مفهوم الضحيه و الصعبانيات

"مَلعون ابو الناس العُزاز"....

مفهوم الضحيه و الصعبانيات!

-------

من شوية ايام، كنت داخل اشتري حاجه من محل، و سمعت الاغنيه دي، الاغنيه دي بقالها حوالي ٧ أو ٨ سنين، و اول ما طلعت، لقيت "الفيس بوك " اتملي بالجمله السخيفه دي... و ابتدا معظم الناس يرددوها و يحطوها status علي البروفايل بتاعهم !...

طبعا كل واحد حُر يقول او يعمل اللي هو عايز يعمله...

اللي انا بس احب اسأله لكل واحد حط ال ستاتس دي عنده، او مقتنع بالجمله دي ... يا تري ايه شعورك وانت بتقولها او بتفكر فيها ...و شعورك و انت بتقراها وواخدها حكمه في حياتك؟

لو كان شعورك ان الحياه حلوه و حسيت انك مُقبل علي الدنيا و متفائل.. يبقي خير... حُطها و العن الناس اللي حواليك زي ما انت عايز!

انما لو كان شعورك انك صعبان عليك نفسك و حاسس ان "الدنيا غداره... و مافيش حد ممكن تثق فيه ابدا" ، يبقي خلي بالك ان هو ده بالظبط اللي انت حتشوفه في حياتك الفتره الجايه.

بمعني اخر ، لو انا لابس نظارة ان "الناس كلها ملعونه و زباله و مفيش حد ممكن اثق فيه حتي اقرب الناس" ، هل ده حيخلي تصرفاتي مع الناس تخليني اقرّب منهم او اعرفهم ؟... هل ده حيخلّي حياتي احسن ؟... هل ده حيخلّيني متحمس اتعامل علي الناس اللي ربنا حيحطهم في حياتي ؟...

لما تفضل لابس النظاره دي، حياتك حتفضل كلها متلونه باللون ده ،... و ماتستغربش بعد كده انك وحيد و تعيس و ماحدّش عايزك في حياته.

لو عايز تشوف الحاجات الكويسه في "الناس العزاز " ، بطّل تلعنهم ...و دور علي الحاجات الكويسه فيهم ...و افتكر الذكريات الحلوه...

و لو مش عايز تكون ضحيه، بطّل تِصعَب عليك نفسك... و بطل تشوف نفسك ضحيه الناس و الحياه ...

اه، و بطّل تسمع اغاني الصعبانيات :-D

*شكرا لكل واحد مر في حياتي ....

و شكرا جدا ل *الناس العُزاز*

(إعادة نشر)

#منير_الشاذلي

#Monir_El_Shazly

#شكرا_للناس_العزاز

YouTube: Monir El Shazly

Facebook page: @monirelshazlyspiritual

Instagram: monir.elshazly

Who am I ?

من اكتر من ٢٥ سنه ...قريت اعلان في مجله كان بيقول :

"طول حياتي كان نفسي ابقي "شخص مهم" ...

دلوقتي انا بقيت "شخص مهم" ...

بس مش انا (بس مش عارف نفسي) !!!"

"All my life, I wanted to be SOMEBODY ...

Now I'm finally SOMEBODY...

But it isn't me"...

دائما رأيي أن مش مهم الناس بتقول علي الواحد ايه... مش مهم انه يبقي الاحسن...او الاغني... او الاشهر ...لأن كل ده مالوش لازمه..لو مش عارف و مستريح مع نفسه في المرايه.

الشهره...الفلوس...الاهميه... كلهم مالهومش لازمه... لو الواحد مش سعيد...و لو معندوش سلام مع نفسه...

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

Photo credit: unknown

#السلام_النفسي

#سلام_نفسي

#innerpeace

عيد الاب

بمناسبة #عيد_الاب... انا انفصلت عن ابويا و امي في السكن من و انا عندي ٢٤ سنه، و من ساعتها (بخلاف ٣ سنين كنت فيهم متجوز) و انا عايش لوحدي.

انما فِضلِت دايما الرابطه اللي بيني و بين اهلي قويه جدا... و كانت اقوي فتراتها في السنه في رمضان...لما كنا بنتجمع علي الفطار مع بعض و نتفرج علي حاجه في التليفزيون.. قبل ما اقوم اقول اني عايز امشي علشان عندي ميعاد مع اصحابي.

و دايما كان بابايا يقولي "خلاص... انت بقي تفطر معانا في رمضان كل يوم "... و انا ارد عليه و اقوله "مش حينفع.. علشان عندي اصحاب و عزومات طول الاسبوع الجاي "...

اما امي فكانت دايما تقولي "مالحقناش نقعد معاك "... و ساعات كانت بتقولي " الحق اقعد معانا ..علشان لما نمشي حنوحشك".

كنت باسمع كلامها و بحاول اشوفهم وقت اكتر... انما ماحسيتش بمعني كلامها الا لما فعلا هم الاتنين مشيوا!.

الام و الاب دول حاجه كبيره جدا... و وجودهم في الحياه (حتي لو ماكناش علي علاقه قويه بيهم) بيدٖي شعور كبير بالامان و الارتباط بالحياه ، مش بيحسه الا الشخص اللي فقدهم. الشعور ده هو اللي بيخلي حاجات كتيره في الحياه يبقي ليها طعم (حتي لو ماكناش واعيين بده ساعتها!)

يمكن علشان كده جزء اساسي من شغل العلاج النفسي اللي بأعمله للناس بيركز علي العلاقه مع الاب و الام كأساس؛ مش بس لكل علاقاتنا ، انما كعامل مهم في استمتاعنا بالحياه!.

استمتعوا بوحود ابوكم و امكم في حياتكم، قربوا منهم و افتحوا قلبكم ليهم.... افتكرولهم حاجات كويسه عملوهالكم و ذكريات جميله ليكم مع بعض...و ماتركزوش علي الحاجات اللي مضايقاكم في علاقتكم بيهم... و اعرفوا أنهم بني ادمين و من حقهم يغلطوا... و حتي لو غلطوا او اخدوا اختيارات ممكن تكونوا شايفينها اذيتكم... ..اعرفوا أن غالبا كان قصدهم كويس و أن فيه حاجات كتيره في دماغهم لما اخدوا القرارات دي عمركم ما حتعرفوها ... ...بس *كفايه أنهم حبوكم و كانوا بيخافوا عليكم*

و استمتعوا باولادكم قبل ما يكبروا... و لما يكبروا استمتعوا بيهم لما يكبروا... و لو عندكوا مشاكل كبيره مع اولادكم ، شوفوا علاقتكم باهلكم عامله ازاي... لأن العلاقه مع الابناء في معظم الاحيان بتبقي مرايه للعلاقه مع الام او الاب.

و اعرفوا ان واحده من اهم اسباب الاكتئاب اللي دايما بلاقيها في شغلي هي ان الشخص يكون قلبه مقفول لأمه أو ابوه (و حتي لو الشخص ده مش واعي لأن ده السبب، بس دائما بيبقي استماعه بالحياه قليل، و عنده دائما شعور بالغضب و ان "الحياه فاضيه" من جوه!

(إعادة نشر)

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual