تعاطف مفيد !

كنت بتكلم مع مجموعه من اصدقائي اللي شغالين في مجال الكوتشينج و العلاج النفسي، و الكل اجمع علي زيادة حالات اضطرابات النوم و نوبات الهلع (#panicattack ) عند معظم الناس اللي بتروحلهم في اخر اسبوعين .. و طبعا السبب معروف... كمية الافلام و البوستات اللي الناس ملت بيها ال Facebook و Instagram .. و كمية الشحن النفسي اللي الناس اتعرضتلها في الفتره الاخيره بسبب الأحداث المؤسفه اللي حصلت ...

انا عارف ان معظم الناس حاسه بالعجز تجاه اللي بيحصل، و نفسهم يعملوا حاجه تساعد اهالينا و اصدقائنا هناك .. إنما احب اقول ان مرضنا و اظطرابات نومنا و مشاكلنا الصحيه مش حتساهدهم بأي حاجه ...

بدل ما اعمل شير لڨيديوهات القص-ف و الدم-ار ، و اضطرابات قلبي و نومي تزيد، ممكن اتبرع بفلوس أو بملابس للناس اللي اتهجروا من بيوتهم ..

و بدل ما انشر ادعيه و احسّبن علي المع-تدي ... فيه مجالات للتطوع ممكن اعملها تخدم الناس هناك اكتر ...

فيه قنوات كتيره ممكن اساعد بيها الناس اللي هناك و تكون مفيده ليهم .... و مش مضره ليا ...

مش شطاره اني أمرض بدافع المشاركه ...لأن مرضي مش حيساعد الناس اللي في غ-ز.ه ... إنما اعتقد ان فيه حاجات تانيه ممكن تساعدهم اكتر بكتير ..

التعاطف ده حاجه جميله جدا، إنما الاجمل هو اني أظهرها بالشكل اللي يخدم الشخص اللي انا متعاطف معاه ... مش بالشكل اللي يضرني ...و مايخدموش ...

ارجوكم ماتعرضوش نفسكم للنوع ده من الڨيديوهات و الاخبار لو مش قادرين تتعاملوا معاها ..

و لو حتي قادرين تتعاملوا معاها ... ماتزودوش الجرعه قوي ...علشان بعد شويه تأثيرها السلبي حيبان عليكم بردو ....

و حاولوا توجهوا تعاطفكم بشكل يخدم الناس اللي انتم متعاطفين معاهم ..و مايصركوش انتوا ..

و ربنا يقدرنا علي فعل الخير و يلطف بكل واحد اتضرر و اتأذي من كل اللي حصل ....

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual