معين علي الرغم من أنه مش بالضروره يكون ناوي يأذيه أو يضره بالافعال دي.

ناس كتيره بتجيلي في شغلي و بتسألني "ليه فلان عمل كده؟" او "ازاي شخص معين هان عليه يعمل فيهم كده!"، و دائما بتكون اجابتي أن الناس مش مُسطَحَه ... و الدوافع اللي بتخليهم يعملوا حاجات معينه، ممكن تكون اكتر من دافع عكس بعض و في وقت واحد، و مش شرط حنعرف الدوافع دي كلها...

علشان كده أننا نستني موضوع ال "#closure" او "اللقطه الختاميه" اللي بتقول ليه حد عمل كده او اتصرف بالشكل ده، او أننا نستني الشخص ييجي يقول "انا اسف" و "يعترف بكل حاجه عملها"، دي لقطه غير منطقية و ممكن تخلينا نضيع عمرنا في الانتظار، بدون ما تحصل... لأن في أحيان كتيره حتي الشخص نفسه اللي قام بالفعل ساعات مابيبقاش عارف هو عمل كده ليه، و ساعات بيبقي اصلا مش مهتم أنه ييجي يعتذر أو يشرح!.

لو العلاقه مش مريحه ..و بقالها كتير مش مريحه لينا، او لو حاسّين أننا بنحط فيها مجهود اكتر بكتير من اللي الشخص التاني بيعمله، او أن اللي بنعمله مش متقدر كفايه من الشخص التاني و دائما بيحاول يحسسنا بالتقصير، يبقي احنا اللي لازم ناخد الخطوه و نطلع براها، من غير ما نستني الشخص التاني ييجي و يشرح أو يفسر !

الحل في النهايات بيبقي دايما عندنا، مش عند اي حد تاني، و لما بنعرف نوصلّه و نوصل لسلام نفسي مع اللي حصل، ساعتها بس النهايات، بتتحول لبدايات لقصص جديده!

#منير_الشاذلي

* الكلام ده ينطبق علي كل العلاقات، ماعدا العلاقه مع الام و الاب!

YouTube: Monir El Shazly

Facebook page: @monirelshazlyspiritual

Instagram: monir.elshazly

خلي بالك مين تختاره علشان يساعدك !

خلي بالك مين اللي تختاره علشان يساعدك!

---

“يوجد معلمون مزيفون و شيوخ مزيفون في هذا العالم أكثر عددًا من النجوم في الكون المرئي. فلا تخلط بين الأشخاص الأنانيين الذين يعملون بدافع السلطة وبين المعلمين الحقيقيين. فالمعلم الروحي الصادق لا يوجه انتباهك إليه ولا يتوقع طاعة مطلقة، أو إعجابًا تامًا منك، بل يساعدك على أن تقدّر نفسك وتحترمها. إن المعلمين الحقيقيين شفافون كالبلور، يعبر نور الله من خلالهم”. - #شمس_التبريزي

لما تحس بالذنب ..او تحس انك خجلان من نفسك، او تحس ان فيه مؤامره عليك من الكون ( معمولك عمل أو محسود علي طول )... أو تحس علي طول انك ضعيف و انت قاعد مع ناس انت رايحلهم علشان يساعدوك (معلمين .شيوخ، معالجين نفسيين او مدربين حياه او حتي اصدقاء) ، ده دلاله علي أنهم مش حيساعدوك قوي! الشخص اللي حيساعدك بجد هو شخص حيعلمك تحب نفسك، تحترمها وتقدرها و في نفس الوقت تتحمل مسئولية حياتك و تعرف أن حياتك دي أن ممكن تغير فيها حاجات كتيره، لما تغير نظرتك ليها و للحاجات اللي حصلت فيها ... و تعرف تشوف الجمال اللي جواك و اللي حواليك ... و تسمع صوت روحك و تقرب منها!

#منير_الشاذلي

"There are more fake gurus and false teachers in this world than the numbers of stars in the visible universe. Don’t confuse power-driven self centred people with true mentors. A genuine spiritual master will not direct your attention to themselves and will not expect absolute obedience or utter admiration from you, but instead will help you to appreciate and admire your inner self. True mentors are as transparent as glass. They let the Light of God pass through them." - #ShamsTabrizi

Whenever you feel ashamed of yourself, weak or guilty in the presence of some teachers (gurus, therapists, coaches... Etc), know that they are not authentic. A true spiritual teacher will help you love and appreciate yourself.. because there within, you will find your truth. #Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

علاقه صحيه بعد الطلاق

بعد الكلام اللي كتبته امبارح عن ان الحياه الزوجيه محتاجه مجهود من الاتنين لنجاحها، و ان نهايتها مش معناها فشل، علي قد ما معناها أن ماكانش فيه توافق و أن احسن لكل واحد فيهم (و للأولاد) أنهم يتطلقوا و يحترموا بعض، جالي تعليقات كتيره (معظمها من ستات ) علي أن الرجاله لما الطلاق بيحصل مابتبقاش عايزه تصرف علي اولادها، و ان ده أحد أسباب أن الستات بتخاف تتطلق!

و الحقيقه اني بأسمع الكلام ده بقالي كتير من كلاينتس عندي و بحس انه كلام متاخد مُسَلَّم بيه، علي الرغم إن من واقع اللي انا بشوفه في المواضيع دي، مش كل الرجاله بيتصرفوا كده... طبعا فيه جزء منهم بيتصرف كده، إنما في الحقيقه فيه جزء كبير بيبقي مستعد يصرف علي أولاده ويربيهم كويس، المشكله بتيجي لما ساعات الست بتبقي عندها تصوُر معيّن للي الراجل *المفروض* يصرفه و *نوعية التعليم* اللي المفروض يدخل *اولادها* فيه!

و كتير من الستات اللي بتقول الرجاله مش عايزه تصرف، بتتكلم عن الاولاد بصيغة "اولادي " ، كأن الأب مالوش دعوه بيهم غير أنه يصرف و يشوفهم مره في الاسبوع .

طبعا لما ده بيحصل الاب بيعاند، و الست بتعاند... و المتضرر الاساسي بيبقي دائما الاولاد.

لأن حتي لو الست قررت تتكفل بالأولاد و مصاريفهم، فده بيحط عليها ضغوط كبيره جدا بتأثر علي علاقتها بأولادها و علي توقعاتها منهم لما يكبروا... و من الناحيه التانيه بتبعد الاولاد عن الاب، و بتطلعهم عندهم شعور أن الاب ده مقصر و أنهم محتاجين ياخدوا صف أمهم قدام ابوهم... و ده طبعا بيسبب مشاكل كتيره نفسيه للاولاد بعد كده في حياتهم، في اختياراتهم العاطفيه و الزوجيه، و حتي ساعات في أن الاولاد يبقوا اكتر عرضه أن يبقي عندهم مشاكل الإدمان (بإختلاف أنواعه) !

في رأيي الشخصي، أن نوعية المدارس و الدراسه اللي الاولاد حياخدوها مهمه، و لكن مش في أهمية أنهم يطلعوا في علاقه كويسه مع ابوهم و امهم، و ان الصحه النفسيه و السلام النفسي للأبناء، اهم ميت مره من المدرسه اللي حيروحوها و النادي اللي حيلعبوا فيه.

إنما للاسف كتير من العلاقات بتنتهي بنوع من أنواع الطمع و العِند عند الطرفين أنهم يطلعوا بأكبر منافع ماديه ممكنه (او يقللوا الخسائر الماديه) و المتضرر الأكبر هو الاولاد... اللي من حقهم يكونوا علي علاقه كويسه بأبوهم و أمهم... حتي لو كان ابوهم و أمهم ماعرفوش يكملوا في جوازهم مع بعض!

#منير_الشاذلي

* قبل ما حد يبعتلي يقوللي إن الكلام ده مش واقعي و أنه عمره ما بيحصل، احب اقول اني بشوف حالات زي كده بقالي اكتر من ١٥ سنه، و ان إمكانية ان الطرفين يبقوا محترمين مع بعض امكانيه كبيره، بشرط أن الطرفين يبصوا لمصلحة الاولاد النفسيه، قبل مصلحتهم الماديه... و يطلعوا الطَمع و الرغبه في الانتقام من بعض من المعادله ( و ده طبعا بيبقي اصعب بكتير لما العلاقه بتفضل فيها مشاكل لمده طويله ..لأن ساعتها الرغبه في الانتقام بتزيد!)

YouTube: Monir El Shazly

Facebook page: @monirelshazlyspiritual

Instagram: monir.elshazly