هل انا مسئول عن ابويا و امي ؟

لما بتكلم عن العلاقه مع الام و الاب، انا دائما بقصد أن قلب الشخص يبقي مفتوح ليهم (سواء كانوا عايشين او متوفيين)، إنما مش بقصد خالص أن الشخص يحس *بمسئولية* ناحيتهم.

فيه فرق كبير بين اني اساعد اهلي ( و دي حاجه مهمه و لازم تحصل لما يكبروا في العمر لو يبقوا محتاجين مساعده مني - سواء ماديه أو جسديه لو كان سنهم كبير) ...و بين اني احس "بالمسئوليه " عنهم ...و عن قراراتهم في الحياه !.

دائما الام و الاب هم الاكبر، و هم اللي عندهم خبرات في الحياه بشكل عام اكتر مننا، و دائما فيه شعور عند الام و الاب فيه نوع من أنواع المسئوليه عن الاولاد ..مش العكس.

بلاقي ناس كتيره بيقولولي أنهم *خبوا* عن أهلهم اخبار معينه علشان متخيلين أنهم مش حيعرفوا يتعاملوا معاها، أو ناس بيقولوا انهم مابيتكلموش مع أهلهم عن حياتهم او مشاكلهم *علشان مايزعلوهومش*.

و الحقيقه علي النقيض من الكلام ده، شعور الام و الاب بالمسئوليه عن أولادهم، غالبا بيفضل مستمر معاهم لغاية ما يموتوا و ده اللي بيخليهم ساعات بيتدخلوا في حياة أولادهم بشكل زايد (حتي لو شكل المسئوليه أو التدخل ده اختلف مع الوقت). مش بس كده، ده كمان الاهل اللي بيحسوا أن أولادهم مش محتاجينهم، بيتولّد عندهم شعور أن *دورهم في الحياه خلص* و ده اللي بيخليهم ساعات يحاولوا يتدخلوا زياده ...و ساعات يمرضوا (علشان يجذبوا الإنتباه)... او يمرضوا فعلا (نفسيا او عضويا) علشان احساسهم أنهم مالهومش لازمه و أن دورهم في الحياه انتهي!

انا بقول الكلام ده علشان اكتشفت أن كتير لما بتكلم علي العلاقه مع الام و الاب أن فيه ناس بتاخد كلامي و تحس بالمسئوليه عن أهلها ...و ده عكس اللي انا بقصده تماما !

الاهل هم الاكبر، و هم المسئولين ...دورنا أننا نفتح قلبنا ليهم و نتقبلهم (هم و قراراتهم )... و ده حينعكس بشكل ايجابي علي علاقتنا بيهم (و ده هو الأصل في موضوع *بِر الوالدين* في رأيي )...

إنما فكرة اني اشوف نفسي اكبر من ابويا و امي و مسئول عنهم و عن حمايتهم من نفسهم... و الكلام (الفارغ) بتاع أنهم لما بيكبروا بيرجعوا اطفال تاني، دائما بيأدي لنتائج عكسيه و بيخلي العلاقه معاهم تسوء!.

الاب و الام هم الأكبر...

و الأكبر هو المسئول عن الأصغر (مع اختلاف شكل و طبيعة المسئوليه مع تطور عمر الأصغر طبعا!)

جمله اخيره كمان ... طول ما انا اصغر من ابويا و امي ...حبقي دائما أكبر من اولادي .. إنما لما احس نفسي اكبر من ابويا و امي ...اولادي حيجيلهم وقت و يكبروا عليا!

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: Monir.elshazly