لو انت في علاقه مش مريّحاك ... و مش عارف تخرج منها... احتمال يكون ده السبب!

كتير بشوف ناس في علاقات متعبه بالنسبالها ، بس مش قادره تمشي منها.

معظم الناس دي لو سألتها ايه اللي مقعدكوا حيقولوا "اصل انا بحبّه" او "اصل انا مش قادر اتخلي عنها ". و علي الرغم من اني اتكلمت قبل كده علي خطورة ان الواحد يقعد في علاقه من النوع ده ، المره دي حقولكم علي رأيي في احد اهم الاسباب اللي بتخلّي الناس تقعد في علاقه متعبه (او في بعض الاحيان سامه) ليها.

السبب الرئيسي ان الشخص بيبتدي يلعب دور مش دوره في العلاقه . بمعني ان بدل ما الشخص يلعب دور الحبيب (او الحبيبه) في العلاقه ، بيبتدي يلعب دور الاب او الام للطرف الآخر. ده طبعا بيبقي بسبب ان الطرف ده محتاج حد يلعَبله الدور ده لأنه ما حسش بيه من ابوه او امه.

طبعا في اختلاف جوهري في نوع العلاقه اللي بين الاب او الام و بين اولادهم ، عن العلاقه اللي بين الحبيب و الحبيبه. نوعية التبادل العاطفي (exchange) في العلاقات اللي بين الاب (او الام) و بين الاطفال مافيش فيها هات و خد... علي عكس العلاقه اللي بين الحبيب و الحبيبه (او الزوج و الزوجه) اللي فيها تبادل مستمر.

فلو انا ابتديت العب دور ابو (او ام) حد في علاقتي بيه، حيبقي عنده توقعات (لا شعوريٱ) منّي اكبر بكتير من قدرتي علي التنفيذ. و ده بيبوظ العلاقه طبعا. (و في ساعات بلاقي الست بتلعب دور امه من ناحيه، و هو بيلعب دور ابوها من ناحيه... و ده مابيحلش المشكله... بيعقدها زياده

( double dysfuntionality) :-) .

كل واحد ربنا خلقه ليه دور... فلو ربنا ماخلقكيش ام حد، ماتلعبيش دور امه (لأن ربنا لو كان عايزك امه، كان خلقك امه فعلا) ، و لو في واحده بتدوّر علي حد يلعب الدور بتاعه ، ما تلعبوش انت لأن ده مش دورك، و لا عمرك حتعرف تديها اللي هي محتاجاه من ابوها (لأنك مش ابوها).

الخلاصه هنا ان في احيان كتيره لما حد بيبقي مش عارف يخرج من العلاقه ، و بيسمّي ده *حب* ، ده يبقي في الحقيقه تعلّق بدور اب (او ام) هو او هي بتلعبه في العلاقه... و طبعا الفرق كبير بين انك تسيب حد في علاقه مش مريحاك، عن انك تتخلي عن ابنك او بنتك!.

لو في علاقه مش عاجباك (او عاجباكي) و مش عارفه تخرجي منها .. احتمال تكوني بتلعبي دور مش دورك ....

ماتلعبيش دور مش دورك ( ولا تشيلي مسئولية حد، هو مش عايز يشيلها)!

(إعادة نشر)

#منير_الشاذلي

#Monir_El_Shazly

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual