عيد الاب

بمناسبة #عيد_الاب... انا انفصلت عن ابويا و امي في السكن من و انا عندي ٢٤ سنه، و من ساعتها (بخلاف ٣ سنين كنت فيهم متجوز) و انا عايش لوحدي.

انما فِضلِت دايما الرابطه اللي بيني و بين اهلي قويه جدا... و كانت اقوي فتراتها في السنه في رمضان...لما كنا بنتجمع علي الفطار مع بعض و نتفرج علي حاجه في التليفزيون.. قبل ما اقوم اقول اني عايز امشي علشان عندي ميعاد مع اصحابي.

و دايما كان بابايا يقولي "خلاص... انت بقي تفطر معانا في رمضان كل يوم "... و انا ارد عليه و اقوله "مش حينفع.. علشان عندي اصحاب و عزومات طول الاسبوع الجاي "...

اما امي فكانت دايما تقولي "مالحقناش نقعد معاك "... و ساعات كانت بتقولي " الحق اقعد معانا ..علشان لما نمشي حنوحشك".

كنت باسمع كلامها و بحاول اشوفهم وقت اكتر... انما ماحسيتش بمعني كلامها الا لما فعلا هم الاتنين مشيوا!.

الام و الاب دول حاجه كبيره جدا... و وجودهم في الحياه (حتي لو ماكناش علي علاقه قويه بيهم) بيدٖي شعور كبير بالامان و الارتباط بالحياه ، مش بيحسه الا الشخص اللي فقدهم. الشعور ده هو اللي بيخلي حاجات كتيره في الحياه يبقي ليها طعم (حتي لو ماكناش واعيين بده ساعتها!)

يمكن علشان كده جزء اساسي من شغل العلاج النفسي اللي بأعمله للناس بيركز علي العلاقه مع الاب و الام كأساس؛ مش بس لكل علاقاتنا ، انما كعامل مهم في استمتاعنا بالحياه!.

استمتعوا بوحود ابوكم و امكم في حياتكم، قربوا منهم و افتحوا قلبكم ليهم.... افتكرولهم حاجات كويسه عملوهالكم و ذكريات جميله ليكم مع بعض...و ماتركزوش علي الحاجات اللي مضايقاكم في علاقتكم بيهم... و اعرفوا أنهم بني ادمين و من حقهم يغلطوا... و حتي لو غلطوا او اخدوا اختيارات ممكن تكونوا شايفينها اذيتكم... ..اعرفوا أن غالبا كان قصدهم كويس و أن فيه حاجات كتيره في دماغهم لما اخدوا القرارات دي عمركم ما حتعرفوها ... ...بس *كفايه أنهم حبوكم و كانوا بيخافوا عليكم*

و استمتعوا باولادكم قبل ما يكبروا... و لما يكبروا استمتعوا بيهم لما يكبروا... و لو عندكوا مشاكل كبيره مع اولادكم ، شوفوا علاقتكم باهلكم عامله ازاي... لأن العلاقه مع الابناء في معظم الاحيان بتبقي مرايه للعلاقه مع الام او الاب.

و اعرفوا ان واحده من اهم اسباب الاكتئاب اللي دايما بلاقيها في شغلي هي ان الشخص يكون قلبه مقفول لأمه أو ابوه (و حتي لو الشخص ده مش واعي لأن ده السبب، بس دائما بيبقي استماعه بالحياه قليل، و عنده دائما شعور بالغضب و ان "الحياه فاضيه" من جوه!

(إعادة نشر)

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

انت مش ضحيه

انت مش ضحيه!

_____

"طول ما انت عامل لنفسك هوية من الألم و المشاكل بتاعتك، حتفضل تعاني! ". #ايكهارت_تول

طول ما انت حاطط قدام عينك كل المشاكل و المآسي اللي انت مريت بيها، و بتعرّف نفسك من خلالهم...

و طول ما انت صعبان عليك نفسك، و اللي حصلك أو اللي كان المفروض يحصل و ماحصلش ... عُمر ما حاجه حتتغير.

