قبل ما تعترض او تتهم حد بالرجعيه!

البوست ده ممكن مايعجبش ناس كتير.. بس اتمني ان قبل مايرفضوه يفكروا شويه! الناس اللي معترضه علي قوانين تونس الجديده اللي بتقترح مساواة الست بالراجل في الميراث و السماح للست المسلمه انها تتجوز مسيحي (زي ما مسموح للراجل المسلم انه يتجوز مسيحيه او كتابيه)، ممكن قبل ما يعترضوا و يكّفروا من ناحيه ، او يتهموا بالرجعيه و التخلف من ناحيه تانيه ، يبتدوا يقروا و يعرفوا ليه القوانين دي موجوده في الاسلام. و ليه التنصيب ده موجود في القرآن…. و ايه الغرض الاساسي من ان المسلمه ماتتجوزش مسيحي (او كتابي).

الهدف من البوست ده مش اني اقول اني مع او ضد ، علي قد ما ان الناس تبتدي تفكر و تعرف ليه القوانين دي موجوده في الاسلام و هل النصوص دي ليها معني واحد ولا تحتمل اكتر من معني… و هل نزلت في موقف معين لوقت معين ، و لا نزلت حأحكام عامه… و الهدف منها ايه ؟ و هل هي صالحه لغاية دلوقتي ولا ممكن بالقياس تتغير (زي ما علماء تونس بيقترحوا).

لو اول كلمه نزلت في القرآن هي “إقرأ” ، يبقي مهم قوي قبل ما نعترض و نكفر (او نتهم بالرجعيه و التخلف ) اننا نقرا و نفكر… و نعرف ان “رأيي صواب يحتمل الخطأ، و رأي غيري خطأ يحتمل الصواب” زي ما يُقال ان الامام علي بن ابي طالب قال .

#منير_الشاذلي

#Monir_El_Shazly