خليك في نفسك !

من سنه اتعرضت لهجوم عنيف بسبب بوست كتبته و كنت سعيد فيه بكلام #علي_جمعه في موضوع الجنه و انها مش حِكر علي المسلمين ...و كمية ناس ردت علي البوست بتاعي (و شتمتني) مستنكره ازاي أنهم كمسلمين ممكن ربنا يدخلهم الجنه زيهم زي ناس تانيين من دين تاني ... كأنهم زعلانين أن الجنه (أو رحمة ربنا ) ممكن تاخد حد تاني غيرهم! ...

و زي كل سنه

ابتدي يبقي فيه تعاليِ عند بعض الناس اللي بيصوموا علي غيرهم اللي مابيصوموش... علشان اقتناعهم ان "الناس التانيه" دول مذنبين و حيروحوا النار و انهم "اقرب لربنا" منهم علشان صايمين ...

و من الناس اللي مابيصوموش علي اللي بيصوموا... علشان شعورهم انهم كده اتحرروا من معتقدات او شعائر معينه و بقوا progressive ، في الوقت اللي لسه "الناس التانيه" دول أسري لأفكار معينه قديمه عن الدين و عن الحياه و حتي عن ربنا!

و طبعا التعالي ده بيمتد للناس اللي بتصلي التراويح ..و الناس اللي لأ...

و الناس اللي بتختم القرآن مرتين تلاته، و الناس اللي بتختمه مره ...و الناس اللي لأ...

و الناس اللي بتتفرج علي المسلسلات و الناس اللي "بتشوف ليها حاجه مفيده تعملها" ...

و يفضل مسلسل التعالي من ناس علي ناس و الرد من الناس دي علي الناس التانيه! ...

انا بس احب اقول ان علاقة الشخص بربنا (و بالحياه) دي بتاعته لوحده... و مش لازم يفرض علي الناس انها تعمل زيه...

و اختيارات الواحد دي حريه شخصيه و محدش ليه دعوه بيها... لا حد محتاج يتقبلها ...ولا حد محتاج يمشي وراها ...

مش كل حاجه احنا شايفين انها صح تبقي صح لكل شخص و لكل وقت...

و حتي لو قناعاتك أن "الصح" ده مبني علي أساس ديني أو عقائدي ... فممكن يكون "فهمك انت للدين مش هو الصح"

مهمتنا مش اننا نهدي الناس ولا اننا نحكم عليهم ...

و الدليل علي كده كلام ربنا لسيدنا محمد " إِنَّكَ لَا تَهْدِي مَنْ أَحْبَبْتَ وَلَٰكِنَّ اللَّهَ يَهْدِي مَن يَشَاءُ ۚ وَهُوَ أَعْلَمُ بِالْمُهْتَدِينَ" [القصص: 56]

ولا مهمتنا اننا نحط نفسنا مكان ربنا و نقرر مين اللي حيخش النار و لا مين حيروح الجنه!

كمية العصبيه و الرفض لآراء الآخرين بقت مخيفه في المجتمع ...

و للاسف ...الرفض ده بيزيد كل سنه عن اللي قبلها ...

و بعدين تيجي الناس تشتكي من مشاكل نفسيه ...جزء أساسي فيها شعورهم أنهم مرفوضين و "مالهومش مكان في عيليتهم"!

لو انت عايز الناس تقبلك زي ما انت، محتاج تقبل "الناس التانيه" زي ما هم...

و لو انت شايف أن افكارك و قناعاتك هي الصح ... فتقريبا كل واحد فاكر أن أفكاره و قناعاته هي الصح ...

النقد و إصدار الأحكام علي الناس ده "شارع رايح، جاي" ...

و التَقَبُل كمان ...

لما نحاول نتقبل الناس و نتقبل أن من حقهم يكون ليهم افكار مختلفه عننا ... غالبا هم حيتقبلوا اختلافنا عنهم بردو ... و حتي لو ماتقبلوهوش ...مش حيبقي عندنا مشكله في تقبل "عدم تقبلهم"!

لأن ماحدش فينا يملك الحقيقه المطلقه ...ولا الفهم المُطلق !

"إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ وَهُوَ أَعْلَمُ بِالْمُهْتَدِينَ"

[ القلم: 7]

"ذَٰلِكَ مَبْلَغُهُم مِّنَ الْعِلْمِ ۚ إِنَّ رَبَّكَ هُوَ أَعْلَمُ بِمَن ضَلَّ عَن سَبِيلِهِ وَهُوَ أَعْلَمُ بِمَنِ اهْتَدَى"

[ النجم: 30]

"ادع إلى سبيل ربك بالحكمة والموعظة الحسنة وجادلهم بالتي هي أحسن إن ربك هو أعلم بمن ضل عن سبيله وهو أعلم بالمهتدين" [النحل:125]

#منير_الشاذلي

#خليك_في_نفسك

#دع_الخلق_للخالق

YouTube: Monir El Shazly

Facebook page: @monirelshazlyspiritual

Instagram: monir.elshazly