لو عايز تكون محترم!

ده تخين “قوي”. دي رفيعه ” زياده “… ده “حمار ” مابيفهمش…. ده “عمره ماحيورد علي جنّه.” … دول “احفاد القرده و الخنازير” …. دول “رايحين النار حدف”.. ده “غبي قوي ” دي “شر***ه “…. ده “ابن ك**” واطي…….. ده…. دي…. دول….

كلام كتير بقي بيتقال و الناس بقت متقبلاه كجزء من حياتنا اليوميه و بتقوله في حواراتها اليوميه كنوع من انواع الدعابه ساعات…او السخريه ساعات تانيه.. . او طبعا كنوع من انواع اصدار الاحكام علي الناس التانيين بناء علي حاجه سمعوها عنهم…. او عن تعامل ليهم معاهم او عن طريق افلام شافوها…… او “للاسف ” عن طريق خطب سمعوها من ناس “بتوع ربنا ” !

المشكله ان الناس “اللي بتقول الكلام ده “… هي هي الناس “اللي بتشتكي من كلام الناس عليها ” و قد ايه المجتمع ده مجتمع وحش و بيحكم علي الناس و مش سايب الناس في حالها!. و هي هي الناس ” اللي نفسها الناس تتقبلها زي ما هي ” و بتعاني من نظرات الناس ليها او كلام الناس عليها.

المجتمع و البلد هي مجموعه كبيره من الناس عايشين في مكان واحد. … فلو عايز تغير حاجه انت متضايق منها ابتدي بنفسك…. اعرف ان “كما تدين تُدان ” و بطّل تحكم علي الناس و علي اخلاقهم و قربهم من ربنا.. و بما ان ما فيش حد فينا بدون اخطاء ، فبلاش نرمي الناس بالطوب ….

لو عايز الناس تسيبك في حالك…. سيب الناس في حالها .

و لو عايز تقرّب من ربنا….. بطّل تلعب الدور بتاعه و تحكم علي اخلاق الناس و علي قربهم او بعدهم عنه.

و لو عايز يكون دمّك خفيف…مش لازم تكون الطريقه انك تتريق علي اللي انت شايفه تخين او غبي او مش متعلّم ..

بطّل تشوف نفسك احسن من الناس…. و تحكم عليهم و علي تصرفاتهم….

لو عايز تكون محترم….. احترم الناس!

#منير_الشاذلي

#Monir_El_Shazly

* جرّب تقضي النهارده من غير ما تحكم الي حد!