لكل شخص ماكانش متدلع !

الكلام ده لكل شخص حاسس ان اخوه او أخته كان متدلع اكتر منه ... او متفضل عليه! ...

علي الرغم من أن فكرة العدل في التعامل مع الأولاد فكرة جميله، الا أنها في أحيان كتيره فكره خياليه ...

و حتي الاهل اللي بيحاولوا يعدلوا في التعامل مع اولادهم ، ساعات بيكون عندهم ميل لواحد اكتر من التانيين (لأسباب كتيره مش مجال ذكرها هنا )، و الامثله كتيره هنا، و أشهرها قصة سيدنا يوسف و يعقوب أبوه (و الاتنين كانوا أنبياء) و طبعا في المجتمعات الذكوريه بيحصل تفضيل للولد عن البنت من البدايه!

المهم أن اولاد كتيره من الأولاد اللي مش متدلعه (الغير مميزين عند الاهل ) بيطلعوا عندهم غضب من اهلهم، و شعور بأنهم *محتاجين يعملوا حاجه زياده* علشان اهلهم يرضوا عنهم ( و طبعا ده يفسر ليه بنات كتيره بتقع في شخصيات عندهم صفات نرجسيه كتيره ... و بيحاولوا يساعدوهم و ياخدوا بأيديهم،و علشان كمان بيحاولوا ياخدوا منهم الاهتمام اللي مااخدوهوش من اهاليهم).

الاخبار السعيده هنا بقي، ان الابناء العاديين (اللي مش مميزين عند اهلهم ) غالبا بينجحوا في حياتهم العملية اكتر و بيبقوا شخصيات متحمله للمسئوليه، اما الاولاد المتعوده علي الدلع ، ففي معظم الأحيان بيواجهوا مشاكل كبيره في الحياه العمليه، و بيبقوا محتاجين الناس *تدلعهم* زي ما اهلهم عملوا!

مش بس كده، ده كمان كنت بتكلم مع صديقه ليا في مجال العلاج النفسي علي الموضوع ده، و قالتلي انها قرأت بحث بيقول ان الابناء الغير مميزين عند اهلهم، غالبا بيبقوا اكتر سعاده لما بيكبروا من الأبناء المميزين (المتدلعين)، بس طبعا ده بيحصل، لما بيوصلوا لسلام نفسي مع أهلهم...و مع طريقة تربيتهم !

فلكل واحد ماكنش متدلع، غالبا عدم دلعك ده، حيكون سبب في نجاحك في حياتك (طالما ماعملتش من نفسك ضحيه و بنيت لنفسك هويه من كده)

و لكل واحد كان متدلع، ماتتوقعش أن الدلع اللي اخدته و انت صغير حيستمر، محتاج تعود نفسك انك تشيل المسئوليه... علشان اللي شوفته في البيت و انت صغير ده *حماده* ، و اللي بره البيت *حماده تاني خالص*! 😊

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly

Change your thoughts

احنا ممكن ما نقدرش نغيّر اللي بيحصل في الدنيا، زي الحاجات اللي بنمرّ بيها في حياتنا او القَدَر بتاعنا... بس لما بنغيّر احنا بنشوف الحاجات دي ازاي، و احساسنا ناحيتها ايه، بنعرف نتعامل معاها احسن ... و ممكن كمان نتعلّم منها !.

و ده في حد ذاته قوه كبيره جدا... لو عرفنا نستغلها.

قدرتنا علي إستخدام عقلنا و السيطره عليه دي حاجه مهمه جدا، لأنها بتغير نظرتنا للحياه ككل......

إنما العقل لو اتساب براحته، ممكن "يسحلنا وراه"...

#منير_الشاذلي

"انت لا تملك التحكّم في ما يحدث خارجك، و لكنك تملك التحكم في ما يحدث داخلك (ردود أفعالك و نظرتك لما يحدث)" -#وين_داير

"You cannot always control what goes on outside. But you can always control what goes on inside." #Wayne_Dyer

You may not be able to change what happens in the world around you now, or your fate... but you can change how you perceive it, feel about it, how you react to it... And what you could learn from it...

and that's quite a great power to have!.

Use your mind, don't let it use you!

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

Between parents and children

بمناسبة #عيد_الاب ...

ناس كتير بتعلّق أو بترد عليا في رسائل علي ان الام و الاب مش هما اللي خلّفوا، انما هم اللي ربوا و شالوا مسئولية ولادهم، و عاملوهم كويس!

و رغم اني *متفق تماما مع فكرة ان الامومه و الابوه اكبر بكتير من مجرد الخِلفه*، الا ان كتير من الرسائل دي كان فيها غضب كبير علي الام و الاب اللي في نظر الناس اللي كاتباها (و مجموعه كبيره منهم شغالين كمان في مجالات ليها علاقه بعلم النفس) ماقاموش بدورهم في تربية ولادهم و الاهتمام بيهم بالشكل المظبوط!

من واقع خبرتي و تجاربي في مجال الشغل بتاعي (سواء كان #coaching أو #therapy ) أو حتي من خلال قراءاتي و ملاحظاتي في مجال الروحانيات #spirituality احب اقول اني ماشوفتش حد سعيد في حياته و هو عنده غضب ناحيه ابوه او امه (او الاتنين طبعا)!

و من واقع تجربتي كمان، مفيش ام او اب عايزين يكونوا ام أو اب وحشين، أو عايزين ولادهم يكرهوهم... بس فيه ناس وعيهم و تصرفاتهم مع اولادهم بتساعد علي ده، و فيه ناس قلة وعيهم بتخليهم يعملوا أخطاء كبيره (و ساعات كبيره جدا) مع اولادهم

مش بس كده، الناس اللي عندها غضب او شعور بعدم الرضا في الدنيا...او حتي في احيان كتيره شعور بالاكتئاب كتير منهم عندهم مشاكل مع ابوهم او امهم ... و عدم تقبّل للقرارات اللي هما اخدوها.

من ناحيه تانيه، انا ماشوفتش حد في حياتي سعيد في حياته و عنده #سلام_نفسي و هو بيتكلم وحش عن ابوه او امه او عنده غضب كبير ناحية قراراتهم او اختياراتهم.

و في رأيي ان ربنا اتكلم عن اهمية العلاقه مع الوالدين في كل الديانات، علشان التصالح و التقبل ( reconciliation) مع #الام و #الاب و الوصول لسلام نفسي معاهم هو احد اهم وسائل الوصول ل #السعاده و #الرضا في الحياه ..ان ماكانش اهمها علي الاطلاق.

و علي الرغم من أني عارف ان فيه أهل ممكن يكونوا قاموا بأدوار قليله بالمقارنة بأهالي تانيه... و ان فيه أهالي بدل ما ياخدوا بالهم من اولادهم، كانوا عايزين أولادهم هما اللي ياخدوا بالهم منهم (يلعبوا دور الأم أو الأب ليهم )...و عارف كمان أن فيه أهالي يمكن يكونوا تسببوا في اذي لأولادهم (سواء بشكل واعي أو غير واعي)، إنما من وجهة نظري أن سواء الشخص عايز يتصالح مع ابوه و امه او عايز يفضل يلومهم علي اللي حصلّه في حياته (و الحاجات الكبيره اللي كانت ممكن تحصلّه أو ماتحصلوش لو لو كانوا مختلفين) ، فطبعا ده من حقه و دي حريته الشخصيه.... انما طريق الوصول للسعاده و السلام النفسي... لازم يعدي علي الام و الاب الاول!

و زي ما قال بيرت هيلينجر " الاهل بيبقوا سعداء، لما اولادهم بيقبلوهم ... و الاولاد بيبقي عندهم سلام نفسي، لما بيتقبلوا اهاليهم " ...

و في رأيي ...السلام النفسي هو الأهم !

#منير_الشاذلي

#Monir_El_Shazly

#constellationtherapy

#familyconstellations

#familyconstellationtherapy

YouTube: Monir El Shazly

Facebook page: @monirelshazlyspiritual

Instagram: monir.elshazly