عن العلاقات الاستغلاليه!
----
كنت بأتكلم مع اصدقائي و طالبي العلاج النفسي اللي بيجولي عن ما يسمي ب العلاقات الاستغلاليه (abusive relationships)
و هي العلاقات اللي بيبقي فيها استغلال او ايذاء عاطفي او نفسي او جسدي (او جنسي) من طرف (الجاني) للطرف الآخر (المجني عليه).
طبعاً النوع ده من العلاقات بقي منتشر كتير الايام دي لأسباب ليها علاقه مباشره بأن الناس بتلعب ادوار مش بتاعتها في العلاقات، بالاضافه لظروف الحياه الصعبه، و طبعا التربيه اللي الناس اتربتها في البيت!
و رغم اني مابحبش اسمّي العلاقه كلها علاقه استغلاليه او الشخص نفسه شخص مستغِل (abusive) لأن بحس ان التسميه دي بتحط يافطه علي العلاقه ما بتخليناش نشوف حاجه من وراها و بتحسس المجني عليه انه ضحيه، الا ان اللي انا عايز اقوله ان علي الرغم من ان الناس كلها فاكره ان الشخص المستغِل (الجاني) هو الطرف الاقوي في العلاقات دي، الحقيقه اللي يشوفها دائما ان الطرف ده بيبقي هو الطرف الاضعف ، و علشان كده بيحاول يستغل او يأذي او يِكَسَّر في الطرف الأخر (الضحيه) علشان يثبت لنفسه انه اقوي او احسن. ( و في معظم الاحيان بيكون الشخص ده من بيئه اجتماعيه او ماديه اقل من الطرف الآخر ، او عنده احساس بالدونيه نتيجه لعلاقه فاتت و عايز ينتقم منها في الطرف الآخر الجديد (المجني عليه /الضحيه)
لو الضحيه ده عرف انه اقوي من الطرف التاني و بطَّل يعيش دور الضحيه، الاستغلال ده بيقف في الحال! لأن اللي بيخلّي الاستغلال و الايذاء يستمر، هو ان المجني عليه دايما بيشوف نفسه ضعيف و محتاج للطرف التاني ، و شايف دايما ان حجمه اصغر من الطرف الآخر ، رغم ان الحقيقه مش كده تماما.
طب الحل ايه ؟
١- ان الشخص المجني عليه يبَطَّل يشوف نفسه ضعيف او ضحيه ، و يبني الكيان بتاعه (ال identity ) و نظرته لنفسه، و كلامه عن حياته حوالين القصه دي. (و دي من أهم الحاجات اللي بقولها لأي حد عايز يتغير و يطوّر حياته....أنه مايشوفش نفسه ضحية اي حاجه او اي حد...او حتي ضحية الظروف!)
٢- يبطّل كمان يسمّي العلاقه abusive كل شويه، علشان ده بيحسسه انه ضحيه زياده!
اي علاقه بنخشها عندها القدرة انها تعلمنا و تطورنا، لو احنا قررنا أننا نتعلم و نستفيد من اللي حصل!
٣- لازم نعرف أن العلاقات مابتنتهيش لما بنمشي (او لما الشخص التاني بيمشي، بغض النظر احنا او هما مشيوا ازاي) ، العلاقات بتنتهي لما نبطّل نفكر فيها سواء كان بشعور بالصعبانيات و "ازاي عملت في نفسي كده" ، (او بشعور بالذنب اني اذيت حد تاني ، بس ده ممكن نتكلم عليه مره تانيه ) ، و علشان العلاقه تنتهي، لازم نشتغل علي شعورنا أننا ضحيه، و نشوف ايه اللي اتعلمناه من العلاقه دي او من الشخص ده ، و نوصل لسلام نفسي مع العلاقه و اللي حصل فيها و اللي اتعلمته منها!.
فين ناس بتجيلي و بتبقي لسه محبوسه في علاقه ممكن تكون انتهت من عشرين سنه! إنما لسه عندها غضب او رغبه في الانتقام، او حتي صعبانيات عليها ... و طبعا لو انا لسه دماغي حبساني في العلاقه، لازم ده حيأثر علي علاقاتي اللي بعد كده ...
الخلاصه...
اي علاقه انا دخلتها و حصَلّي استغلال من اي شكل، لازم ابَطّل اشوف نفسي ضحيه فيها، و اتحمل نتيجه اختياراتي و اتعلم منها...
و انهاء العلاقات بشكل صحي لينا مش دايما بيبقي سهل، بس من غيره مابنعرفش ندخل في اي علاقه جديده، من غير ما ندفَّع الشخص الجديد، فواتير العلاقه القديمه!
(إعادة نشر)
#بطّل_تشوف_نفسك_ضحيه
YouTube: Monir El Shazly
Facebook page: @monirelshazlyspiritual
Instagram: Monir.elshazly