- Monir El-Shazly
- Oct 17, 2024
بعد الكلام اللي كتبته امبارح عن كم المشاكل المخيف اللي بشوفه و اللي العلاقه الجنسيه بين الزوجين سبب رئيسي فيه، و تأثير ده علي الاطفال ، ناس كتيره سألتني عن نوع المشاكل اللي ممكن تحصل للاطفال لما العلاقه بين الزوج و الزوجه مابيكونش فيها استمتاع و تواصل بين الطرفين ...
وجود العلامات دي "ممكن" يبين أن فيه حاجه محتاجه الاهل ياخدوا بالهم منها...هي مش دليل قاطع ..بس احتمال كبير ...
١- الاطفال الصغيرين يبتدوا يلمسوا أعضائهم التناسليه كتير ( مش بشكل فيه استكشاف بس، إنما بشكل مستمر ) و من سن صغير بعيد عن سن البلوغ
٢- الاطفال الصغيرين يبقي عندهم الرغبه في لمس أو استكشاف الاعضاء التناسليه للأم او الأب بشكل مستمر
٣- رغبة الاطفال من سن صغير في مشاهدة لقطات العلاقه الحميميه او التقبيل في الافلام ... (لدرجة أنهم حتي ممكن يعملوها من ورا الاهل )
٤- و طبعا العلامه الاهم هي وجود حالات تحرش للاطفال من أقارب او ناس بتتردد علي البيت .
حالات التحرش بالأطفال الصغيرين ممكن في أحيان كتيره يكون سببها أن العلاقه الجنسيه بين الأب و الأم فيها مشاكل ( بس ده موضوع صعب شرحه هنا) ...
الاطفال بيبقوا عاملين زي الاسفنجه اللي "بتشرب" كل حاجه من الاهل، لما بيكون فيه مشاعر او رغبات مكبوته عند الاهل ...الاطفال غالبا بيعبروا عنها بالنيابه عنهم ...عن طريق العقل اللاواعي (علشان بيبقوا حاسين بالمشاعر بتاعة اهلهم)...
الخلاصه هنا أن لو #العلاقه_الجنسيه بين الزوج و الزوجه فيها مشاكل، فده حيأثر علي الاولاد بشكل systemic ... حتي لو الاب و الام كانوا "كاتمين في قلبهم و ساكتين ".
و علشان كده، مهم قوي أن الطرفين يكونوا مستمتعين و كل طرف يحاول يتأكد أن الطرف الآخر مستمتع بردو، و ده في رأيي مش حييجي إلا لو ثقافتنا الجنسيه عن نفسنا و عن الجنس الآخر زادت... و شيلنا من نظرتنا لجسمنا الشعور بالعار ...و حطينا مكانها الاحترام!.
YouTube: Monir El Shazly
Facebook page: @monirelshazlyspiritual
Instagram: @monir.elshazly.spiritual
