علاقات استغلاليه!

فيه افكار غريبه اتحطت في دماغ البنات من وهم صغيرين عن "فارس الاحلام" اللي حييجي راكب حصان ابيض في ابيض، و حيعوضها عن كل المآسي اللي شافتها في حياتها ...

الأفكار دي اتقالتلهم بدايه من افلام الكرتون ( سندريلا و سنووايت) ، مرورا بالحكايات بتاعت الشاطر حسن اللي حينقذ الاميره ... و انتهاء بالامثال بتاعت "ضل راجل و لا ضل حيطه" ...و الكلام ده !

مشكلة الأفكار دي أنها مش بس غرست في العقل الباطن للست صورة انها كائن ضعيف و محتاج لحمايه (أو حتي خلاص) من الراجل و افقدتها ثقتها بنفسها في أحيان كتيره ، إنما كمان خلت بنات و ستات كتيره لما يكبروا شويه يقعوا ضحايا لشخصيات نرجسيه أو استغلاليه، علشان الشخصيات دي دائما بتعرف ترسم صورة فارس الاحلام في بداية علاقتها بالست، و الكلام ده بيسمّع عند ستات كتيره في احلام الطفوله بتاعتهم عن الشخص اللي ربنا حيعوضهم بيه عن كل اللي شافوه ...

المشكله كمان مش بس فكرة أنها تقابل حد عنده صفات نرجسيه كتيره ،او شخص يعملها استغلال عاطفي، إنما كمان أنها ممكن تقابل رجاله تنصب عليها ماديا ، و ياخدوا فلوسهم أو يورطوهم في التزامات ماديه يفضلوا مزنوقين فيها بعد ما الرجاله دي تهرب!

و للاسف الكلام ده بقيت بشوفه كتير في شغلي و بسمع عنه كتير في قصص لناس بتروح لزمايل ليا ...

طيب الحل ايه ؟

بخلاف الحل اللي علي المدي الطويل بتاع أن قصص الاطفال دي لازم تتغير، أو أن الأهالي يألفوا قصص تانيه تغير من نظرة البنت لنفسها و حلمها بالفارس ( prince charming )، و طبعا الكلام ده محتاج سنين (جيل تاني) لغاية ما يحصل ، فيه شوية نصائح ممكن اقولها للستات علشان تقلل من احتمالية وقوعها في القصص الاستغلاليه دي ..( و الكلام ده ينطبق علي بعض الرجاله طبعا اللي بتقع مع ستات نرجسيه أو استغلاليه )

١- خدي وقتك

اي علاقه بين اتنين ..محتاجه تاخد وقت علشان تتبني صح ...و بصفه عامه، معظم الرجاله ماتبقاش عايزه ترتبط ارتباطا رسمي بسرعه ...فلو لقيتي راجل قالك أنه بيحبك في خلال اسبوع و ابتدي يقول إنه عايز يتجوزك في خلال شهر ... اعرفي أن احتمالية أن يكون فيه حاجه هو مخبيها احتمالية كبيره جدا ...

فخدي وقتك تماما و بلاش تسرع!

٢- اي علاقه ماحصلش فيها اختلاف في وجهات النظر في وقت من الأوقات، تبقي علاقه لسه مش ناضجه !

كل واحد بيبقي ظريف و جميل، و مرن ، طالما الكلام ماشي علي هواه ، فلازم تستني شويه لغايه ما يحصل خلاف في وجهات النظر في حاجه كبيره نسبيا ، و تشوفي هو حيتصرف ازاي، و هل حيعمل حساب لزعلك، و حيبقي عنده رغبه في الوصول لحل مُرضي ليكي و ليه، ولا حينشف رأيه و يلف و يدور لغايه مايخليكي تنفذي اللي هو عايزه !

٣- شوفيه بيتكلم عن أهله ازاي !

اي حد بيتكلم عن أهله وحش، أو عنده مشاكل كبيره مع اهله، غالبا حيبقي عنده غضب مكتوب ( من حاجات هم عملوها أو ماعملوهاش ) في علاقته بيهم .

الغضب ده حيجيله وقت و يطلع ... و غالبا حيطلع عليكي انتي اول واحده بعد كده! ..كمان الحاجات اللي كان مستنيها من أهله غالبا حيبقي مستنيها منك انتي... و ده مش دورك !

هل ده معناه، أن لازم الواحد يبقي علاقته بأهله كويسه قبل ما يدخل في علاقه؟ ...انا رأيي اه ... بس طبعا ده كلام مش دايما بيحصل... إنما علي الاقل مايكونش عنده غضب عنيف منهم ...أو من حد فيهم !

٤- شوفيه ازاي بيتكلم عن ال ex's بتوعه ( صاحباته أو زوجاته اللي قبليكي )

اي حد بيتكلم بقلة احترام عن الست اللي كان معاها، اعرفي أن ممكن الدور ييجي عليكي و يتكلم عنك كده!

و اي حد عنده غضب أو ( unfinished business ) مع ال ex بتاعته، غالبا انتي حتدفعي الفاتوره بدالها !

طبعا الكلام ده مش معناه تدوري علي حد نفسه يرجع لمراته السابقه و بيحلم بيها بالليل ، بس معناه انك تشوفي هل بيتكلم عنها باحترام أو بيفتكرلها حاجات كويسه و لا دائما بيشتم فيها ...

لأن الاحترام ده صفه مهمه و اساسيه في العلاقات ...بغض النظر عن الشخص التاني عامل ازاي!

٥- مفيش حد كامل !

كل حد فينا عنده حاجات مر بيها و حاجات محتاج يشتغل عليها ، فلما حد يظهر في صورة أنه كامل... خلي بالك!

معظم النصابين بيرسموا صوره مختلفه تماما عن الحقيقه، و معظم النرجسيين بيعيّشوا ضحاياهم في "فترة شهر عسل " ( honeymoon phase ) لما بيقابلوهم في الاول ....

و ده يرجعنا للنقطه الاولي ...خدي وقتك ... الناس دائما بتتعرف من المواقف ...و المواقف بتبان مع الوقت ..لأن مفيش حد بيعرف يمثل علي طول !

#منير_الشاذلي

* طبعا تاني، الكلام ده ينطبق علي بعض الرجاله اللي بتقع مع ستات نرجسيه أو استغلاليه ..نفس النموذج ده موجود عند الستات

#علاقات_استغلاليه

#علاقه_استغلاليه

#شخصيات_نرجسيه

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual