منفصل عن الواقع
- Monir El-Shazly
- Jul 7
- 2 min read
ناس كتير بتسألني مستغربه ازاي انا قادر احط بوستات فيها ايجابيه و نظره مختلفه للحياه مع كل الصعوبات و الازمات الاقتصاديه اللي العالم بيمر بيها علي مختلف المستويات و الطبقات... ناس منهم معجبين باللي انا بأعمله... و ناس تانيين شايفين اني *منفصل عن الواقع* و عايش في مكان تاني :-) .
و الحقيقه ان الاجابه علي السؤال ده بسيطه جدا... "انا باختار الحاجات اللي اركّز فيها و الحاجات اللي انا مأضيعش فيها وقتي".
حاله العالم صعبه؟... اه..
هل الوضع حيستمر؟. مأعرفش.
هل انا في ايدي حاجه اعملها علشان اأثر في الكساد اللي في العالم و الاسعار اللي ارتفعت و الناس اللي سابت شغلها ؟ .. لأ ...
يبقي مش حضيّع وقتي في الهريّ او الخوف من اللي حيحصل... و حركّز في اللي ممكن اعمله علشان ماابقاش سبب في ان المشكله تزيد .... و اساعد الناس اللي ممكن تكون الظروف و الكورونا اثروا عليهم نفسيا (من خلال شغلي) او ماديا (لو كانوا محتاجين)!
الفكره هنا تتضمن مفهومين مهمّين و مرتبطين ببعض. "الحياه في اللحظه" أو "الحضور" (being present ).. مش في *امبارح كان عامل ازاي*.. او *بكره حيحصل فيه ايه* ...
و المفهوم التاني هو التخلي (#detachment)... و ده معناه ان الواحد مايتعلقش بحاجه كانت موجوده.. او بتصور معين و يتخيل أن الحياه المفروض تكون عليه.... و مايركزش تفكيره في الحاجات اللي مش في ايديه ( زي الامراض و الوفيات و الاسعار اللي بتزيد ...و الحاجات دي).. و يركّز تفكيره في الحاجات الحلوه اللي في حياته و النِعم اللي ربنا اداهاله و لو في أيده حاجه ممكن يغير بيها وضع مش عاجبه !
هل انا اتولدت بالتفكير ده ؟... لأ.
بس اشتغلت علي نفسي لغاية ما وصلت لطريقه معينه للحياه و التفكير مريحاني :-)
و المهم في الموضوع اني عارف ان حياتي ليها أجل معين، فمش محتاج اخاف من الموت، و ان الرزق بتاعي حيجيلي في اي حته.. و بأي شكل...و لا الامراض و لا التغيرات الاقتصاديه، ولا الكساد و لا الجن الازرق ممكن ياخد الرزق اللي ربنا كاتبهولي منّي.
و ده في حد ذاته فكره مريحه و مخلياني اقدر اركز الي الحاجات الحلوه في حياتي .. و احمد ربنا عليها!
صباحكم جميل !
(إعادة نشر)
*بالمناسبه انا عامل فيديو عن الموضوع ده و اسمه " منفصل عن الواقع" . حتلاقوه علي قناة اليوتيوب بتاعتي
YouTube: Monir El Shazly
Facebook page: @monirelshazlyspiritual
Instagram: Monir.elshazly
Comments