هدّي عقلك !

"ربنا بيكلّم كل القلوب، بس مش كل القلوب بتقدر تسمعه!" - #عنايات_خان

الدوشه بتاعت عقلك... (أفكاره و متطلباته و نظرته للحياه و ايه اللي المفروض يكون و اللي مش المفروض أنه يحصل)، عاملالك تشويش و علشان كده إنت مش سامع صوت ربنا جواك...

و علشان كده إنت متخيل أنك مش متصل بربنا، او ان ربنا مابيستجيبش لدعاءك.

بس الحقيقه ان صوت ربنا حتلاقيه اوضح جوا قلبك، لما عقلك يهدي... و تتعلم تقعد في سكون... لوحدك! #منير_الشاذلي

"#God speaks to the ears of every heart, but it is not every heart that hears Him"- #Inayat_Khan

Your mind is creating a lot of noise that you can't hear God!

God's voice dwells inside you; He speaks in silence. #Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly

ليه نسيب الناس في حالها ؟

الحقيقه أنا شايفة إن كل شخص معترض على حاجة فى حياة التاني ما يسكتش وياخد موقف طالما الموضوع مضايقه قوي كده ...

مثلا

واحده مش عاجبها ان ابن أخوها بيروح حضانة عشان مامته بتشتغل ... تسيب شغلها و تقعد بيه هي!

حد مش عاجبه ان ابن فلانة لسه بيلبس بامبرز... ياخده يعمله potty training بنفسه!

مش عاجبِك ان واحده بتختار تعيش حياتها علي مزاجها وبترفض عرسان... اللي ترفضه اتجوزيه انتي!

معترض أن واحد مش عايز يتجوز أو مش عايز يخلف... اتجوز تاني علي شرفه، أو خلف عيلين زياده بداله ...

مش عاجبِك الفرش اللي في شقة صاحبتك ... افرشيهالها علي مزاجك ... و علي حسابك...

متضايق أن واحد بيصرف فلوسه علي الفسح و السفريات و مش سايب فلوس لبكره ... افتح له حساب في البنك و حطله كل شهر مبلغ علشان يأمن بيه مستقبله

بدل ما كل شوية تسألي صاحبتك "ايه مفيش بيبي فى السكة ؟" ... احملي بدالها أو خلفي وادوهم البيبي وقوليلها "والله ماهو راجع إنا حلفت ومش حأصوم!"

معترض أن واحد بيشتغل كتير (من غير ما هو يشتكيلك)... اصرف عليه علشان يبطل يشتغل !

متضايقه أن فنان طلق فنانه أو ممثله اتجوزت واحد تاني بعد ما سابت جوزها ... خدي عهد علي نفسك انك عمرك ما حتسيبي جوزك حتي لو كنتي تعيسه و كان حياتك معاه بتطفيكي كل يوم اكتر من اليوم اللي قبله ...

ما تسكتوش يا جماعة واعملوا حاجة بدل سيبان الناس فى حالها ده ، اللي خلى الناس تتمرع وتاكل وتلبس وتتجوز وتخلف و تعيش حياتها علي كيفها! 😁😁

(منقول بتصرّف)

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: Monir.elshazly

دعوه للتعاطف

دعوه للتعاطف!

----

مع التدهور الكبير في الحاله الاقتصاديه لمعظم الطبقات الاجتماعيه في مصر، اعتقد اننا حنبتدي نشوف ناس كتير بتشتغل في مهن ممكن يكون لينا احكام عليها ...

بداية من السايس اللي في الشارع، للناس اللي بتبيع حاجات علي الرصيف، لعربيات الاكل الغير مرخصة ، للناس اللي حتمسح ازاز العربيه في الإشارات .....و انتهاء ب..الدعا-ره !

البوست ده مش الهدف منه اني اعلن عن اعجابي أو رفضي لأي من المهن دي ( أو أي مهنه تانيه)، إنما الهدف منه اننا نحاول نفتكر اننا مانصدرش احكام عن الناس اللي حتشتغل حاجه من الحاجات دي، أو نحاول نتعاطف مع ظروفهم اللي خليتهم يشتغلوا اي حاجه، ممكن الناس تبصلهم نظره دونيه من خلالها !

و حتي لو ماقدرتش تتعاطف مع الناس اللي بتشتغل الشغلانات دي، علي الاقل ماتعاملهمش بقلة احترام، أو تبصلهم علي أنهم ناس "أقل" !

من السهل قوي اني أصدر احكام علي الناس، و انا قاعد في التكييف و معايا فلوس تكفيني لآخر الشهر، إنما لما الواحد بيتحط في مواقف معينه، كتير قوي من مبادئه و معتقداته بتتعرض للاختبار !

هل انا لو كنت مكان الشخص ده، بنفس ظروف تربيته، و نفس وعيه و تفكيره كنت حعمل اختيارات مختلفه عنه ؟ ...في الغالب لأ.

فقبل ما نصدر احكام علي الناس ( و احنا اصلا شعب بيميل لإصدار الأحكام) ، محتاجين نعرف أننا لو كنا مكان اي حد، بنفس ظروفه و تربيته و وعيه.... كنا غالبا حنعمل زيه ...

و محتاجين نشكر ربنا، أنه ساترنا، و ماحطناش في اختبارات صعبه كان ممكن نقع فيها و نعمل حاجات عكس مبادئنا ....زي ناس تانيين عملوا !

و نفتكر كلام سيدنا عيسي عن مريم المجدليه "من كان منكم بلا خطيئه، فليرمها بهذا الحجر " !

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly