- Monir El-Shazly
- Aug 18, 2024
ليه فيه ناس بتدخل في علاقات ورا بعض؟
------
كنت كتبت قبل كده عن السبب ورا ان معظم الناس بتدخل في علاقات هي مش دايما راضيه عنها و بتقنع نفسها بيها علشان تستمر... رغم انهم عارفين (و ساعات متأكدين) من ان العلاقه دي مش كويسه ليهم... و علشان كده بيضيعوا جزء كبير من حياتهم في علاقات مش ناجحه، و حياتهم بتضيع و هم في معظم الوقت مش مستمتعين بيها ....
السبب في رأيي ٣ حاجات اساسيه...
اول حاجه طبعا هو علاقتهم بأهلهم.. و خاصة الام (في حالة الرجاله) و الاب (في حالة الستات). لأن معظم الناس بيدوروا ( بعقلهم الواعي) علي حد من الجنس الاخر يديهم حاجات هم حاسين أنهم ماأخدوهاش او نفسهم فيها من الاب (غالبا في حالة الست) او الام (غالبا في حالة الراجل).
طبعا نوعية العلاقات دي بيبقي فيها اضطراب كبير (dysfunctional relationships ) علشان دور الام او الاب بيختلف بشكل تام عن دور الزوج أو الشريك!. و كلام الافلام و المسلسلات بتاع "انتي مراتي و بنتي و امي" ، او "انت اخويا وابويا و ابني" ده كلام ضار جدا، و دائما مشاكله بتظهر بعديها علي طول!
علشان كده مهم جدا قبل ما حد يخش في علاقه انه يحاول يوصل لسلام نفسي مع الام (في حالة الراجل) او الاب (في حالة الست).
السبب التاني في رأيي ان معظم الناس خايفه تكون لوحدها انهم مابيحبوش نفسهم كفايه و مستنيين تقدير (validation ) من حد براهم علشان يحسوا أنهم كويسين.... و ده بردو راجع بشكل كبير لأسلوب التربيه و المفاهيم اللي اتحطت في دماغهم عن نفسهم... و لتخيلهم ابوهم و امهم شافوهم ازاي بردو !.
لو انا مابحّبش نفسي يبقي اكيد مش حبقي عايز اقعد معاها لوحدي :-) . و ححاول دايما ادور علي حاجه (او حد) يشغلني عنّي او حد يكملني او ينقذني من الضياع ! . وعلشان كده واحده من علامات الرقي و التطوّر الروحاني عند الناس هو قدرتهم علي انهم يكونوا لوحدهم من غير ما يدوروا علي حاجه تشغلهم او من غير ما يحتاجوا حد يكون معاهم.
السبب الثالث ساعات هو حاجه بنشوفها في الشغل بتاعنا اسمها "متلازمة التوأم المتلاشي" او "متلازمة التوأم المختفي"
(#Vanishing_twin syndrome )
و دي حاله يقال إن نسبة حدوثها من ١٠-١٥٪ من مجمل حالات الحمل في العالم، و معناها ببساطه إن كان فيه توأم (واحد او اكتر ) للطفل اللي جه، بس التوأم ده اتوفي في بداية الحمل (و حتي ساعات بيتوفي في البدايه خالص لدرجة أنه بيظهر في السونار كتجمع دموي ) و بيخرج من الأم في صورة دم أو نزيف بسيط في بداية الحمل أو ساعات بيتحول لغذاء للطفل التاني! .
المهم أن الطفل التاني (surviving child) اللي بيتولد بعد كده بيبقي غالبا عنده شعور غير مفهوم بالوحده، و ان "ناقصُه حاجه" علي طول... و كتير جدا بيبقي "بيحِب علي نفسه" و عايز يخش في علاقات ورا بعض علشان الشعور بالوحده اللي عنده. كمان الناس دي غالبا بيبقي عندها مشكله في تحديد اتجاهاتها في الحياه و صعوبه في معرفة هم عايزين يشتغلوا ايه او في انهي مجال.. او حتي في بعض الأحيان بتأثر علي هويتهم الجنسيه ( بس ده موضوع تاني ممكن نبقي نتكلم فيه بعدين).
في رأيي الشخصي، (و الكلام ده لكل واحد خايف يكون لوحده!)، لو انت مش مستحمل تكون لوحدك مع نفسك، تعتقد مين حيقدر يستحمل يكون معاك مده طويله؟
علشان كده ..قبل ماتبقي عايز تحِب حد و تخش في علاقه.. حِب نفسك الاول و احترمها علشان لما تخش في علاقه الشخص التاني يتعلم يحترمك بردو! !
و لو انت شايف أن أي سبب من السببين الاولانيين مُنطبق عليك، تبقي محتاج تشتغل علي نفسك...
اما لو السبب الثالث هو اللي بيوصِفَك اكتر، تبقي غالبا محتاج تشتغل عليه مع حد بإستخدام طريقة "النظام العائلي" ( #familyconstellation ) علشان علي حد علمي هي دي اكتر طريقه ممكن تساعدك علي تعديل المشكله دي ....
بس في كل الحالات ...و سواء كان سبب واحد لو كلهم، لو انت ما اخدتش المسئوليه بتاعت تطوير نفسك ...مفيش حاجه حتتغير !
*تحديث ...احنا هنا بنتكلم علي فكرة العلاقات المتتالية اللي ورا بعض ... إنما طبعا واحد من أسباب فكرة العلاقات المتعدده هي الدوافع و الرغبات الجنسيه المكبوته ( sexual needs)... اللي في المجتمع الشرقي غالبا بتحصل تحت مسمي "العلاقات العاطفيه "
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual