عن الفرق بين العطف و التعاطف !
- Monir El-Shazly
- Nov 24, 2022
- 2 min read
عن الفرق بين العطف و التعاطف !
----
بمناسبة البوست اللي حطيته من شوية ايام عن التعاطف ...
ناس بعتتلي تسألني عن الفرق بين التعاطف (empathy) و #العطف (#sympathy )...
في رأيي أن العطف (sympathy ) معناه انك تكون حاسس بالأسف و/أو بالمسؤولية عن الشخص اللي انت بتعطف عليه ...
بمعني انك تكون حاسس انك محتاج تغيّرله حياته أو بتبقي متأثر جدا لو فضلت حياته زي ما هي ...و غالبا بيبقي فيه احكام علي الشخص اللي بتتعاطف معاه (أنه المفروض كان يعمل كذا، أو أن اختياراته كانت كذا !...)
إنما التعاطف (#empathy or #compassion ) معناه أنك تفهم اللي الشخص اللي بتتعاطف معاه بيمر بيه ( و تقدّر أن ليهم أسبابهم اللي خليتهم يتصرفوا كده، حتي لو انت مش عارف الأسباب دي!) بدون اصدار أحكام عليهم ، وأنك تكون مستعد تساعدهم لو احتاجوا للمساعدة (و لو كان ده في استطاعتك) ... بس انت مش مسئول عنهم و لا عن نتيجة المساعده دي ! ...
في الشغل بتاعنا ( و في الحياه عموما ) ، بلاقي أن صفة التعاطف بتفيد الشخص اللي في ازمه جدا، و بتقويه و بتخليه يشوف القدره علي تغيير حاجات في حياته ( و دي واحده من اهم ادوار المعالج النفسي)... إنما صفة العطف بتضعف الشخص اللي قدامي و بتزود عنده الشعور بأنه ضحية... ممكن تخليه يشعر بتحسُن لحظي .... بس بتسيبه في نفس المنطقه اللي هو فيها من غير اي تطوّر فعلي ....
كمان المعالجين النفسيين اللي بيتعاطفوا مع الناس اللي بتجيلهم بيقدروا يساعدوهم من غير ما يتعبوا هما ...و نتائج شغلهم بتبقي احسن بكتير ...
إنما المعالجين اللي بيعطفوا علي الناس اللي بتجيلهم بيتعبوا كتير و ساعات بيكتأبوا و بيحصلهم burn-out ، ده غير أن غالبا الناس اللي بتجيلهم بتتحسن ببطئ ، (و ساعات مابتتحسنش خالص )
اخر حاجه احب أضيفها أن واحد من أسباب مشاكلنا مع اهالينا اللي بشوفها كتير، هي أننا بنعطف عليهم و بنحكم علي نمط حياتهم و بنحِس بالمسئولية عن تغيير حياتهم .... لأن مع الشعور ده دائما بتكون فيه احكام عليهم، وجوه الشعور ده، دائما بيكون فيه شعور بعدم احترام قدرتهم علي التغيير ...أو قدرتهم علي تحمل نتائج اختياراتهم ....و ده دائما بيعمل مشاكل في علاقتنا بيهم علي المدي الطويل !
YouTube: Monir El Shazly
Facebook page: Monir El Shazly - Family Constellation
Instagram: monir.h.elshazly.spiritual
Comentários