نصائح في العلاج النفسي و التطور الروحاني

مجموعه من النصائح اللي ممكن تساعد في موضوع العلاج النفسي و التطور الروحاني

١- مش كل شخص متضايق منه أو بتكرهه أو كل اب أو أم كانت قاسيه معاك تبقي "شخص نرجسي"... المسميات اللي بتتحط عمال علي بطال دي بتبوظ العلاقات ...مش بتساعد علي الشفاء من المشاكل

٢- مش كل تجربه صعبه مريت بيها تبقي trauma

٣- العلاقات العاطفيه مبنيه علي تبادل الاحتياجات ... مش لازم كل شخص نبقي محتاجين منه حاجه نسميه "حب"

٤- طريق العلاج النفسي و التطور الروحاني مش سهل، و مفيش حد ممكن يمشيه ليك غير نفسك.. و محتاج استمراريه ...

٥- الحياه مش صعبه ...ولا سهله ...الحياه زي ما انت عايز تشوفها (و مستوي ادراكك ليها ممكن يغير شكلها في عينيك تماما! )

٦- ال affirmations مش حيشتغلوا الا لو غيرت طريقة تفكيرك و ادراكك اتغير ... غير كده تبقي في الغالب بتضحك علي نفسك !

٧- مش كل مشكله بتمر بيها معناها أن ربنا غضبان عليك... احنا بنمر بتجارب علشان نتعلم منها في الحياه و نتطور!

٨- دعاءك لربنا مش مُلزِم ليه، و إجابة دعاءك مش شرط تكون باللي انت عايزه، إنما دائما باللي انت محتاجه (حتي لو انت مش عارف كده دلوقتي)

٩- بُعدك عن امك و ابوك و مشاكلك الكتير معُاهم ...بتجيب غضب و تقلبات مزاجية علي المدي القصير، و اكتئاب علي المدي الطويل.

العلاقه مع الاهل هي أهم علاقه في حياتك..و هي النموذج اللي بتجتذب علي اساسه معظم العلاقات التانيه

١٠- مش دورك انك تنقذ اي حد في الدنيا... و لا دور اي حد أنه ينقذك ...

ممكن تساعد اي حد او اي حد يساعدك ..إنما ماحدش حينقذ حد، غير نفسه!

١١- انك تروح الهند او انك تروح retreat او تاخد كورس كوتشينج، او تغير اسمك لأسم هندي بعد ما تخلص كورس اليوجا، مش معناه انك "وصلت" و بقيت enlightened...

الموضوع بياخد وقت و شغل علي نفسك ...

و دلالة التطور الروحاني حتبان عليك لما تلاقي عندك سلام نفسي و غضبك اختفي ...و كمان احترامك للناس بمختلف أفكارهم و طوائفهم يزيد...

١٢- الموضوع مش سباق علي مين اللي حيوصل الاول ... لو حاسس أنه هو سباق، يبقي انت لسه في بداية الطريق!

١٣- تشخيص اي therapist او كوتش ليك أو لحد تاني مش معناه أنه صح ... ناس كتيره بتحب تقول كلام كبير ..بس مش كل الكلام صح ...

و حتي لو التشخيص صح، المهم هو التحسٌن مع العلاج، مش التشخيص!

١٤- اي علاج بالطاقه، من غير مايكون معاه تغيير في طريقة التفكير و النظره للحياه، غالبا حيبقي علاج وقتي... لازم الوعي يتطور علشان العلاج يجيب نتيجه مستديمه

و اخيرا

١٥ - الحب كلمه معظم الناس بتقولها علشان تدٌي لنفسها مبرر تستمر في اي علاقه مؤذيه ليها ...

الحب مش سبب كافي لأن العلاقه تستمر ...

اهم حاجه في العلاقه هي الراحه (الراحه انك تكون نفسك..من غير خوف أو انتقاد)، و القدره علي انك تتطور في الحياه ...

معظم اللي الناس بتسميه حب، هو شوية تشبيكات نفسيه علي مستوي العقل الباطن ( و ليها علاقه بعلاقتنا مع الام و الاب)

فلو علشان انت قاعد في العلاقه بس علشان بتحبها (او علشان بتحبيه) ...يبقي احسنلك تمشي ... و تشوف ايه سبب "التعلق" ( مش الحب) اللي خلاك تبقي في علاقه زي كده

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: Monir.elshazly