مسلسل ريڨو

كنت كتبت بوست من يومين علي مسلسل #ريڨو ، و قد ايه في رأيي أنه عمل "حاله حلوه" عند كل اللي اتفرجوا عليه ... و بعد البوست ناس بعتتلي و طلبت مني اني اتكلم عنه من خلال تحليلي للجانب النفسي للشخصيات و ايه سبب الحاله الحلوه اللي عملها المسلسل عند الناس ...

في البدايه احب اقول ان كتابة المسلسل ل #محمد_ناير كانت معموله بشكل ممتع جدا، و الإخراج ل #يحيي_اسماعيل كان جميل جدا، و بأستثناء حلقتين تلاته (علي مدار الجزئين)، إيقاعه كان سريع و مفيش فيه ملل خالص .

كمان الأداء التمثيلي لمعظم الابطال كان كويس جدا ، و ان كان احلي أداء في رأيي كان ل #صدقي_صخر (مروان) و #ركين_سعد (مريم) و #حسن_ابو_الروس (اباظه) و #ساره_عبد_الرحمن (ياسمين رحمي) و #ميران_عبد_الوارث (نور) رغم قصر دورها...

و طبعا الموسيقي التصويريه ل #ساري_هاني و الاغاني اضافت كتير للمود بتاع الفيلم و لإستمتاعنا بيه ...و كمان إدت بُعد كبير للمواقف اللي بيمر بيها الابطال.

علي المستوي النفسي ، معظم الشخصيات كان بنائها الدرامي معمول حلو (رغم أن مش كلها خلفيتها النفسيه كانت واضحه و كان فيه شوية loose ends ، بس يمكن ده بيمهد لأن يبقي فيه جزء ثالث بيتكلم عن الخلفيات بتاعت الشخصيات الرئيسيه) ، إلا أن تطور الشخصيات في المجمل علي مدار الحلقات كان طبيعي و سهل تصديقه!.

نيجي بقي لشوية حاجات نفسيه كانت واضحه جدا في الفيلم و بشوفها علي طول في الشغل بتاعي :

١- الولاء المستتر ( #HiddenLoyalty )

و ده معناه اننا بنفضل مرتبطين بأشخاص معينه في السيستم بتاعنا من خلال صفات و تصرفات، حتي لو مش عارفين الأشخاص دي مين...

الولاء ده ممكن يبقي لأب أو ام (حتي لو احنا مش عارفينهم ) و بنشوف ده واضح جدا في صفات رامي مع شادي #امير_عيد ، أو ممكن يبقي بين الابن/البنت مع شخص كانت أمه (أو ابوه) مرتبطين بيه قبل ما تتجوز ابوه ، زي ما ابن شريهان #نورا_شعيشع طلع بيحب الدرامز زي ماجد چورچ #تامر_هاشم .

موضوع الولاء المستتر ده كمان ليه ابعاد اقوي من كده بكتير و بشوفه علي طول في الشغل بتاع ال #familyconstellations (تقنية #النظام_العائلي أو ال #وقوف_عائلي )

٢- لما البنت بتبقي شايفه ابوها هو البطل الخارق و أن مفيش زيه في الدنيا، ده بيأثر بشكل سلبي علي علاقاتها العاطفيه، لأن مفيش اي راجل حيملي عينها بعد كده.

لازم ننزل الأم و الاب من علي منصة الابطال الخارقين، و نشوفهم في صورة بني ادمين (ممكن يغلطوا و ممكن اختياراتهم ماتبقاش صح طول الوقت). الكلام ده كان واضح جدا في حالة مريم اللي كانت حاطه ابوها في صورة بطل خارق، و ده اثر علي علاقتها بخطيبها و علي توقعاتها منه.

طبعا الكلام ده ينطبق علي الاولاد في علاقتهم بأمهم كمان!

٣- لما حد بيحاول يلعب دور الأم أو الأب للطفل (بدون احترام للام و الاب الأصليين أو بدون الاعتراف بيهم ) زي في حالة شادي اللي حسن فخر الدين #محسن_محيي_الدين حاول يلعب دور ابوه و كان دائما بيقوله "انا ابوك"، أو في حالة مريم لما خبوا عنها مين هي امها الحقيقيه ، ده بيخلّي الطفل يطلع عنده غضب .

الروح بتبقي دائما عارفه الحقيقه، و اي حد بنخبيه أو مابنعترفش بيه في السيستم، لازم يعمل شعور بعدم التوازن عند الناس اللي في السيستم ...عدم التوازن ده بيطلع في صور كتيره، بس دايما حيبقي فيه غضب عند الشخص، لو انا حبيت العب دور ابوه أو امه، بدون ما احترم الاب او الام الأصليين

٤ - الشعور بالذنب هو واحد من اسوأ المشاعر اللي الشخص ممكن يمر بيها، و لو ماتعاملناش معاه بشكل مظبوط ( غالبا عن طريق therapy أو كوتشينح كويس )، لازم الشخص حيوصل بيه الحال الي الادمان، أو الانزواء ( زي ما اباظه عمل و استشيخ و بِعد عن الناس ) أو حتي محاولة الانتحار ! - خصوصا لو كان الشعور بالذنب ده بسبب تفكيري أن حياة حد انتهت بسببي !

٥ - لازم الاهل يحسسوا أولادهم أنهم ليهم مكان في العيله ، لأن الاولاد لما مابيحسوش أن ليهم مكان (أو أن اهلهم مش متقبلينهم كفايه)، حيبقي رد فعلهم في أحيان كتيره انهم يعملوا مشاكل، و في أحيان تانيه انهم يعملوا شلل أو ينضموا لجماعات علشان يحسوا بالانتماء لحاجه!

٦ - اخر حاجه احب اقولها ، هي أن المسلسل كله كان مبيّن أن الدافع الأساسي لتصرفات الأشخاص هو الحب ، حتي لو كان الحب ده طريقة التعبير بتاعته كانت مش هي الطريقه المناسبه، أو كان علي حساب أشخاص تانيين. إنما المسلسل نجح في أنه يظهر الابعاد و الدوافع الطيبه للاشخاص (مش بس الجوانب الشريره). و ده في رأيي نجاح كبير ، و خلي الناس تتعاطف مع الشخصيات الموجوده في المسلسل، لأن كلنا فينا الجوانب دي بنسب مختلفه، و كلنا عندنا اسبابنا و مبرراتنا لتصرفاتنا!

مسلسل ريڨو نجح في أنه يعمل حاله جميله عند الناس اللي اتفرجت عليه، و نجح في أنه يرجعنا لوقت جميل الحياه فيه كانت ابسط... و الموسيقي فيه كانت احسن !

شكرا لصناع الفيلم و لكل طاقم العمل ...و لأغاني #كايروكي و امير عيد !

* نفسي يبقي فيه اهتمام أكبر بأدوار الtherapists في المسلسلات، لأني للاسف معظمها بيبقي مكتوب بشكل ضعيف و كلامهم بيبقي سطحي... حتي في المسلسل هنا، رغم أن شخصياته مكتوبه و مدروسه بشكل كويس ، إلا أن دور ال therapist في المصحه كان من أضعف الأدوار للاسف!.

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual