Untitled

طب ايه هي احسن طريقه احبّ بيها ولادي؟

---------

ناس كتير علقت علي البوست اللي كتبته عن محاولة الاهالي انهم يوفروا حياه فيها رفاهيه لولادهم علي حساب قربهم ليهم... و سألوني يعملوا ايه في التعامل مع الاولاد .

في البدايه...احب اقول ان مجرد ان فيه ناس واخده بالها ان فيه مشكله في تعاملهم مع اولادهم، ده هو بداية الحل.

انا لما بيجيلي حد علشان عايز يعالج تصرفات او مشاكل عند ابنه او بنته ، اول سؤال بسأله : هم عندهم كام سنه ؟.

و لو الاجابه اقل من ١٨، بقولهم ان المشكله فيكوا انتوا مش في ولادكم. و اول ما تشتغلوا علي نفسكم، ولادكم حيتحسنوا.

طبعا الكلام ده مابيعجبش ناس ، بس في وجهة نظري ان الاولاد بيبقوا عاملين زي الاسفنج اللي بيشفط تصرفات و افعال و افكار اهاليهم، فمهما حاولت مع الاولاد، من غير تغيّر في تصرفات الاهل (الاتنين... او واحد علي اقل تقدير) ... مافيش تحسن حيستمر في تصرفات الاولاد.

طيب السؤال الازلي هنا.. اعبر عن حبي لاولادي ازاي ؟

اهم حاجه.... قولوا لولادكم انكم بتحبوهم.. من غير ماتربطوا الحب ده بنجاح في المدرسه او تفوق رياضي.. او تصرفات معينه.. قولولهم انكوا بتحبوهم... و مبسوطين انهم ولادكم. .... و بس!

الحاجه التانيه...ركزوا علي الحاجات و التصرفات اللي بيعملوها كويس و شجعوهم عليها. ده مش معناه ان مايبقاش فيه توجيه لو عملوا حاجه غلط.. بس دايما ركزوا علي الحاجات الحلوه اللي فيهم و بيّنولهم انكم شايفينها!.

الاولاد اللي علي طول بيُنتقدوا و بيِتوجهوا من اهاليهم ، او اللي ما حسّوش ان اهلهم متقبلينهم زي ما هم و هم صغيرين ، بيكبروا عندهم مشاكل في محاولة اثبات الذات، مشاكل في الثقه في النفس...و في الآخرين... و حاجات تانيه كتير ..

الحاجه التالته... ماحدش يتكلم وحش عن الطرف التاني للاولاد... ماحدش يشتكي لابنه او بنته من تصرفات التاني. و ماحدش يدخّل الاولاد في النص. اللي بين الام و الاب ده بين الام و الاب... و الولاد مش دورهم يساعدوا او يحلّوا.. او يسمعوا!.

لو عندكم مشاكل مع بعض.. استعينوا بحد متخصص... او استعينوا بالاهل... او سيبوا بعض لو مش قادرين..انما ماتدخلوش العيال.....خالص

و اخيرا...اعرفوا ان ولادكوا مش مهمتهم انهم يفرحوكوا او يحققوا الحاجات اللي انتوا ما حققتوهاش في حياتكم ... *و الاهم كمان أن مش مهمة الولد انه يبقي الراجل بتاع امه اللي حتطلع بيه من الدنيا !*

اولادكم جايين الدنيا بأحلام و اهداف مختلفه عنكم... فماتحاولوش تدّوهم احلامكوا يعيشوها ليكوا و تقولوا انكوا بتوَفرلوهم حياه احسن .

سيبوهم يعيشوا حياتهم و يحبوا الحاجات اللي بيحبوها..

وبدل ماتشيلوا نفسيكم "هم العيال "و المصاريف ، حاولوا تستمتعوا بيهم و بعلاقتكوا بيهم و هم بيكبروا... و دايما.. خليكوا "موجودين" في حياتهم. لأن مافيش حاجه بتعوضهم عن قربكوا منهم و احساسهم بحبكم ليهم!.

#منير_الشاذلي

(اعادة نشر)

* اللي يحب يشوف الڨيديو بتاعي عن الموضوع ده ممكن ابعتله اللينك !

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

لو عايز تسعد اولادك

لو عايز تسعد ولادك ...اسعد نفسك الاول !

ــــ

مع ارتفاع نسبة الطلاق و الخلافات الزوجيه ، ناس كتير بتقوللي انها خايفه علي ولادها و نفسها توفرلهم حياه احسن من اللي هما عاشوها.... و بتسألني ايه اكتر حاجه ممكن يعملوها ليهم .

كتير من الناس بتضغط علي نفسها علشان تدخل ولادها مدارس كويسه و غاليه... و تعلمهم تعليم "انترناشيونال" ، حتي لو كان ده علي حساب انهم يضغطوا علي اعصابهم و مايناموش بالليل من كتر القلق علي مصاريف العيال و طلبات الدراسه و الكلام ده. ...و في احيان كتيره في ناس بتضطر (للأسف) تسافر بعيد عن ولادها و بيتها علشان توفر مصاريف الحياه و الدراسه ليهم!.

و في ناس تانيه ( و خصوصا الامهات) بيبهدلوا نفسهم وهم بيودوا العيال للتمارين و الدروس و يجيبوهم. و يومهم بيبقي متوزع بين الولد اللي محتاج يروح درس الجيتار و البنت اللي لازم تروح درس السباحه و الولد الصغير اللي محتاج اذاكرله علشان عنده ابتدائيه السنه دي!

و في ناس تالته بتفضل في جوازه مش عاجباها علشان "الولاد يتربوا بين اب و ام تحت سقف واحد" ، حتي علي الرغم من ان الام و الاب مش طايقين حياتهم و لا قادرين يبصوا (مش حتي يتكلموا) مع بعض!

و بغض النظر عن كمية الامراض اللي بتصيب الاهالي اللي بيعملوا كده ، و كم التعاسه و القلق و الضغط النفسي اللي بيبقوا عايشين فيه... المشكله هي ان الاولاد نفسهم ( اللي الاهالي فاكرين انهم بيضحوا علشانهم )؛ مابيطلعوش سعداء و في احيان كتيره بيبقوا مش ناجحين في الحاجات اللي اهاليهم ضحوا بحياتهم و سعادتهم علشان يوفروها ليهم.... يا تري ايه السبب؟

السبب ببساطه ان الاولاد بيطلعوا و عندهم نموذج الحياه من خلال تصرفات الاب و الام.... فلما الولاد بيلاقوا ان ابوهم او امهم (او الاتنين) مش سعداء في حياتهم ، بيتخزن عندهم في العقل الباطن ان ده هو نموذج الحياه ، و ان عادي اني ماكونش سعيد في حياتي و اني استحمل و ماغيرش حاجه فيها. ( ده طبعا غير الشعور الخفي بأنهم لازم مايطلعوش سعداء و يضحوا لولادهم بعد كده زي ما اهاليهم كانوا مش سعدا و ضحّوا) .

الحاجه التانيه هي ان لما الاهالي بيضحوا علشان خاطر ولادهم تضحيات كبيره، بيقي فيه نوع من انواع الضغط (حتي علي المستوي الغير محسوس او متعبر عنه) من الاهل علي الاولاد انهم "لازم" يكونوا عند حسن الظن بيهم و يحققوا حلم اهاليهم فيهم. و ده في حد ذاته بيشكل ضغط نفسي كبير علي الاولاد و في غالب الاحيان مابيقدروش يتعاملوا معاه و بيتمردوا!

الحاجه التالته كمان ارتفاع نسب الاصابه بأمراض الضغط و القلب والسكر ...و التوتر و ال panic attacks عند ناس لسه في العشرينات أو التلاتينات من عمرها.... و طبعا الناس دي مش واحده بالها من كم الضغط النفسي و التوتر اللي هي حطّاه علي نفسها ..و طبعا التوتر ده بيتصدر لأولادها بشكل أو بآخر !

كمان لازم نحط في اعتبارنا حاجه مهمه جدا، و هي ان وجود الاب و الام في حياة الاولاد (سواء كانوا متجوزين او منفصلين) بشكل مستمر و فيه احترام بين الطرفين ، "اهم مليون مره " من المدارس الانترناشيونال و ال iPhone و العربيه الجديده.!.

كل الاولاد التعساء اللي تصرفاتهم او اسلوب حياتهم فيه تطرّف بيبقي سببه بشكل مباشر بعدهم عن اهلهم و عدم شعورهم بالحب (او التقبّل) منهم.

الخلاصه هنا انكم لو عايزين ولادكوا يبقوا ناس اسوياء...اشتغلوا علي نفسكم و علي سعادتكم و سلامكم النفسي الاول ، علشان ده هو "المثال" اللي ولادكم بيفهموا الحياه من خلاله.

كمان ماتنسوش انكوا تبقوا قريبين منهم... و تحبوهم من غير ما تربطوا الحب ده بدراسه او تفوق رياضي او اجتماعي.

حسسوا ولادكم انكوا بتحبوهم و فخورين بيهم و بشخصيتهم و باهتماماتهم... استمتعوا بولادكم و هم بيكبروا بدل ماتبقي العلاقه بينكم عباره عن " اخبار المدرسه ايه؟" و " ليه انت لابس كده ؟" و "انا مش حجيب ال iPhone الجديد الا لما تنجح و تطلع الاول ".

لو عايز ولادك يكونوا سعدا..... اشتغل علي سعادتك.... و بيّنلهم انك سعيد بيهم و بتحبهم....!

(إعادة نشر)

#الطلاق

#الاولاد

#الخلافات_الزوجيه

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

لما تواجهك مشكله

لما تواجهك مشكله!

__

لما تواجهك مشكله (اي مشكله)... دايما فيه ٣ طرق للتعامل معاها بشكل يخلّي حالتك النفسيه احسن :

١- انك تحلّها

طبعا دي الطريقه الواضحه. و حلّ المشكله كتير بيبقي اسهل من اللي احنا فاكرينه. بمعني اننا كتير بنتصوّر ان الموضوع صعب ( و عمره ما حينفع...بس اول ما بنمشي في الحل كل حاجه بتتسهّل و بنستغرب بعديها احنا كنا خايفين ناخد الخطوات دي ليه.

(بس دايما حُط في اعتبارك ان فكرة حل المشكله في العلاقات مش معناها انٖك تحاول تغيّر الشخص الاخر لأن ده عمره مابينجح الا لو الشخص التاني شايف انه محتاج يتغيّر و طالب مساعدتك في التغيير... و الأهم أنه قادر يتغير)

٣- انك تسيب الموضوع كله و تمشي.

و الحل ده مش دايما بيعني الاستسلام زي ما كتير من الناس بتتصور (او بتقولٖك). لو انت قدّامك حيطه في طريقك و كل مره تخبط فيها ، الحل مش دايماً انّك تفضل تخبط فيها.. ممكن يكون الحل انّك تشوف طريق تاني . و ساعات كتير بيكون وجود الحيطه دي سبب ربنا باعتهولك علشان تمشي في طريق تاني و تعرف حاجه جديده (بس انت الوحيد اللي ممكن يعرف ده)

٣- انّك تغيّر نظرتك للمشكله.

و ده حل صعب لناس كتير علي الرغم من انه الحل الاكثر سهوله في التنفيذ. بمعني انّك بدل ما تفضل تقول مثلا انك مش طايق الشغلانه اللي انت فيها (او البلد او الجوازه) تبتدي تفكّر ايه الحاجات اللي ممكن تتعلمها من المرحله دي و ليه ربنا حطّك في المكان ده دلوقتي و ايه الحاجات المفيده اللي ممكن تغيرها في شخصيتك في الوقت ده .

ده مش معناه انك ماتحاولش تسيب العلاقه دي (او الشغل ده) ، بس معناه انك تبص للمرحله دي كفرصه انك تتغير للأحسن او تكون اكتر مرونه... و تتعلّم الدرس علشان مايتكررش تاني :-) .

اي طريقه غير الثلاث طرق دي للتعامل مع مشكلاتك ...حتوصلك دايما للتعاسه و البؤس. ...

ياتغيّر (الموقف)... يا تتغير (انت)... يا تمشي.... :-)

*حتلاقوا الڨيديو اللي انا عامله علي الموضوع ده في اول تعليق تحت

#منير_الشاذلي

#Monir_El_Shazly

* Inspired by #Eckhart_Tolle

YouTube: Monir El Shazly

Facebook page: @monirelshazlyspiritual

Instagram: monir.elshazly