علاقه صحيه بعد الطلاق

بعد الكلام اللي كتبته امبارح عن ان الحياه الزوجيه محتاجه مجهود من الاتنين لنجاحها، و ان نهايتها مش معناها فشل، علي قد ما معناها أن ماكانش فيه توافق و أن احسن لكل واحد فيهم (و للأولاد) أنهم يتطلقوا و يحترموا بعض، جالي تعليقات كتيره (معظمها من ستات ) علي أن الرجاله لما الطلاق بيحصل مابتبقاش عايزه تصرف علي اولادها، و ان ده أحد أسباب أن الستات بتخاف تتطلق!

و الحقيقه اني بأسمع الكلام ده بقالي كتير من كلاينتس عندي و بحس انه كلام متاخد مُسَلَّم بيه، علي الرغم إن من واقع اللي انا بشوفه في المواضيع دي، مش كل الرجاله بيتصرفوا كده... طبعا فيه جزء منهم بيتصرف كده، إنما في الحقيقه فيه جزء كبير بيبقي مستعد يصرف علي أولاده ويربيهم كويس، المشكله بتيجي لما ساعات الست بتبقي عندها تصوُر معيّن للي الراجل *المفروض* يصرفه و *نوعية التعليم* اللي المفروض يدخل *اولادها* فيه!

و كتير من الستات اللي بتقول الرجاله مش عايزه تصرف، بتتكلم عن الاولاد بصيغة "اولادي " ، كأن الأب مالوش دعوه بيهم غير أنه يصرف و يشوفهم مره في الاسبوع .

طبعا لما ده بيحصل الاب بيعاند، و الست بتعاند... و المتضرر الاساسي بيبقي دائما الاولاد.

لأن حتي لو الست قررت تتكفل بالأولاد و مصاريفهم، فده بيحط عليها ضغوط كبيره جدا بتأثر علي علاقتها بأولادها و علي توقعاتها منهم لما يكبروا... و من الناحيه التانيه بتبعد الاولاد عن الاب، و بتطلعهم عندهم شعور أن الاب ده مقصر و أنهم محتاجين ياخدوا صف أمهم قدام ابوهم... و ده طبعا بيسبب مشاكل كتيره نفسيه للاولاد بعد كده في حياتهم، في اختياراتهم العاطفيه و الزوجيه، و حتي ساعات في أن الاولاد يبقوا اكتر عرضه أن يبقي عندهم مشاكل الإدمان (بإختلاف أنواعه) !

في رأيي الشخصي، أن نوعية المدارس و الدراسه اللي الاولاد حياخدوها مهمه، و لكن مش في أهمية أنهم يطلعوا في علاقه كويسه مع ابوهم و امهم، و ان الصحه النفسيه و السلام النفسي للأبناء، اهم ميت مره من المدرسه اللي حيروحوها و النادي اللي حيلعبوا فيه.

إنما للاسف كتير من العلاقات بتنتهي بنوع من أنواع الطمع و العِند عند الطرفين أنهم يطلعوا بأكبر منافع ماديه ممكنه (او يقللوا الخسائر الماديه) و المتضرر الأكبر هو الاولاد... اللي من حقهم يكونوا علي علاقه كويسه بأبوهم و أمهم... حتي لو كان ابوهم و أمهم ماعرفوش يكملوا في جوازهم مع بعض!

#منير_الشاذلي

* قبل ما حد يبعتلي يقوللي إن الكلام ده مش واقعي و أنه عمره ما بيحصل، احب اقول اني بشوف حالات زي كده بقالي اكتر من ١٥ سنه، و ان إمكانية ان الطرفين يبقوا محترمين مع بعض امكانيه كبيره، بشرط أن الطرفين يبصوا لمصلحة الاولاد النفسيه، قبل مصلحتهم الماديه... و يطلعوا الطَمع و الرغبه في الانتقام من بعض من المعادله ( و ده طبعا بيبقي اصعب بكتير لما العلاقه بتفضل فيها مشاكل لمده طويله ..لأن ساعتها الرغبه في الانتقام بتزيد!)

YouTube: Monir El Shazly

Facebook page: @monirelshazlyspiritual

Instagram: monir.elshazly