كل واحد و ليه دوره !

فيه بوستات كتيره منسوبه لشخصيات عامه، و كلام كتير بأسمعه بيتقال عن العلاقات بين الراجل و الست ...كلام من نوعية "كوني له الام و الاخت و الحبيبه و الابنه، يكون لكي الاب و الاخ و الابن ..."...

و كلام تاني من نوعية "ان الست هي اللي عليها الدور الأكبر في إنجاح الزواج" ...او أن "الراجل لازم يكون الأب للست اللي باباها مات أو علاقتها معاه وحشه" ...

طبعا أنا مش عارف الكلام ده الناس اللي كاتباه جايباه منين أو مين الشخص (اللي درس علم النفس) و قال الكلام ده .... بس انا احب اقول ان الكلام ده ابعد ما يكون عن أنه يبني علاقه سعيده!

دور الزوج أنه يكون زوج... و دور الزوجه انها تكون زوجه ...

إنما الجو بتاع الابطال الخارقين (super heros ) اللي بيلعبوا ادوار كتيره ده بيؤدي لفشل اي علاقه!.

اولا ...ماحدش حيعرف يلعب دور مش بتاعه لمده كبيره في اي علاقه من غير ما ده يأثر عليه صحيا و نفسيا، و يأثر علي العلاقه ككل...

ثانيا ، لو فيه عندي مشكله مع حد، الحل فيها مش اني اجيب "حد تاني" و اطلع عليه غضبي (او احتياجي) مكانه.

ف لو عندي مشكله في علاقتي مع ابويا أو امي، اللي حيحلها اني اغير نظرتي ليهم و احاول افهم اكتر اسباب تصرفاتهم.... مش اني اجيب حد يلعب دورهم و ابقي مستنيه منه يديني اللي هما ما اقدروش يدوه!

الكلام بتاع كوني امي و بنتي ده بيعمل مشاكل كثيره جدا ...(من ضمنها مشاكل في العلاقه الجنسيه بين الراجل و الست)...

و الكلام بتاع ان الست هي الأساس في إنجاح الزواج بيحمّل الست حمل اكبر منها بكتير، و بيعفي الراجل من المسئوليه ..كأنه طفل صغير و أهله هم المسئولين عنه (لأن نجاح اي علاقه مبني علي تبادل العطاء من الطرفين ..مع اختلاف الأدوار)

و الكلام بتاع ان الراجل يبقي هو السند بدال الاب، بيحمّل الراجل مسئوليه كبيره جدا، و بيخليه بعد شويه يدوّر علي "ست تانيه" علشان الاولانيه بقت "بتلعب دور بنته" ...

كل واحد ليه دور معين بيلعبه في حياة الناس التانيين... ممكن الدور ده يتغير (من صديق لزوج ، او من زوج ل زوج سابق...) إنما مش دور حد أنه ييجي يلعب دور حد تاني (او يعوضني عن اللي قبليه عمله فيا!)...

و رغم اني مش من عادتي اني اعلّق علي كلام أو بوستات الناس حاطاها، الا اني بكل صراحه بقول أن الكلام ده حتي لو شكله رومانسي...انما بيودي في داهيه!

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: @monir.elshazly.spiritual