لام شمسيه

بعد الحلقه الاخيره الجميله من مسلسل #لام_شمسيه و بعد ما الناس استريحت أن الجاني ( الممثل الرائع #محمد_شاهين ) اخد عقابه، و ان الطفل يوسف (#علي_البيلي) تعافي من التجربه الصعبه اللي مر بيها ...فيه شوية حاجات ظهرت في المسلسل و احب اوضحها اكتر

.

١- كل جاني هو شخص كان مجني عليه في الأساس، و رغم أن المسلسل ما دخلش قوي في قصة وسام (محمد شاهين) و علاقته بأبوه و أمه (غير أن أمه كانت سايباه و ابوه كان شخص عنده نزعه ساديه ) ، إلا أن وسام و سلوكه هو نتيجه لحاجه حصلتله هو نفسه، و ماقدرش يتعامل معاها و يتعافي منها كطفل ، و أثرت علي أنه يسلك السلوك ده لما كبر

٢- دور الأم في حياة الأطفال هو دور محوري دايما، و لو ماكنتش #امينه_خليل اخدت بالها من يوسف (رغم أنه مش ابنها البيولوچي في الأساس) كل القصه دي ماكانتش حتشوف النور .

و من خبرتي في مجال الصحه النفسيه، الاطفال ( و المجني عليهم في قضايا التحرش بصفة عامه) ، دائما بيبقوا محتاجين يروحوا للأم و يحكولها، و لما الام بتسمع، و بتوفر الدعم المناسب، قدرة المجني عليه أنه يتعافي من اللي مر بيه، بتبقي اعلي بكتير .

إنما لما الام بتبقي أضعف من أنها تاخد موقف، أو لما الطفل بيحس أن الأم مش حتسمعه، أو أن اهتمامها بكلام الناس (و الفضيحه) اكبر من اهتمامها بيه و بسلامته النفسيه، ده بيخلق نوع من عدم الثقه بين الطفل و أهله، و ممكن يؤدي لأن الطفل يبقي جاني بعد كده بشكل أو بأخر ...

و ده الفرق بين اللي عملته ام يوسف و مقدمة الرعايه الاولي ليه (امينه خليل) ، و أمه البيولوجيه #اسيل_عمران ( في اخر المسلسل) مع يوسف، و بين اللي عملته ام وسام ( #صفاء_الطوخي) لما ابنها مالقهاش جنبه و هو صغير ، ولا لقاها جنبه و هو كبير (لما راحلها في الحلقه الاخيره و خبط علي الباب و رفضت تفتحله )...

دور الأم دور أساسي في التربيه، و في الصحه النفسيه للاطفال ..و علشان كده #توعية_المرأه و احترام مكانتها في المجتمع ده شرط أساسي لأي مجتمع سوي .

٣- وجود الاب و قربه من اولاده ( سواء كان الام و الاب مع بعض أو منفصلين) بيدّي للاولاد شعور بالدعم بشكل اكبر و مختلف عن الأم ... و الاولاد اللي بيبقوا مش قريبين من باباهم تحديدا بيبقوا أكثر عرضه للتنمر من الاولاد التانيه، و قدرتهم علي انهم "يقولوا لأ" لأي حاجه "مش مريحه" بيحسوا بيها بتبقي اقل من لو كانوا قريبين من باباهم...... زي ما زمان كانوا بيقولوا "الأب ظهر " ...

٤- رغم أن المشكله اللي عند وسام في المسلسل ماخليتهوش يتحرش ببنته زينه (#ياسمين_العبد) ، إلا أن فيه أنماط تانيه من التحرش (جسديه أو عاطفيه ) ممكن تحصل بين الأب و بنته، أو بين الام و ابنها ... بس ده ممكن نتكلم عنه في مره تانيه

٥- دور #علي_قاسم كمعالج نفسي كان دور محوري في المسلسل، و رغم صغر مساحة الدور، إلا أن علي قاسم أداه بشكل رائع في وجهة نظري ...و فيه تفصيله صغيره هنا، و هي أن دور الطبيب أو المعالج النفسي مش أنه يقوم بدور الام أو الاب، إنما أنه يساعد الام و الاب أنهم يفهموا نفسية طفلهم، و يساعد الطفل أنه يقرب من ابوه و أمه ... للاسف بعض المعالجين بيقعوا في فخ أنهم يبتدوا يحكموا علي الام و الاب، و يشوفوا نفسهم احسن من الام و الاب ...و ده بدل ما بيقرب الطفل من ابوه و أمه ، بيبعده عنهم اكتر، و ساعتها الطفل بيبتدي يشوف المعالج النفسي بديل افضل من امه او ابوه، و ده اللي بنسميه في علم النفس "التبديل " . و علي فكره ده مش بس بيحصل للاطفال في علاقتهم مع المعالج النفسي ، إنما بيحصل كمان للكبار...

مش دور المعالج أنه يحكم علي الام أو الاب، دوره أنه يساعد الطفل أنه يقرب من ابوه و أمه ... و نفس الكلام ينطبق علي البالغين...

٦- حتي لو الام أو الاب ماكانوش مهيئين نفسيا أنهم يخلفوا ( زي ام يوسف في المسلسل، أو ماقاموش بدورهم كفايه (زي ابو يوسف #احمد_السعدني في بداية المسلسل ) الا أن احسن وقت نقوم فيه بدورنا و نقرب من اولادنا هو "دلوقتي".... علاقتنا بالأطفال ممكن تتغير بشكل كبير، لو واجهنا نفسنا و قررنا ناخد خطوه و نتحمل مسئوليتنا و نقوم بدورنا كأم أو أب ... علي حد استطاعتنا ...

٧- مفيش عائله مثاليه في الدنيا، و مفيش ام و اب مثاليين، إنما فيه ام و اب اشتغلوا علي نفسهم و اتعافوا من صدمات أو مشاكل مروا بيها، و فيه ام و اب ماعملوش كده ...

الاولاد دائما مرتبطين بأهلهم (علي مستوي العقل الباطن و علي مستوي العقل الواعي) و المشاكل اللي الاهل مابيحلوهاش في حياتهم ، أولادهم لازم بيتأثروا بيها ...

علشان كده دايما لما الناس بتسألني ايه احسن حاجه يعملوها لأولادهم، بقولهم أنهم يشتغلوا علي نفسهم و يتعافوا من مشاكلهم (و خصوصا علاقتهم بأهلهم)... و ده مش بس بيساعد في علاقتهم بأولادهم، إنما كمان بيحرر الاولاد من أنهم يشيلوا حاجات أو مشاكل في حياتهم، كنوع من أنواع الولاء لأهلهم و لطريقة حياتهم ...

احسن حاجه ممكن تعملها لأولادك، انك تشتغل علي نفسك !

*فيه فيديوهين ليا عملتهمش قبل كده علي التحرش، حتلاقوهم علي قناة اليوتيوب بتاعتي

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: Monir.elshazly