مش مهم الناس ترضي عنك !

——-

زمان و انا صغير.. كان بيلفت نظري الكلام اللي من نوعية “الانسان ايه غير سمعته؟”…. و “الناس حتقول عليك ايه؟ “. و الحقيقه انا عشت جزء (الحمد لله مش كبير) من عمري خايف من كلام الناس و بحاول ارضيهم… لغاية ما اكتشفت انّي مش محتاج اعمل كده…. و ده كان واحد من اكبر نقط التحّول في حياتي!. الحقيقه ان الناس اللي بتتكلم عنك كويس انهارده علشان كلامك او قناعاتك عاجباهم ..همّ نفس الناس اللي ممكن تتكلم عنك وحش بكره لو ارائك او افعالك خالفت رأيهم و قناعاتهم!. فأنت محتاج تسأل نفسك ، هل انا محتاج ابني سعادتي علي رأيهم…. اللي ممكن يتغيّر بين يوم و ليله ؟ لو سألتوا ناس عليا… ممكن تلاقوا ناس بتتكلم عني كويس جدا… و ممكن بردو تلاقوا ناس مابتحبّنيش. طب انا مين فيهم ؟… انا بني ادم… فيّ حاجات كويسه…و اكيد فيّ حاجات لسه محتاج اشتغل عليها… اكيد عملت حاجات كويسه في حياتي… و اكيد عملت حاجات ممكن تكون ضرّت حد في يوم من الايام! انت مش محتاج تكون كامل( perfect )… و لا محتاج تاخد الرضا بتاع الناس كلهم.. لأن ده عمره ما حيحصل. بدل ما تسجن نفسك في سجن ” الناس حتقول ايه”.. اطلع بره السجن و خليك صريح مع نفسك. اقبل نفسك و حاول تطورها لو محتاحه تطوير… خلي علاقتك بربنّا مبنيه علي اللي انت حاسس بيه…اعرف ربنا معرفه شخصيه.. بدل ما تسمع عنّه من الناس… حب نفسك… لأنك عمرك ما حتعرف تحب الناس.. لو انت عايش في سجنهم .!. انت مش سمعتك. #منير_الشاذلي

#Monir_El_Shazly