لو عايز تكون سعيد!

Monir El-Shazly
Jun 13, 2017
1 min read

بشوف بوستات كتيره الايام دي بتتكلم عن ان الام و الاب مش هما اللي خلفوا..انما هم اللي ربوا و شالوا مسئولية ولادهم. و رغم اني متفق مع فكرة ان الامومه و الابوه اكبر بكتير من مجرد الخلفه, الا ان معظم الطرق اللي بيتكتب بيها البوستات دي فيها غضب كبير علي الام و الاب اللي في نظر الناس اللي كاتباها (و كتير منهم شغالين في مجالات ليها علاقه بعلم النفس للاسف) ماقاموش بدورهم في تربية ولادهم و الاهتمام بيهم. من واقع خبرتي و تجاربي في مجال الشغل بتاعي (سواء كان coaching, healing , training ) احب اقول اني ماشفتش حد سعيد في حياته و هو عنده غضب ناحيه ابوه او امه (او الاتنين طبعا). اكتر من كده, الناس اللي عندها غضب, شعور بعدم الرضا في الدنيا…او حتي في احيان كتيره شعور بالاكتئاب, معظمهم عندهم مشاكل مع ابوهم او امهم … او عدم تقبل للقرارات اللي هما اخدوها. من ناحيه تانيه انا ماشفتش حد في حياتي سعيد و عنده #سلام نفسي و بيتكلم وحش عن ابوه او امه او عنده غضب ناحية قراراتهم او اختياراتهم. بغض النظر عن ربنا اتكلم عن اهمية العلاقه مع الوالدين في كل الديانات , مبدأ التصالح و التقبل ( reconciliation) مع #الام و #الاب و الوصول لسلام نفسي معاهم هو احد اهم مبادئ #السعاده و #الرضا ..ان ماكانش اهمها علي الاطلاق. لو عايز تكون سعيد و عندك سلام نفسي… مش ممكن تلاقي ده من غير ماتعدي علي امك و ابوك الاول!