تحت اسم الحب!

ارحموا "الحب"... و ارحموا نفسكم !

.......

من خلال كل السنين اللي اشتغلت فيها في مجال العلاج النفسي ..و قبلها الكوتشينج، ماشوفتش حاجه تعبِت الناس في حياتها و نكدت عليها ..اكتر من فكرة "الحب"!

كل واحد قاعد في علاقه تعيسه، تسأله ليه؟ يقول "علشان بحبها !"

و كل واحده في علاقه مع حد مطلع عينها و مكرهها في عيشيتها، تقولها "طيب قاعده معاه ليه؟" أو "رجعتيله ليه؟"، تقول " علشان بحبه!" .. و كأن كلمة الحب دي هي العُذر اللي بسببه ممكن حياتي تبقي جحيم، أو ممكن ادمر حياتي بسببها ( أو أدمر حياة شخص تاني ) ، بس كل ده مسموح، طالما "انا بحبه!"

لدرجة اني متخيل أن "الحب" نفسه لو كان شخص ، كان حيطلع و يبرأ نفسه من كل التهم و الحاجات اللي بنلزقها فيه، و الجرائم اللي بنرتكبها تحت اسمه!

و علي الرغم من أن في رأيي كل اللي احنا بنسميه حب، هو معظمه مجرد مجموعه من التشبيكات و الارتباطات العاطفيه (emotional entanglements) اللي ليها علاقه اساسا بعلاقتنا بأبونا و امنا و بتربيتنا (و احنا اللي بنسميها حب)، إنما حتي لو كانت فعلا حب ...فالحب مش مبرر اني اقعد في علاقه مؤذيه ليا ، أو اني استمر في علاقه بتطفيني كل يوم عن اليوم اللي قبليه... أو اني اسمح لحد يستغلني بأي شكل من الأشكال (سواء كان عاطفي أو مادي أو جسدي) او يسيطر عليا أو يقولي حياتي المفروض تمشي ازاي!

اي علاقه مؤذيه ليا، لازم أخرج منها، حتي لو كانت تحت مسمي الحب ...(و حتي لو كنت مابنمش الليل، أو بنامه و دمعتي علي خدي! )...

الحب لو مش بيزوّد من استمتاعي بالحياه و بيحسن من حالتي النفسيه ، يبقي قلته احسن!

و اي علاقه مش مريحه ليا، و مش بتديني القدره علي التطوّر ...يبقي قِلتها احسن!

ارحموا الحب من اللي انتوا بتتهموه بيه في كل علاقه مؤذيه...

و ارحموا نفسكم ..من اللي بتعملوه فيها تحت اسم "الحب"!

#الحب

#علاقات_عاطفيه

#منير_الشاذلي

YouTube: Monir El Shazly

Facebook page: @monirelshazlyspiritual

Instagram: monir.elshazly.spiritual