فكّر في اللي ممكن تعمله علشان تغير حياتك، و اعمل اللي عليك...

و بطّل تشوف نفسك ضحيه!

#منير_الشاذلي

“As long as you make an identity for yourself out of #pain, you cannot be free of it.” ~ #Eckhart_Tolle

Stop feeling sorry for yourself, for your life. Do what you can do from a position of someone who can make a difference, not from a position of a #victim. Stop feeling sorry for yourself!. #Monir_El_Shazly

#you_are_not_a_victim

#انت_مش_ضحيه

YouTube: Monir El Shazly

Facebook page: @monirelshazlyspiritual

Instagram: monir.elshazly

اسئله محتاج تسألها لنفسك !

كتير في شغلي ... او حتي لما بتكلم في جلسات او ندوات ..دايما بقول ان الشخص محتاج يبص جواه...قبل ما يبص براه ( و طبعا ده مش كلامي انا..ده كلام اتقال من الاف السنين من تقريبا كل المعلمين الروحانيين و الرُسُل في كل الديانات:) )

بس دايما معظم الناس اسهل عندهم انهم يبصوا بره، و ينتقدوا #الحياه و اللي بيحصل فيها ... و ينتقدوا الناس التانيه ... و مابيسألوش نفسهم اسئله ممكن تبان بديهيه ...اسئله ليها علاقه مباشره بيهم و بحياتهم!

و علشان كده..دايما بأعمل لسته فيها اسئله للناس لما بأبتدي اشتغل معاهم ، الاسئله دي محتاجيين يجاوبوها علشان يعرفوا نفسهم شويه , و يبتدوا ينقلوا تفكيرهم من بره...لجوه...علشان "ما فيش حاجه بتتغير في الحياه...الا لو اللي جوه اتغير."..

لو عايز تغير حياتك (او حتي المكان او العلاقه اللي انت فيها)...دي اسئله ممكن تساعدك

• انت عايز ايه من الحياة؟

٠ ايه هو مفهوم #النجاح من وجهة نظرك؟ ( هل المفهوم ده اتغير مع الوقت؟)

• انت حاسس انك ناجح؟

• طيب ايه اللي ممكن يخليك تحس انك ناجح؟

• لو انت عارف انك مش ممكن تفشل في اي حاجه حتختار تعملها ...حتعمل ايه؟

• هل انت راضي عن نفسك؟

• طيب....لو مش راضي، ايه اللي ممكن يخليك ترضي عنها؟

• ايه هي نقط قوتك الرئيسية؟

• لو انت استغليت نفط القوه دي في حاجه (او شغلانه) حتبقي ايه هي ؟

• ايه هي الحاجات اللي فيك و حاسس انك محتاج تغيرها؟

• هل انت حاسس ان وجودك مؤثر او مفيد للناس اللي حواليك؟؟

• طيب...ايه الحاجه او السلوك اللي بتعمله، و بيأثر في الناس ؟( بشكل إيجابي ..او بشكل سلبي)

• ايه الفرق بينك دلوقتي... و بينك من سنه فاتت؟

. ايه الحاجه اللي نفسك (او كان نفسك) تقولها لأبوك أو امك و ماقولتهاش لغاية دلوقتي ؟

• ايه السؤال اللي محتاج تسأله لنفسك دلوقتي؟؟

• طيب...ايه حتكون اجابة السؤال ده لو سألته؟

• اخر حاجه...هل انت سعيد في حياتك ؟؟؟ ... و لو الجابه لأ ..ايه اللي ممكن تعمله علشان تبقي اكتر #سعاده؟؟

لو فيه اسئله كتيره هنا مش لاقيلها اجابه، يبقي انا محتاج ابص جوه نفسي اكتر!..

و لو اجابات كتيره، مش مستريح ليها، يبقي يمكن محتاج اخد خطوات لتغيير حياتي ابتداء من دلوقتي ! ( مش اندم علي اللي حصل أو اللي محصلش)

حياتك ..هي عباره عن مرايه للي بيحصل جواك.... لو عايز الحياه يبقي شكلها حلو...اتأكد ان المرايه نظيفه!

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly