لو انت ضحيه… الكلام ده مش حيعجبك

بعد البوست اللي كتبته علي انك مش محتاج تكون ضحيه… فيه ناس ماعجبهاش الكلام… و ناس تانيه كلمتني عن الضحايا اللي في حياتهم و يعملوا ايه معاهم. في البدايه… احب اقول ان الناس اللي شايفه نفسها ضحيه معظم الوقت بيبقوا غالبا ناس بيبرروا لنفسهم تصرفات هم بيعملوها ( تحت مسمي انهم غلابه و ان الناس هي اللي وحشه و هم اللي ابتدوا الاول) … و علشان كده ، مش غريب انك تلاقي حد وقفت جنبه كتير و هو ضحيه بيتخلي عنك عند اول ناصية شارع.. تحت مبرر انك عاملته وحش و هو (او هي) مش قادره تستحمل اكتر من كده…. او ان انت اللي عملت فيع كده! اما عن موضوع نعمل ايه مع الضحايا؟… في رأيي ان احسن حاجه تعملها مع الضحيه انك دايما تركز علي ايه اللي “هم” محتاجيين يعملوه علشان يحلوا مشاكلهم (مش انت ممكن تعملهم ايه) … و طبعا ماتركزش علي مشاكلهم. الضحيه مش عايز يحل مشاكله…علشان هو في معظم الاحوال من جواه عمل لنفسه هويه حوالين انه مظلوم و ان الناس هم اللي دايما وحشين. … و علشان كده هو من جواه مش عايز يحل مشاكله .. و حتي لو ان ساعدته … ففمعظم الاحوال حيدور علي حاجه تعطّل التحسن بتاعه. بشكل مبسّط.. .انت عمرك ماحتغير الضحيه( حتي لو كان الشخص ده اقرب شخص ليك). .. لازم هو اللي يحس انه محتاج يتغير… و لازم هو (او هي) تاخد الخطوه و تبقي مسؤله عن التغيير ده !. اه…و علي فكره…. طريقة تربيتنا بطلّع ضحايا كتير جدا للأسف. #منير_الشاذلي #Monir_El_Shazly