عن ليلة القدر

عن ليلة القدر

بقالي يومين تلاته بتجيلي رسايل من اصدقاء، و بشوف بوستات علي ال Facebook بمناسبة ليلة القدر. و الكلام كله عن ان الواحد لازم يكثِّف جهوده في العشره الاواخر من رمضان و يعمل حسنات زياده (او "يِطَلّع دعوات من بق ابوه و امه ليه" زي مابتقول بعض الڨيديوهات المتتشره) علشان الدعوات دي حتضرِب في ١٠٠٠ و علشان الجهود دي حتبقي كأنك عملتها لمدة ٨٤ سنه! ( اللي هو ١٠٠٠ شهر علي ١٢ في السنه يعني ...و ده بناء علي أن {ليلة القدر خير من الف شهر} )..

و علي الرغم من ان الحاجات اللي بتتكلم عنها الرسايل بصفه عامه حاجات جميله (زي بر الوالدين، و الصلاه و الذكر) ، و علي الرغم من أن ليلة القدر ربنا ميزها زي ما السوره بتقول:.

(إِنَّا أَنزَلْنَاهُ فِي لَيْلَةِ الْقَدْرِ (1) وَمَا أَدْرَاكَ مَا لَيْلَةُ الْقَدْرِ (2) لَيْلَةُ الْقَدْرِ خَيْرٌ مِّنْ أَلْفِ شَهْرٍ (3) تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِم مِّن كُلِّ أَمْرٍ (4) سَلَامٌ هِيَ حَتَّىٰ مَطْلَعِ الْفَجْرِ (5).) ...الا ان مفهوم التجاره و الضرب في ١٠٠٠ علشان "اجمّع حسنات اكتر " هو مفهوم في رأيي بيبعد الواحد عن الهدف من العباده.

هل الهدف من الدعاء و المجهودات هو "تجميع الحسنات"، او "الدخول للجنه" او "الخوف من النار"... ولا الهدف هو القرب من ربنا ؟

في حديث ل "علي بن ابي طالب" بيقول ...

«إن قوما عبدوا الله رغبة، فتلك عبادة التجار،

وإن قوما عبدوا الله رهبة، فتلك عبادة العبيد،

وإن قوما عبدوا الله شكرا، ( او في روايه اخري، ابتغاء وجهه) فتلك عبادة الأحرار» - #علي_بن_ابي_طالب

بمعني، أن فيه ناس عايزه الجنه ...و ناس خايفه من النار، و فيه ناس عايزه ربنا، و الجنه و النار مش هما السبب الرئيسي اللي بيعبدوا ربنا علشانه!.

دي انواع من العباده (او مستويات فهم مختلفه للعباده) ... و كل نوع مرتبط بنظره معينه عن ربنا ... و علاقه مختلفه بيه!

اما عن موضوع ليلة القدر ...ف دي قصه قصيره عنها :

"قيل ل #ابو_الحسن_الشاذلي :

يا إمام : ما هي ليلة القدر؟

فقال : أيَّة ليلة تقصدون؟

قالوا : الليلة التي تستجاب فيها الدعوات ..

فقال : وفي أي ليلة لا يُستجاب فيها الدعاء ؟ !!

فقالوا : يا إمام الليلة التي يغفر الله فيها ..

فقال : وأي ليلة لا يغفر الله فِيهَا ؟ !!

فقالوا : يا إمام الليلة التي تنزّل فيها الملائكه..

قال : وفي أي ليلة لا تنزّل فيها الملائكه ؟ !!!

قال : لا أعرف ما تقولون !!!... نحن قومٌ ليالينا بالله كُلَّها قدر"

طبعا من حق كل واحد أنه يدعي ...و طبعا انا شاكر و ممتن لكل واحد بعتلي، بس انا احب اقول ان علاقتي بربنا مش مبنيه علي جدول الضرب و تجميع الحسنات... علاقتي بربنا مبنيه علي الحب... الحب لربنا، و الرغبه في معرفته، مش في طلبات منه ...

الحب اللي لسه ما وصلش بس اتمني انه في يوم من الايام يوصل انه يكون غير مشروط!...زي ما قال #البسطامي و هو بيدعي ربنا "اريد ان لا اريد...غير ما تريد!"

ربنا يرزقنا حبه و معرفته!

#منير_الشاذلي

*برجاء قراءة البوست تاني جيدا ، لأن البوست ده بالذات بيزعل ناس كتير (علشان رأيي مختلف عن الرأي السائد)، و انا مش دايما بيبقي عندي القدره علي الرد علي كل واحد بيعلق ..و لا بحب اني اجادل أو اقنع اي حد بوجهة نظري

و كل رمضان (و #ليلة_القدر) و انتم طيبين

YouTube: Monir El Shazly

Facebook page: @monirelshazlyspiritual

Instagram: monir.elshazly