لو ابنك اتحداك !

فيه بوست منتشر الايام دي بيتكلم عن أن "ابنك لو اتحداك ...انسحب! ".... و انك ماتاخدش الأمور بشكل شخصي ...علشان ماتكسروش ...

و رغم أن الكلام يبدوا في المجمل كلام كويس إلا أن في الكلام ده في الحقيقه بيعمل مشكله كبيره في التربيه ...

الولد او البنت لازم يحسوا ان ليهم كبير ، لأن الشعور ده بأيديهم شعور بالأمان ...

إنما لو ابنك تحداك، و انت استسلمت، ده حيعمل عنده شعور أنه أكبر منك، و ده في حد ذاته حيخليه عنده شعور داخلي بعدم الأمان ...

و الحقيقه الأكبر أن الوصول لفكرة "التحدي" بينك و بين اولادك ده في حد ذاته معناه أن فيه مشكله في التربيه بقالها كتير ...

الموضوع مش خناقه، و ممكن لما الاولاد بيوصلوا لسن المراهقه يتصرفوا بشكل فيه تحدي شويه الآباء أو الامهات، بس لازم الولد او البنت يعرفوا أن ليهم كبير ...

اولادنا بيبتدوا حياتهم (وهما اطفال رضع) معتمدين علينا بشكل كامل في كل حاجه، و مع الوقت احنا بنبتدي نرفع ايدينا واحده واحده و نعلمهم يعتمدوا علي نفسهم، لغاية لما يوصلوا لسن، يبقوا معتمدين تماما علي نفسهم، و يعرفوا أن دورنا ساعتها بقي دور استشاري ...إنما دي حياتهم و هم اللي حيتحملوا قراراتهم ساعتها ...

الموضوع مش اني اثبت حاجه لأولادي و لا أن اولادي يثبتولي حاجه ...احنا في نفس المركب بنتحرك في نفس الاتجاه (التطور) بدافع الحب ...و مع الوقت هما حينفصلوا و اهمية دورنا في حياتهم حتقل ...بس محتاجين يبقوا عارفين اننا بنحبهم و هدفنا مصلحتهم، حتي لو اختياراتنا كانت مش هي الاختيارات اللي كانوا عايزينها ساعات!

إنما موضوع التحدي و الانسحاب و الاستسلام ده، دلاله علي مشكله كبيره في العلاقه، ممكن يكون الكلام اتنقل علي لسان قائله بشكل مختلف عن اللي اتقال فعلا ...بس انا حبيت اعلق علي فكرة التحدي أو الانسحاب اللي انتشرت في البوست ده ... لأنها ممكن تعمل مشاكل كبيره في الامان عند الطفل!

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

On fear !

قاعد في البيت بشرب شاي الصبح لقيت عصفوره دخلت جوه البيت ...

و رغم أن البيت مليان شبابيك قزاز كتير و كتير منها مفتوح، إنما العصفوره من كتر الخوف قعدت تطير و تخبط في القزاز اللي قدامها ، اللي هي خبطت فيه قبل كده و ماعرفتش تخرج...القزاز المقفول ده جنبه جزء من الشباك مفتوح بس هي مُصِرَه تطير من القزاز المقفول ...

ساعات كتير الخوف بيخلينا نفضل نحاول في حاجه احنا اصلا جربناها و مانفعتش او كمان جربناها و ضريتنا، علشان "خايفين" نجرّب حاجه جديده ... اللي غالبا هي الحاجه اللي حتخلينا نبقي احسن!

#حرر_نفسك_من_خوفك!

#منير_الشاذلي

"الخوف هو ارخص اوضه في البيت، انا احب اشوفك عايش في مكان احسن من كده!" - #حافظ_شيرازي

#free_yourself

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual

Things aren't always what they seem to be !

من سنه فاتت، الناس كلها كانت بتتكلم عن حفل تتويج تشالز و كاميلا ، و اعتبرت أن تتويج كاميلا هو انتصار لقوي الشر (المتمثله في كاميلا) علي قوي الخير ( المتمثله في ديانا )... و طلعت بوستات من نوعية "الخير بينتصر في النهايه في الافلام بس، إنما في الحياه الشر هو اللي بينتصر " ... و طبعا انتشار الكلام اللي من النوعيه دي بيعكس كمّ الاكتئاب اللي الناس عايشه فيه، و كم الإحباط اللي هم حاسينه ...

انا بس عايز اعلّق علي حاجتين مهمين

اولا، انا كنت محظوظ أن شغلي في مجال العلاج النفسي الشمولي و تقنية تشكيل العائله ( family constellations ) اداني الفرصه اني اشوف القصص من مفهوم أشمل و اوسع، و خلاني اعرف ان كل واحد عنده المشاكل بتاعته، من اول الراجل اللي مش عارف حيجيب فلوس منين علشان يأكل ولاده انهارده، للراجل اللي مش عارف يودي فلوسه فين من كترها (بس بردو خايف انها تروح) ، مرورا بالناس المشاهير... كل واحد عنده مشاكله، الفرق بس أن الشخص الفقير شايف ان مشاكل الغني دي مشاكل دلع و رفاهيات، و ان الغني مهموم بمشاكل تانيه ماكانتش حتبقي عنده لو فقير ...

زي ما المشاهير عندهم مشاكلهم و المخاوف بتاعتهم (من اول الخوف من زوال الشهره، لغاية المخاوف من أن كل الناس عايزه تعرفهم علشان تستفيد منهم أو من ورا معرفتهم مش علشانهم هم )...

ثانيا، القصص اللي الناس (و الميديا) بترسمها للمشاهير هي قصص غير واقعيه و في كتير من الأحيان مخالفه الحقيقه ...

ممكن ديانا كانت فعلا طيبه، انما غالبا ماكانتش الملاك اللي الناس متخيلاه...

و ممكن كاميلا كان عندها خطط و تطلّعات، إنما بردو مش شرط أنها تكون بالشكل اللي الناس شايفاها عليه ...

الشغل في المجال النفسي (و كمان الشغل علي النفس) بيعلمنا ان الحياه مافيش فيها ابيض و اسود ...إنما هي درجات مختلفه من الألوان ..و أن مافيش حد وِحِش في المُطلق، ولا حد كويس في المطلق ...

عقلنا بيحب يحط الناس في قوالب علشان يحكم عليهم، إنما لا هم كده، و لا دورنا اننا نحكم عليهم اصلا ...

أما الناس اللي شايفه أن "الشر انتصر" بوفاة ديانا و تنصيب كاميلا علي العرش، احب اقول ان مش كل واحد عايش مبسوط ...حتي لو كان ملك...

الحاجات مش دايما زي ما بنبقي متخيلينها!

#منير_الشاذلي

#familyconstellations

#familyconstellationtherapy

#familyconstellation

#وقوف_عائلي

#تشكيل_العائله

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual