ظِل راجل... يدّيكي حُريتِك!
- Monir El-Shazly
- Sep 6, 2023
- 2 min read
ظِل راجل... يدّيكي حُريتِك!
---------
نشرت امبارح بوست (للمره العاشره تقريبا) بأعلق فيه علي راجل بيكلم ست (المفروض أنه بيحبها) بيقولها انها "بتاعته"، و علشان كده مش عايزها تشتغل علشان ماحدش يشوفها غيره، و لا عايزها تخرج مع اصحابها لو هو مش فاضي علشان "لما توحشه" و هو قاعد مع اصحابه، اول مايرجع يلاقيها موجوده و مستنياه ... و كلام كتير من النوعيه المتسلطه و اسلوب التعامل النرجسي ده ( و انا هنا بأستخدم الكلمه دي لأن كل كلامه بيركز علي نفسه و ايه اللي حيبسطه، بدون النظر للست اللي معاه خالص) ...
و طبعا كان فيه ردود افعال كتيره من الستات و الرجاله اللي معظمهم كان مستغرب البوست و مستنكر البنت اللي مستحمله الراجل ده، انما فيه رد غريب جدا باعتتهولي بنت و قالت فيه "انه كويس انه مديها حريتها! "... و بيحبها!
الغريب ان فيه بنات شايفه ان حد ممكن "يديها حريتها".. مش عارف علي اعتبار ان ده تفَضّل منه؟.... و لا علي اعتبار انها مولوده علشان حد يتحكم فيها لغاية ما تموت، و لما يجيله مزاج... "يديها شوية حريه تلعب بيهم!"
رأيي الشخصي لكل #بنت أو ست : انتي مش محتاجه حد يديكي حريتك...
لأنك لو مش عارفه (ومتأكده) انك حره... ما حدش حيحرّرك (ولا حيحترمك كفايه!)
انتي مش محتاجه "ضٍل #راجل " ولا "ضٍل حيطه"... انتي محتاجه تثقي في نفسك.. و تعرفي انك مش محتاجه تقفي في "ضٍل حد" !
احترامك لحد بيبتدي من احترامك لابوكي و امك... احتراما لدورهم انهم ربوكي لما كنتي مش قادره تقفي علي رجلك! . انما مش معني كده انك تفضلي تدوري علي حد تحطيه في مكانه مش بتاعته، و تطلبي منه السماح و الحريه!
عمر ما المجتمع حيتغير الا لو الست ازداد وعيها و احترامها لنفسها... لأنها ببساطه حتكون #الام اللي حتربي في يوم من الايام.
(اعادة نشر)
YouTube: Monir El Shazly
Facebook page: @monirelshazlyspiritual
Instagram: @monir.elshazly.spiritual
留言