- Monir El-Shazly
- Nov 28, 2024
دروس كل ام محتاجه تعلمها لبنتها و هي بتكبر !
١- مش مشكله أنها تكون شكلها حلو او ان الرجاله تُعجب بيها، المهم انها تعرف أن ذكائها في التعامل و ثقتها في نفسها (و روحها ) هي نوع الجاذبيه اللي ممكن يستمر!
لما تشتغل و تطور من نفسها، و تتخلص من مخاوفها و من محاولة إرضاء الناس ...ده هو اللي حيخليها جذابه و حيساعدها في حياتها بصفه عامه و في علاقاتها بصفه خاصه !
٢- من حقها تقول "لأ" لو حاجه مش عاجباها، من غير ما تحس بالذنب أو أنها محتاجه تشرح نفسها أو تبرر موقفها.
و لو حد اتضايق من الحدود اللي هي حاطاها ، فدي مشكلته هو ...و هي مش مضطره تبررله و لا محتاجه تشرحله أو تقنعه ! لأن اكبر حمل ممكن الإنسان يتخلي عنه، هو الحمل بتاع "إرضاء الناس علي حساب النفس " !
٣- انها مش محتاجه تعمل زي ما الناس بتعمل علشان تبقي cool و مقبوله ...
لو هي عندها ثقه في نفسها و في اختياراتها، الناس حتحترم اختياراتها حتي لو مختلفه عنهم !
٤ - لازم تعرف أن فيه وقت حيبقي عندها أصحاب ..و وقت ممكن تتخدع في اصحاب تانيه ...
وقت حتقع فيه في أخطاء ...و حتتعلم منها
وقت حتحب حد ...و وقت ممكن تتألم لما الشخص يمشي...
وقت ممكن تنسي فيه نفسها ...بس ترجع تاني تلاقيها ...
و ان الحياه عباره عن خبرات و تجارب بنمر بيها ...إنما المهم انها تعرف قيمة نفسها و ماتسمحش لأي حد أو اي تجربه أنها تقلل منها، أو من نظرتها لنفسها !
٥- قبل ما تفكر تتجوز ...لازم تدور علي شخص من مستوي ثقافي و اجتماعي و مادي متناسب معاها ...
و محتاجه تتكلم معاه في شكل الحياه، اسلوب تربية الاولاد، اسلوب الصرف، مين المسئول عن البيت ماديا ، و نوع المسئوليات المشتركه بينهم في تربية الأطفال ... عن طموحات الشغل و المشاكل النفسيه اللي مر بيها ..و كمان مفاهيمه عن المرأه و دورها في الحياه !
مش بس كده، لازم يكون الشخص عنده قناعات مشابهه ليها عن ربنا و عن مفهوم التدين..و عن الأفكار اللي حيحبوا يدوها لأولادهم
٦- لازم تعرف انها محتاجه تكون مستريحه مع نفسها (حتي لو محتاجه تتعالج نفسيا من صدمات مرت بيها ) قبل ما تقرر تخلف ...
علشان ماتسببش لاولادها مشاكل يتعالجوا بسببها!
٧- و في النهايه ...لازم كل ام تعرّف بنتها أنها ممكن تلجأ ليها في أي وقت ..مهما حصل ...و ان حبها ليها موجود ...و مفيش حاجه ممكن تغيره ...خالص!
(منقول - مع تغيير )
YouTube: Monir El Shazly
Facebook page: @monirelshazlyspiritual
Instagram: monir.elshazly
