عن الشيوخ و الكرامات !
- Monir El-Shazly
- Sep 19, 2024
- 3 min read
بمناسبة موضوع الشيخ #التيجاني و الكلام المثار حواليه الايام دي و اللي شوية ناس اخدته فرصه للهجوم علي #الطرق_الصوفيه ..فيه شوية حاجات احب اوضحها :
١- لازم نفرق بين الصوفيه كمنهج (للمعرفه الالهيه و تطوير النفس) ، و الطرق الصوفيه ، و هي طرق كتيره و فيها تشعب كبير و في اختلافات كتير ما بينها .
٢- احنا كشعوب عربيه (و كشعب مصري تحديدا ) عندنا مشكله في تأليه الأفراد و التعامل معاهم علي أنهم منزهين عن الخطأ. و دي اكبر حاجه ممكن تخلي ال ego بتاع الناس دي يكبر و يسيطر عليهم .
الكلام دي بيظهر جدا في الطرق الصوفيه ، (من الطريقه اللي المريدين فيها بيتكلموا عن الشيوخ أو ييعاملوهم بيها) ، بس كمان بيظهر في الطرق السلفيه و في ديانات تانيه حتي ... و طبعا في مجالات كتيره زي علوم الطاقه و مجالات العلاج النفسي ...
٣- الشيوخ (أو اي حد من اي دين موجود في مكانه معينه) هو شخص بيتكلم بناء علي وعيه الروحاني (بإفتراض حسن النيه طبعا)، و معرفته اللغويه و دراسته الفقهيه ممكن تساعد في زيادة فهمه ، انما مش هي المُكوّن الأساسي للوعي الروحاني. لو عايز تعرف الوعي الروحاني لشخص، اتفرج عليه في حياته الشخصيه، ازاي بيعامل الناس و ازاي بيتعامل مع اهل بيته و البيئه المحيطة بيه، و مع الناس المختلفين عنه فكريا أو عقائدياً.
و الاهم، اتفرج عليه ازاي بيتعامل مع تأليه الناس ليه و مدحهم ليه ...و ازاي بيتكلم عن نفسه و ايه الحاجات اللي بيطلبها من طلابه (مريديه) ...
انا كان ليا الحظ اني اتعامل مع شيوخ كتيره (مش بس صوفيه ) ، و معلمين روحانيين كتير من مختلف الديانات و المذاهب... و في وجهة نظري قليلين قوي منهم اللي حسيته متواضع و بيتعامل مع الناس بدون مايبقي شايف نفسه أحسن منهم !
٤- اي شخص في الدنيا مهما كانت درجة علمه فهو بني ادم، مُعَرض للخطأ و كلامه مش كلام مُنزل من السما، و فهمه للكلام المُنزل مش شرط يكون صحيح.
المشكله اننا عندنا ميل لأننا نمشي ورا الشخص لما يعجبنا أو يقول كلام يعجبنا ...و نسلم عقلنا ليه ... و لما الشخص ده مابيطلعش زي ما كنا فاكرين، بدل ما بنتعلم الدرس ...للاسف بندور علي حد تاني نمشي وراه!
٥- مفهوم الكرامات (أو القدرات الخاصه) اللي الناس بتعتبره دليل علي التطور الروحاني هو مش بالضروره صحيح.
ارتفاع مستوي الوعي ( اللي ممكن نسميه زيادة القرب من ربنا) دائما بييجي معاه قدرات خاصه قعلا، إنما ساعات كتيره القدرات الخاصه بتبقي عند ناس مستوي وعيهم قليل .. ناس كتيره من مختلف الطرق و الديانات كان عندهم "قدرات خاصه" و كرامات و بيعملوا معجزات، انما كان وعيهم قليل و اذوا ناس كتيره من اللي مشيوا وراهم.
احنا لو عيانين ممكن ساعات نخف لو كنا مقتنعين بأن الشخص اللي روحناله "في أيده الشفا" ... علشان عقلنا ليه القدره علي كده، بس ده مش معناه أن الشخص اللي روحناله ده عنده كرامات ...
و حتي لو عنده كرامات، فده مش دليل علي وعيه الروحاني.
كتير من الكرامات دي ( زي القدره علي الشفا، او رؤيه حاجات غيبيه أو معرفة أسرار معينه او حاجات تانيه ) ممكن تيجي للناس لأسباب معينه مش مجال ذكرها دلوقتي ... و ناس كتيره في مجالات مش بس صوفيه عندهم قدرات خاصه ...إنما تاني ...القدرات دي مش دلاله علي ارتفاع الوعي ...أو دلاله علي أنهم كبشر بقو منزهين عن الأخطاء و نحطهم في مقام الانبياء !
٦- و اخيرا في رأيي الشخصي ، مفيش حد عنده كرامات أو قدرات خاصه بسبب ارتفاع مستوي وعيه، بيتكلم عنها أو بيتباهي بيها ...و الصوفيه الاوائل ماحدش فيهم كان بيتكلم عن قدراته ولا حتي لما الناس بيتكلموا عنه كان بيذكروها .
و زي ما دائما بقول "اعرف ربنا، مش اعرف عن ربنا!" ، بمعني انك تحاول تخلي فيه علاقه مباشره مع ربنا، و تستفتي قلبك و ماتخليش حد يقولك ربنا عامل ازاي و لا تاخد كلام حد عن ربنا أنه مُسَلّم بيه، و لا تاخد حد وسيط بينك و بين ربنا ....
معرفة ربنا مش كبسوله ولا حبايه ممكن تاخدها علشان تعرف ربنا (من خلال خطبه او فتوي او حضور درس دين او رؤيه في المنام )، ده طريق محتاج تنوي انك تمشي فيه ...ممكن ناس تاخد بايدك و تعلمك حاجات ...إنما الهدف الأساسي مش انك تمشي ورا الناس دي ....إنما انك توصل لمعرفة ربنا .... و دي تجربه فرديه !
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
コメント