ركّز في الحاجات اللي تعجبك
- Monir El-Shazly
- Jul 7, 2017
- 2 min read
ناس كتير بعتت سألتني مستغربه ازاي انا قادر احط بوستات فيها ايجابيه و نظره مختلفه للحياه مع كل الصعوبات و الازمات اللي البلد بتمر بيها علي مختلف المستويات و الطبقات… ناس منهم كانوا معجبين باللي انا بأعمله… و ناس تانيين كانوا شايفين اني منفصل عن الواقع و عايش في مكان تاني 🙂 . و الحقيقه ان الاجابه علي السؤال ده بسيطه جدا… انا باختار الحاجات اللي اركّز فيها و الحاجات اللي انا مأضيعش فيها وقتي. حاله البلد سيئه؟… طبعا..
هل الوضع حيستمر؟. مأعرفش.
هل انا في ايدي حاجه اعملها علشان اغيّر في القوانين الاقتصاديه و الاستثماريه في البلد.. لأ. (الا لو بقيت ليا قرار في الحكومه) … يبقي مش حضيّع وقتي في الهريّ و الحزن علي اللي بيحصل… و حركّز في اللي ممكن اعمله علشان ماابقاش سبب في المشكله ( اشتغل كويس… ماارفعش السعر بتاع شغلي بشكل مبالغ فيه… احاول اساعد الناس الغلابه في الوقت الصعب ده….و مااصرفش بشكل مبالّغ فيه و حاجات تانيه كتير.).
الفكره هنا تتضمن مفهومين مهمّين و مرتبطين ببعض. “الحياه في اللحظه” (living in the now).. مش في امبارح كان عامل ازاي.. او بكره حيحصل فيه ايه…
و المفهوم التاني هو التخلي (detachment)… و هنا معناه ان الواحد مايتعلقش بحاجه كانت موجوده.. او بشكل معين للحياه المفروض تكون عليها…. و مايركزش تفكيره في الحاجات اللي مش في ايديه ( زي الحرب و قوانين الاقتصاد و العلاقه المتوتره بين الامارات و قطر…و الحاجات دي).. و يركّز تفكيره في الحاجات الحلوه اللي في حياته و النِعم اللي ربنا اداهالو. هل انا اتولدت بالتفكير ده ؟… لأ.
بس اشتغلت علي نفسي لغاية ما وصلت لطريقه معينه للحياه و التفكير مريحاني 🙂
و المهم في الموضوع اني عارف ان الرزق بتاعي حيجيلي في اي حته.. و بأي شكل…و لا الحكومه و قراراتها و لا الحرب اللي ممكن تحصل ولا الجن الازرق ممكن ياخد الرزق اللي ربنا كاتبهولي منّي. و ده في حد ذاته فكره مريحه و مخلياني اقدر اركز الي الحاجات الحلوه في حياتي .. و احمد ربنا عليها ! #منير_الشاذلي
Comentarios