اسئله محتاج تسألها لنفسك !

كتير في شغلي ... او حتي لما بتكلم في جلسات او ندوات ..دايما بقول ان الشخص محتاج يبص جواه...قبل ما يبص براه ( و طبعا ده مش كلامي انا..ده كلام اتقال من الاف السنين من تقريبا كل المعلمين الروحانيين و الرُسُل في كل الديانات:) )

بس دايما معظم الناس اسهل عندهم انهم يبصوا بره، و ينتقدوا #الحياه و اللي بيحصل فيها ... و ينتقدوا الناس التانيه ... و مابيسألوش نفسهم اسئله ممكن تبان بديهيه ...اسئله ليها علاقه مباشره بيهم و بحياتهم!

و علشان كده..دايما بأعمل لسته فيها اسئله للناس لما بأبتدي اشتغل معاهم ، الاسئله دي محتاجيين يجاوبوها علشان يعرفوا نفسهم شويه , و يبتدوا ينقلوا تفكيرهم من بره...لجوه...علشان "ما فيش حاجه بتتغير في الحياه...الا لو اللي جوه اتغير."..

لو عايز تغير حياتك (او حتي المكان او العلاقه اللي انت فيها)...دي اسئله ممكن تساعدك

• انت عايز ايه من الحياة؟

٠ ايه هو مفهوم #النجاح من وجهة نظرك؟ ( هل المفهوم ده اتغير مع الوقت؟)

• انت حاسس انك ناجح؟

• طيب ايه اللي ممكن يخليك تحس انك ناجح؟

• لو انت عارف انك مش ممكن تفشل في اي حاجه حتختار تعملها ...حتعمل ايه؟

• هل انت راضي عن نفسك؟

• طيب....لو مش راضي، ايه اللي ممكن يخليك ترضي عنها؟

• ايه هي نقط قوتك الرئيسية؟

• لو انت استغليت نفط القوه دي في حاجه (او شغلانه) حتبقي ايه هي ؟

• ايه هي الحاجات اللي فيك و حاسس انك محتاج تغيرها؟

• هل انت حاسس ان وجودك مؤثر او مفيد للناس اللي حواليك؟؟

• طيب...ايه الحاجه او السلوك اللي بتعمله، و بيأثر في الناس ؟( بشكل إيجابي ..او بشكل سلبي)

• ايه الفرق بينك دلوقتي... و بينك من سنه فاتت؟

. ايه الحاجه اللي نفسك (او كان نفسك) تقولها لأبوك أو امك و ماقولتهاش لغاية دلوقتي ؟

• ايه السؤال اللي محتاج تسأله لنفسك دلوقتي؟؟

• طيب...ايه حتكون اجابة السؤال ده لو سألته؟

• اخر حاجه...هل انت سعيد في حياتك ؟؟؟ ... و لو الجابه لأ ..ايه اللي ممكن تعمله علشان تبقي اكتر #سعاده؟؟

لو فيه اسئله كتيره هنا مش لاقيلها اجابه، يبقي انا محتاج ابص جوه نفسي اكتر!..

و لو اجابات كتيره، مش مستريح ليها، يبقي يمكن محتاج اخد خطوات لتغيير حياتي ابتداء من دلوقتي ! ( مش اندم علي اللي حصل أو اللي محصلش)

حياتك ..هي عباره عن مرايه للي بيحصل جواك.... لو عايز الحياه يبقي شكلها حلو...اتأكد ان المرايه نظيفه!

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

اضطراب الشخصيه النرجسيه

اضطراب الشخصيه النرجسيه (١)

----

اهم ملامح "إضطراب الشخصيه النرجسيه" (الناس النرجسيين)

اهم صفات الشخص المصاب بما يسمي ب "#إضطراب_الشخصيه_النرجسيه"

1. بيبالغ في مشاعره في بداية العلاقة!

ده مش معناه أن كل شخص بيبالغ في مشاعره في بداية العلاقه شخص عنده صفات نرجسيه ، بس معظم الناس اللي عندهم صفات نرجسيه كتيره بيبالغوا جدا في مشاعرهم و اهتمامهم بالشخص التاني في بداية العلاقه! (و بعد كده كله بيتغير)

2. بيحب يتكلم عن نفسه و إنجازاته و يعظّم من نفسه كتير

و علشان كده لو انت في علاقه مع شخص اسأل نفسك ايه اللي هو بيعمله لما بتتكلم عن نفسك ؟ ..هل بيسمع و بيسأل اسئله علشان يعرف اكتر، و لا بيحوِّل الموضوع علي نفسه ؟

3. احتياجهم الدائم لأن الناس تشوفهم و تاخد بالها منهم.

بمعني اخر، من غير ما الناس تتكلم عنهم كويس، او تشوف مميزاتهم، عمرهم ما بيحسوا بالسعاده أو الرضا عن نفسهم!

4. مافيش تعاطف مع الاخرين!

دي اشهر حاجه ، الشخص المصاب بإضطراب الشخصيه النرجسيه، التعاطف مع الآخرين عنده بصفه عامه قليل جدا (او معدوم في معظم الأحيان )

علشان كده، اسأل نفسك لو كنت في علاقة هل بتهتم بيك او بيكي لما تحكيله علي يوم وحش في الشغل أو لما بتتخانق مع أهلك أو مديرك، ولا بتحس أنه زهق من كلامك ده و مش عايز يسمعك؟

5. دائما حتلاقيه بيتتقدك و بينتقد تصرفاتك (و غالبا بشكل ساخر أو فيه تقليل منك ).

في اول العلاقه بيبقي شخص مجامل و ظريف، بس بعد كده حتلاقي انتقاد ليك، و تصرفاتك و أفكارك علي طول الخط!

6. دائما حيعزلك عن الاهل و الاصدقاء (علشان تبقي ليه لوحده) ...و دائما حيقولك انا عايز نبقي لوحدينا دايما، و ان الناس التانيين حاسدينكم علي قصة الحب بتاعتكم، و حيبتدي يذم في أصدقاءك و أهلك و يحاول يبعدك عنهم...بشكل غير مباشر

7. مفيش اصدقاء قريبين!

معظم الأشخاص المصابين بإضطراب الشخصيه النرجسيه، مابيبقاش ليهم اصدقاء قريبين.

ممكن يكون ليهم معارف كتيره، إنما مالهومش اصدقاء كتير. (او خالص ).

و علشان كده بيبقي مستغرب لما الشخص اللي معاه بيبقي عايز يشوف أصدقاؤه أو أهله ...لأن المفهوم ده مش موجود عندهم قوي!

8. الشخص المصاب بإضطراب الشخصيه النرجسيه عمره ما بيعرف بالخطأ...خالص !

9. عمره ما بيتقبل النقد، و بيهاجمك لو انت عبرت ليه عن وجهة نظرك أنه كان محتاج يتصرف بشكل احسن أو يعمل حاجه مختلفه عن اللي عمله!

10. دائما حيحسسك أن فيك حاجه ناقصه!

- انك بطلت تحبه كفايه

- انك اتغيرت و أنه أتصدم فيك!

- أنه بطّل يثق فيك (بعد ما شاف انك مش أهل للثقه و الكلام ده)

- أن كل مشكله بتحصل بينكم انت السبب فيها

- أن أي تصرف خاطئ هو بيعمله تجاهك، انت اللي كنت السبب فيه (و ان انت اللي خليته يعمل كده!)

و اهم حاجه

11. عايز يبقي دائما مسيطر علي العلاقه! و عايزك دائما تعمل اللي هو شايف أنه صح (و طبعا حينتقدك و يحقّر من آراءك علشان تنفذ اللي هو عايزه!)

12. لو جيت تمشي من العلاقه حيمسك فيك .. و يرجع تاني جميل و ظريف لمدة يوم أو يومين، و بعدين يتغير تاني ، هو مش رجع ظريف تاني علشان هو اتغير، هو عمل كده علشان مش عايزك تمشي و لسه عايز يعاقب أهله من خلالك ( علي مستوي العقل الباطن طبعا )

و بعدين لو جيت تمشي تاني حيرحع تاني ظريف، و لو الموضوع مانفعش حيهينك و يشتمك انك مش شايف النعمه اللي في ايدك، و لو السكه دي ما نفعتش حيحاول يستجديك و يقولك (كده اهون عليك!)، و بعدين لو مانفعش ..حيشتمك تاني... هو مش حيسيبك تمشي بسهوله!...

و علشان كده ...لو دخلت في علاقه مع شخص كده... اهرب بسرعه... لأنك مش حتقدر تساعده و انت في علاقه معاه ..ولا ده دورك !

و بعدين محتاج تشوف ايه اللي خلاك تدخل في النوع ده من العلاقات ... علشان مايحصلكش ده تاني!

#منير_الشاذلي

*فيه فيديو انا عامله عن الموضوع ده ...

حتلاقوا اللينك في أول تعليق

YouTube: Monir El Shazly

Facebook page: @monirelshazlyspiritual

Instagram: Monir.elshazly

ملتيامحش أهلك !

ماتسامِحش اهلك!

------

ناس كتير اتكلمت معايا بعد اللي كتبته عن اهمية العلاقه بين الواحد و بين امه و ابوه ،و سألوني ازاي ممكن الواحد "يسامح اهله"، و كان ردي ان مش المفروض ان الواحد يسامح اهله! ... طبعا الرد ده كان صادم بالنسبه لناس كتير... بس رأيي ده ليه أسبابه ...

اصلا فكرة ان الواحد *يسامح اهله* فيها نوع من انواع التعالي علي الاهل.. و افتراض انك تعرف اكتر منهم و علشان كده " حتكبّر دماغك و تسامحهم ، علشان ياعيني هما غلابه و مش فاهمين" .... نفس فكرة ان ابنك او بنتك يسامحوك علشان انت زعقتلهم علشان مايحطوش صوابعهم في كُبس الكهربا و هم صغيرين و هما حيسامحوك علشان انت اب او ام طيبه بس ياعيني متضايقه من شغل البيت!

امك و ابوك جم الدنيا دي قبليك ب ٢٠ او ٣٠ سنه ( او يمكن اكتر) و مرّوا بتجارب في حياتهم اكتر منك ب ٢٠ او ٣٠ سنه. ف لو انت فاهم انك فاهم اكتر منهم علشان معاك دكتوراه او علشان سافرت شوية بلاد و هم لأ تبقي غلطان.

انت ماتعرفش اللي امك و ابوك مرّوا بيه في صغرهم و ايه اللي عانوه و هم بيربوك لغاية ما كبرت.... لأنك لو عرفت.. حتي فكرة انك تسامحهم حتبان علي انها فكره سخيفه و طفوليه جدا.

الحقيقه انك مابتسامحش ابوك و امك.. .انت بتتصالح معاهم...و تتقبلهم زي ما هم.. و تحترم اللي هم ادوهولك (حتي لو شايف انه كان قليل) .... لأن غالبا ده كان اكتر حاجه ممكن يدوها ( او اكتر حاجه يعرفوها)!

ده مش معناه انك توافق علي تحكمهم في حياتك (لو انت كبير و هم لسه بيحاولوا يتحكموا في حياتك ), أو توافق علي اي اعتداء جسدي أو لفظي بيحصلك منهم ( علي الرغم من أن تعريف الاعتداء ده تعريف بقي مطاط و مش محدد الايام دي). انما ده معناه انك تحاول تفهم الأسلوب ده و الافعال دي جايه منين و ايه اسبابها (اللي غالبا ليها علاقه بطريقه تربيتهم هما) ، و تتعاطف معاهم و تفهم أن معظم أفعالهم جايه من موقع الحب ليك و أنهم كانوا عايزين يشوفوك احسن حتي لو الأسلوب ماكانش مناسب ليك !.

#السلام النفسي مع الاهل ما بيجيش لما تفتكر انك اكبر منهم... او عارف اكتر منهم ... السلام النفسي بييجي لما تاخد وضعك الطبيعي قدامهم... لما تبطل تنتقد تصرفاتهم و الحاجات اللي هما ادوهالك أو مادوهاش .... و كمان لما تبطل تحس انك *مسئول عن اتخاذ قرارات ليهم* لما بيكبروا علشان يا عيني هما مش فاهمين الحياه دلوقتي عامله ازاي !

لما تعرف انك "انت الصغّير.. و هم الكبار"

السلام النفسي بييجي لما قلبك يكون مفتوح لابوك و امك!

#منير_الشاذلي

#Monir_El_Shazly

( إعادة نشر)

YouTube: Monir El Shazly

Facebook page: @monirelshazlyspiritual

Instagram: Monir.elshazly