- Monir El-Shazly
- May 21, 2024
بعد مسلسل another self علي نتفليكس، لاحظت في الفتره الاخيره أن ناس كتيره عملت جلسات بتقنية أنظمة العائله (او family constellations ) مع ناس مختلفه (سواء في مصر او بره مصر)، و جم بعد كده قالولي "أنهم حسوا أنهم احسن بعد السيشن، إنما ماحسوش بتأثير كبير بعد كده"...و ان التغيير اللي "كانوا متخيلين أن ال constellation حتعمله ، ماحصلش!"...
انا بس حابب أوضح شوية نقط ليها علاقه بموضوع ممارسات ال family Constellations (مش بس في مصر، و لكن في العالم)
١- ال family Constellations ممكن اعتباره تقنيه من تقنيات العلاج النفسي ، و هي (و ان كانت تقنيه عظيمه جدا في رأيي) الا أنها مش سحر ... و لازم الكلاينت (طالب العلاج) يتحمل مسئولية حياته و قراراته، انما فكرة أن انا حروح اعمل constellation سيشن و كل حاجه حتبقي تمام، دي فكره طفوليه، و غير واقعيه... و مابتأديش لأي تغيير في وعي طالب العلاج .
و حتي اللي اتفرج علي شغل Bert Hellinger (مؤسس التقنيه دي) أو حضر ليه اي سيشن، حيعرف أن الجانب الأساسي في التحسن، مرتبط بطالب العلاج
٢- ساعات كتيره ال constrllator /space holder / المُعالج بالتقنيه دي بيحس بحاجات أو بيبقي عنده insights عن اساس المشكله ممكن يبقي ايه، إنما ده مش معناه أن الحاجات اللي هو حاسسها دي حقيقه... و دور المعالج أنه يختبر الحاجات اللي هو حاسسها دي في السيشن ، و بعدين علي أرض الواقع ...
لأن مش كل ال insights اللي بيحسها المعالج صح، و لا كل حاجه هو عارفها محتاج يقولها (حتي لو كانت صح)... و ده مش كلامي ..ده كلام Bert Hellinger نفسه !
٣- التقنيه دي هدفها أن الشخص يعرف حاجات عن نفسه علشان يطورها و يبقي عنده سلام نفسي ...مش هدفها اني "اشوف حاجات أو اعرف حاجات عن الناس اللي في النظام العائلي بتاعي أو بتاع ناس تانيين" " ..أو اني "افتح المندل" و اشوف لو جوزي فيه حد تاني في حياته! ... لو عايزين نكشف المستور أو نعرف اسرار ...يبقي ده مش family constellation... و لا المكان بتاعه هنا!
٤- ال constellation مش أساسها أن المعالج يشوف حاجات، أو أن ال representative يحس بحاجات و هو في ال field...
فيه اساسيات اسمها orders of love ...اتكلم عنها Bert كتير في شغله ، من غير ما المعالج يعرف ال orders of love (اللي ممكن نعتبرها قواعد ال constellation )، اي شغل constellation حعمله، مش حيساعد... و ممكن يضر ...
٥- الconstellation هي تقنية علاج و تطور للوعي، إنما مش سحر... بمعني ان لو انت عندك مشكله في شغلك مع مديرك...ممكن يكون السبب النظامي بتاعها في الأصل هو علاقتك مع باباك، و ممكن تتحل عن طريق التقنيه دي، إنما لو فضلت تروح الشغل كل يوم متأخر ، و تلعب games علي الموبايل، و تقول أنا عملت constellation و كل حاجه حتبقي تمام... حتترفد 😁
نفس الفكره أن لو عندك مشاكل ماديه، و عملت constellation، ممكن الشغل يساعد أنه يفتح شوية ابواب جديده كانت مقفوله لأسباب مرتبطه بالنظام العائلي بتاعك، إنما لو انت مادخلتش في الابواب دي و بذلت مجهود ، و قررت تقعد في البيت مستني حد يخبط عليك و يديك شنطة فلوس... يبقي اوعدك انك حستني كتير ....قوي
٦- الفكره من ال constellation هو اني اشتغل علي نفسي ، مش اني احل مشاكل العالم، أو اني اشتغل علي حد من وراه، فلو حد رافض أنه يشتغل علي نفسه (و كبير و عنده القدره العقليه أنه يفكر لنفسه ) ماينفعش اروح اعمل جلسه عليه من وراه...
بمعني آخر ماينفعش اشتغل بالنيابه عن جوزي أو عن امي أو حتي عن اولادي ( الا لو كان سنهم أقل من ١٦ سنه) أو أي حد تاني غير نفسي! و اي محاوله لتغيير حياة حد علشان احنا شايفين اننا فاهمين اكتر منه...يبقي مش من حقنا ( حتي لو احنا شايفين أن اللي بنعمله ده في مصلحته!)
تاني ...ال constellation مش سحر ولا حاجه حنعملها و كل حاجه بعدها حتبقي تمام (لو كانت الحياه كده كان حيبقي فيلم كوميدي ! )، ال constellation ده علم، و زي ما محتاج ان يكون المعالج بالتقنيه دي كويس ، زي ما طالب العلاج لازم يكون عنده الالتزام و تحمل المسئوليه اللي عليه في العلاج ...
اتمني أن كلامي ده يكون واضح ، لأني قريت و سمعت عن ممارسات كتيره تحت اسم ال family constellation و هي بعيده جدا عن اساس الشغل اللي عمله Bert Hellinger... لدرجة أن فيه حد جالي و قالي أنه عمل سيشن بره مصر و وصفلي ايه اللي حصل ...و الموضوع كان أشبه ما يكون بمسرحيه هزليه ...مش تقنية علاج !.
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
