- Monir El-Shazly
- Aug 30, 2024
احسن حاجه نقدمها لأولادنا!
------
بمناسبة اني اتكلمت كتير في الفتره اللي فاتت علي العلاقه مع الاولاد... ناس كتير سألتني ايه هي احسن حاجه ممكن نقدمها لولادنا ..
في رأيي، و من خلال شغلي في المجال النفسي، احسن حاجات ممكن نقدمها لأولادنا هي بالترتيب :
١- اننا نشتغل علي نفسنا!
وده لأن لما نشتغل علي نفسنا و نحل مشاكلنا ده حيخلينا ما نشيلهمش مشاكلنا ولا نطلعها عليهم! .
علي النقيض من كده ، لما نكون مليانين مشاكل و غضب و شعور بالفشل، كل ده حيأثر علي تعاملنا معاهم و حيروحلهم بشكل مباشر او غير مباشر !
٢- حبنا الغير مشروط!
الاولاد لازم يحسوا اننا بنحبهم، سواء كانوا ناجحين أو لأ، ابطال العالم أو ساقطين في ملحق أولي ابتدائي !
ده مش معناه اننا مانربطش نجاحهم أو تفوقهم بحاجات تحفزهم، و اننا نبين ليهم اننا بنتبسط لما بينجحوا أو بيكسبوا ميداليات، بس انبساطنا بنحاحهم حاجه ...ممكن تروح و تيجي ...إنما "حبنا ليهم ...ده لازم يحسوا أنه موجود علي طول " ..و لازم نقولهم كده بالكلام و بالافعال (الاحضان و القُرب).
٣- وقتنا... واهتمامنا بيهم و وجودنا معاهم!
اهتمامنا بيهم و وجودنا معاهم اهم بكتير من اننا نجيبلهم لعب و ندخلهم احسن مدارس و نطلعهم ابطال جمهوريه.
لازم نقضي وقت مع كل طفل لوحده ، و معاهم كلهم ... الوقت ده لازم نسألهم فيه عن حياتهم و يحكولنا فيه عن "إنجازاتهم اليوميه" 🙂. و لازم الوقت ده نديلهم فيه انتباهنا الكامل، و مايبقاش وقت مقطوع بمكالمات تليفون أو حوارات مع الزوج او الزوجه !
الطفل اللي بيحسّ انه مش متشاف من اهله ( مش واخد اهتمام كفايه) بيطلع عنده مشاكل كتيره من اول قلة الثقه في النفس لصعوبة انه يقول لا في حاجات او ياخد قرارات... ده طبعا غير انه بيعيش طول عمره بيدور علي الاهتمام ده في ناس تانيه (و مابيلاقيهوش)
٤- الحاجه الرابعه أن كل واحد من الأبوين يحترم التاني ... سواء كانوا مع بعض أو منفصلين!...
كل ما الطفل بيحس أن أهله بيحترموا بعض، ده بيديله شعور بالأمان و الحريه أنه مسموحله يحب كل واحد فيهم ... و أنه مش محتاج ياخد صف امه ضد ابوه (علشان امه ماتزعلش)..أو العكس.
الطفل اللي أهله مابيحترموش بعض، بيبقي دائما محتاج ياخد صف حد فيهم ضد التاني، و ده اسوأ اختيار لأي طفل، و من اكتر الحاجات اللي بتتطلع الطفل غضبان في الحياه!
احسن التعليم... احدث iPhone ... اخر Play station، اغلي لبس.. كل الكلام ده مش حيخليهم سعدا في الحياه و لا حتي حيفتكروه بأهميه قوي لما يكبروا ... لو الحاجات اللي قولتها دي مش موجوده!.
YouTube: Monir El Shazly
Facebook page: @monirelshazlyspiritual
Instagram: @monir.elshazly.spiritual
