شكرا للناس العزاز !
- Monir El-Shazly
- Jun 23, 2023
- 2 min read
"مَلعون ابو الناس العُزاز"....
مفهوم الضحيه و الصعبانيات!
-------
من شوية ايام، كنت داخل اشتري حاجه من محل، و سمعت الاغنيه دي، الاغنيه دي بقالها حوالي ٤ او ٥ سنين، و اول ما طلعت، لقيت "الفيس بوك " اتملي بالجمله السخيفه دي... و ابتدا معظم الناس يرددوها و يحطوها status علي البروفايل بتاعهم !...
طبعا كل واحد حُر يقول او يعمل اللي هو عايز يعمله...
اللي انا بس احب اسأله لكل واحد حط ال ستاتس دي عنده، او مقتنع بالجمله دي ... يا تري ايه شعورك وانت بتقولها او بتفكر فيها ...و شعورك و انت بتقراها وواخدها حكمه في حياتك؟
لو كان شعورك ان الحياه حلوه و حسيت انك مُقبل علي الدنيا و متفائل.. يبقي خير... حُطها و العن الناس اللي حواليك زي ما انت عايز!
انما لو كان شعورك انك صعبان عليك نفسك و حاسس ان "الدنيا غداره... و مافيش حد ممكن تثق فيه ابدا" ، يبقي خلي بالك ان هو ده بالظبط اللي انت حتشوفه في حياتك الفتره الجايه.
بمعني اخر ، لو انا لابس نظارة ان "الناس كلها ملعونه و زباله و مفيش حد ممكن اثق فيه حتي اقرب الناس" ، هل ده حيخلي تصرفاتي مع الناس تخليني اقرّب منهم او اعرفهم ؟... هل ده حيخلّي حياتي احسن ؟... هل ده حيخلّيني متحمس اتعامل علي الناس اللي ربنا حيحطهم في حياتي ؟...
لما تفضل لابس النظاره دي، حياتك حتفضل كلها متلونه باللون ده ،... و ماتستغربش بعد كده انك وحيد و تعيس و ماحدّش عايزك في حياته.
لو عايز تشوف الحاجات الكويسه في "الناس العزاز " ، بطّل تلعنهم ...و دور علي الحاجات الكويسه فيهم ...و افتكر الذكريات الحلوه...
و لو مش عايز تكون ضحيه، بطّل تِصعَب عليك نفسك... و بطل تشوف نفسك ضحيه الناس و الحياه ...
اه، و بطّل تسمع اغاني الصعبانيات :-D
*شكرا لكل واحد مر في حياتي ....
و شكرا جدا ل *الناس العُزاز*
YouTube: Monir El Shazly
Facebook page: @monirelshazlyspiritual
Instagram: monir.elshazly.spiritual
Comments